Genesis Ondjiukisiro
Ondjiukisiro
Ena ndi Genesis ri heya kutja Ombutiro. Oro ri serekarera ombutiro youye, nomamemeno womundu, nombutiro yourunde mouye, nomuano wa Ndjambi komundu ngwa zunḓaka, nombutiro yotjiwaṋa tja Israel.
Embo ndi ra haṋewa motupa tuvari: Orupa orutenga rwembo ndi (Gen 1—11) matu rese mo ohunga nombutiro youye nekuruhungi rovandu ovatenga ooAdam na Eva, Kain na Abel, Noa nomupupo omunene, nomatungiro wotjiretundu tja Babilon.
Orupa orutjavari rwembo ndi (Gen 12—50) matu rese mo ohunga nekuruhungi rooihe mukururume wotjiwaṋa tja Israel. Ihe mukururume omutenga motjiwaṋa tja Israel wari Abraham. Eye wari nongamburiro mu Ndjambi nu wina wari nonḓuviro ku ye. Ku Abraham kwa kongorera Isak omuzandu wa Abraham, nu wina ku Isak kwa kongorera Jakob omuzandu wa Isak. (Jakob aa isanewa kutja Israel). Ku Jakob kwa kongorera ovazandu ve omurongo na vevari mba karira omihoko omurongo na vivari vya Israel. Nu wina morupa ndwi matu rese mo ohunga nomuzandu umwe mokati kaimba omurongo na vevari, nguri Josef, novitjitwa mbya eta Jakob novazandu ve neṱunḓu re okutura mOengipte.
Embo ndi ri serekarera imbi Ndjambi mbya tjita. Oro komautiro ri raisa oukahu kutja Ndjambi wa mema ouye auhe. Noro wina ri yanda nomakwizikiro ngu maye raisa kutja Ndjambi makaenda komurungu okurikendera omundu. Okuza komautiro we mbo ndi, Ndjambi wa raisiwa otja omupangure omunene nomuvere wa imba mbe tjita ouvi, nu wina wa raisiwa otja omunane nomuvatere wovandu. Nembo ndi ra tjangerwa okuserekarera ongamburiro yovandu mu Ndjambi nokuvatera kutja ongamburiro i kare onamuinyo.
Omakutiro womambo
Ombutiro youye (1:1—2:25)
Ombutiro youvi nomazunḓakero wouye (3:1-24)
Ozondekurona za Abraham nga pu Noa (4:1—5:32)
Noa nomupupo (6:1—10:32)
Otjiretundu tja Babel (11:1-9)
Ozondekurona za Sem nga pu Abram (11:10-32)
Abraham, Isak na Jakob ooihe mukururume wotjiwaṋa tja Israel (12:1—35:29)
Ozondekurona za Esau (36:1-43)
Josef nomarumbi we (37:1—45:28)
Ovaisrael mOengipte (46:1—50:26)
Voafantina amin'izao fotoana izao:
Genesis Ondjiukisiro: HRR-UNI
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Herero Revision Bible © Bible Society in Namibia, 2021.