Kisary famantarana ny YouVersion
Kisary fikarohana

मर्कूस 3

3
लाहक्‍पा काम्‍ग्‍यो मिह टा़हक्‍यो
(मत्ती १२:९-१४; लूक ६:६-११)
1येशू छो़खाङला फेप्‍नाङगेमु ओ़हला लाहक्‍पा काम्‍ग्‍यो मिह च्‍यी़ येहकें। 2ओ़ह ङ्यिहमा थाङ सोएँगी ङ्यिहमा यिहन्‍गे ओहजेला येशूगी खोला टा़ह च्‍य़ू नाङगेनी म़ेदी फातुर च़ूज्‍येला मिहया़ च्‍यिवा च्‍येती तेहसीन। 3ओहले येशूगी लाहक्‍पा काम्‍ग्‍योगी मिहला, “ख्‍ये लाहङदी देला स्‍यो!” म़ेदी सुङ नाङसीन। 4ओहले येशूगी ओ़हला जोम्‍ग्‍यो मिहया़ला टी़ह नाङसीन, “थाङ सोएँ ङ्यिहमाला ल़ेह या़हबु पेह कोहएँनी चोक्‍पा पेह कोहएँ? थार च्‍य़ू कोहएँनी स्‍यि च्‍य़ू कोहएँ यिहम्‍बा?” ओहजेला सुगीॱआङ ल़ेहन माहक्‍याहप। 5ओ़ह सोङबे येशूगी थुयाल ज़्‍याङदी खुङ थाम्‍ज्‍यीलाराङ ज़ी़ नाङसीन। ओ़ह मिहया़गी सेम सान्‍दी ज़ी़ नाङदी येशूगी ज्‍यिबुराङ थु ङ्युङबु जे नाङसीन। ओहले येशूगी ओ़ह मिहला सुङ नाङसीन, “ख्‍येगी लाहक्‍पा क्‍याङदोङ ले।” ओहले ओ़ह मिहगी लाहक्‍पा क्‍याङसीन ओहले खोगी लाहक्‍पा टा़हसीन।
6ओहले फरिसीया़ छो़खाङले थेन्‍दी काहल्‍सीन ओहले लाहम्‍साङराङ हेरोदगी मिहया़ ङ्याम्‍बु थू़दी येशूला काह-ठि पेहती सेच्‍ये म़ेदी टे़ह क्‍याहप्‍सीन।
7ओ़ह तिङला येशू राहङगी स्‍याहप्‍च्‍यीया़ ङ्याम्‍बु गालील साने़की छो-क्‍याहम्‍जोगी सुहरला फार फेप नाङसीन ओहले मिह माहङबुराङ येशूला ताहदा क्‍याहप्‍ती ओहङसीन। 8ओहले मिहया़गी येशूगी जे नाङग्‍यो छ्या़लेनगी तेहन्‍दाला थे़वाराङ यहूदीया लुहङबा, यरूशलेम क्‍याहसा, इदुमिआ लुहङबा, यर्दन चाङबु फार्केनगी लुहङबा, ओहले टुरोस क्‍याहसा, सीदोन क्‍याहसा दाङ ओ़ह क्‍याहसा साहर-सुहरकी युहलया़लेॱआङ मिह माहङबुराङ येशूसाला मिह-माहङ जोम ओहङसीन। 9दि ज़ी़दी मिह मिह-माहङगी राहङला च्‍येप्‍ती माहयोङज्‍यु म़ेदी येशूगी स्‍याहप्‍च्‍यीया़ला टुह-छ्युङ च्‍यी़ ख्‍येर्स्‍यो म़ेदी सुङ नाङसीन।#मर्क ४:१; लूक ५:१-३
10येशूगी मिह थाम्‍ज्‍यीलाराङ टा़ह च्‍य़ू नाङग्‍यो येहकें। ओ़ह सोङबे नेहपाया़गी येशूला दे़ज्‍ये म़ेदी फूल-फूल चे़दी ओहङसीन। 11मेहचाङा नाम्‍स्‍यीया़ स्‍य़ूहक्‍यो मिहया़गी येशूला थोङ-लुहङ मे़हबाराङ येशूगी स्‍याहपला खेप्‍चु क्‍याहप्‍ती क़े तेन्‍दी, “राहङनी किन्‍ज्‍योगी स़ेबु यिहम्‍बा!” म़ेदी मासीन। 12ओहजेला येशूगी “ङाह सु यिहम्‍बा म़ेदी मिहया़ला क्‍यी़ह ज्‍योर मा़हच्‍यु” सुङदी ओ़ह मेहचाङा नाम्‍स्‍यीया़ला ठो़ जेती का नाङसीन।
