Málɩ́kɩ Bháàda
Bháàda
A lɛ́bhɛ Zozi Klísɩ a Námadìè kplɔkplɔnyɔ Málɩ́kɩ jɩ́jrà a. Málɩ́kɩ yà Zozíi sɔ́ nɩ́ kʋ́ námnɩ, mà ɔ̀ yà Pɩ́ɛ́lɩ sɔ́ námnɩ kʋ́.
Kplɔkplɔnyʋaá fɩ́ɛ́ à jɩ́jrà Zozíi a Námadìè a, a jɩ́jràlɩ̀ɛ̀ fɩ́ɛ́ a nyièdɩ, Málɩ́kɩ a jɩ́jràlɩ̀ɛ̀ ɩ́mɩ́ nɩɩ́ mʋ́ trʋ̀. Málɩ́kɩ cíe Zozi Klísɩ a Námadìè a bɔ́gʋ̀ɔ̀ a jɩ́jrɛ̀ kʋ́ a, ɔ nɩ́ ʋ mnɩ́ àmɔ̀ Zozíi a vavawɔlɩ srʋ. Mà Lagɔ a nékʋ́cinyɔ Zán Batísɩ a nɔnʋɔ́ ɔ́ zrɩ a, ʋ́mʋ́ jɩ̀ ɔ́ bháa.
Bɔ́gʋ̀ɔ̀ lɩ̀à a mnɩ́, Málɩ́kɩ srʋ àmɔ̀ mà Zozíi, Lagɔ a Yuwliyʋ ɔ́ ŋwɔ́ɔ. Lé ɔ́ srʋ sɔ́kʋ́ àmɔ̀ mà Zozíi, Nyɔɔ́ a Yuwliyʋ ɔ́ ŋwɔ́ɔ. Nyɔɔ́ a Yuwliyʋɔ́, ɔ́ɔ yi lé ɔ ká nyʋa gà zrɩɩ, ɔ ká ɔ nyoku sa à, lé nyʋa kɔ́kɔ́mnɩ́ ká ʋ́ neé wlʋ́ (10.45).
Málɩ́kɩ a Námadìè ɔ́ salɩɩ pɩ́ sɔ́ mʋ́.
Tagàdìè ɔ́ sa a, ɩ́ bháa ɔ bɔ́gʋ̀ɔ̀ a nábà kádàà bhlɛ̀gbɩ́ jɩ̀, lé ɩ́ ŋnɩ gbàáta jɩ̀ (1.14–8.26). Ɔ́ srʋ àmɔ̀ bɔ́gʋ a mnɩ́ mà, Zozíi flʋ Galiléebhlɩ a mnɩ́ jrè lé ɔ́ zrɩ mɔ̀ɔ Lagɔ̀nɔ̀nʋ. Ɔ́ srʋ àmɔ̀ cémʋ́ Zozíi nɩ lé ɔ́ wle ɔ́ kʋjɩ̀nyʋ̀àà a, pɔ́waá Zozíi ka wá, lé ɔ́ jɩ́lɛ wá nyumozìzi a, Málɩ́kɩ srʋ àmɔ̀ á wɔlɩ́. Ɔ́ cí sáà mà Zozíi yalɩma gupuonyʋa. Ɔ́ anɩ́ Zozíi cɩ́a Lagɔ a Námadìè Lagɔ a pɔ́wa a mnɩ́. Málɩ́kɩ anɩ́, Zozíi nɩ sáà wɔlɩ́ kɔ́kɔ́mnɩ́.
Sɔ́dìè ɔ́ sa a, ɩ́ bháa nábà káda a gbàáta jɩ̀ lé ɩ́ ŋnɩ kʋ́gbá gbɩ́flɔ́ jɩ̀ (8.27–16.20). Ɔ́ cí cémʋ́ Zozíi kú lé ɔ́ galɔ̀ a.
Zozíi ká kú a, Wlɔmɛ́ɛsʋ̀jàà a kámanyɔ a múó a drɩ̀ mʋ́ a kʋlɔɔ́ kúsu jɩ̀. Mà tányɩɛ́ mʋ́ ɔ́ yɛ́ Zozíi a kwɩ́ɛ́ a dá a, bhʋ́ ɔ́ sa né, ɔ́ anɩ́: «Cɩ́cása lé, nyɔɔ́ lɩ̀à ŋwɔ́ɔ la Lagɔ a Yuwliyʋ» (15.39).
Voafantina amin'izao fotoana izao:
Málɩ́kɩ Bháàda: NEY
Asongadina
Dika mitovy
Mampitaha
Hizara
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc. All rights reserved.