येशूगी स्‍याहप्‍च्‍यी च्‍यिङ्यी़ला दाम नाङग्‍यो
(मत्ती १०:१-४; लूक ६:१२-१६)
13ओहले येशू काहङदो च्‍यी़ला जा़ नाङसीन ओहले राहङला कोहएँ-चे स्‍याहप्‍च्‍यीया़ला क़े क्‍याहप नाङसीन। ओहले खुङया़ येशूसाला ओहङसीन। 14-15ओहले राहङ ङ्याम्‍बुराङ तेहच्‍ये दाङ या़हबु लेहङगुगी केच्‍या स्‍येच्‍येला डोज्‍यु म़ेदी येशूगी मेहन्‍दा च्‍यिङ्यी़ला दाम नाङसीन, ओहले खुङया़ला ल्‍हेन्‍डीया़ तेन्‍गेन्‍गी ओङ नाङसीन। ओहले येशूगी खुङया़ला ल़ेह-पेन सुङदी छेन ज़्‍या़ नाङसीन। 16येशूगी दाम नाङग्‍योगी ल़ेह-पेन च्‍यिङ्यी़गी मिहन दिया़राङ यिहम्‍बा– सिमोन, खोला येशूगी पत्रुस म़ेदी मिहन ज़्‍या़ नाङसीन। 17ओहले जब्‍दियागी पुह पिन ङ्यी़ याकूब दाङ यूहन्‍ना, खुङया़ला येशूगी “बोअनगर्नेस” म़ेदी मिहन ज़्‍या़ नाङसीन, ओ़ह माक्‍योगी तेहन्‍दादी नाम क़े तेन्‍गेन्‍गी छार्क्‍यीन यिहम्‍बा। 18ओहले अन्‍द्रियास, फिलिप, बारथोलोमाइ, मत्ती, थोमा, अल्‍फयसकी पुह याकूब, थेदियस, सिमोन कनानी#३:१८ कनानी: दिगी तेहन्‍दादी देशभक्तॱआङ यिहम्‍बा।, 19ओहले येशूला ज़ुङ च्‍य़ूएँगी यहूदा इस्‍करियोत।
येशू दाङ बालजिबुल
(मत्ती १२:२२-३२; लूक ११:१४-२३; १२:१०)
20ओ़ह तिङले येशू येहपाराङ खाङबा च्‍यी़ला फेप नाङसीन। येहपाराङ मिह मिह-माहङया़ जोम ओहङसीन, मिह ज्‍यिबुराङ माहङबु येहकें सोङबे येशू दाङ येशूगी स्‍याहप्‍च्‍यीया़गी सोल छ्ये-लुङ च्‍यिॱआङ माहयोहङ। 21दि केच्‍या थे़दी येशूगी खाङबा मे़हमेया़गी येशूला लेहन्‍ज्‍येला काहल्‍सीन च्‍यिबेमाना येशू ङ्योक्‍यो यिहम्‍बा म़ेदी खुङया़ला ने़उ येहकें।
22यरूशलेमले ओहङग्‍यो लाहला छ्य़ेगी ख्‍येम्‍बोया़गी “खोला बालजिबुल माएँ ल्‍हेन्‍डी स्‍य़ूहक्‍यो दु, ओ़ह ल्‍हेन्‍डीगी क्‍याहल्‍बुगी ओङगी पेहती खोगी ल्‍हेन्‍डीया़ला ङ्येके” म़ेदी माज्‍ये छ़ूसीन।
23ओ़ह सोङबे येशूगी खुङला क़े क्‍याहप्‍ती दि केच्‍यागी तेहन्‍दाला पे च्‍यी़ ज़्‍या़दी सुङ नाङसीन, “ती़ह गो-छ्येवा खो राहङगी राहङलाराङ काह-ठि पेहती ङ्ये ख़ूज्‍ये ले? 24लुहङबा च्‍यी़गी मिहया़ राहङ नाहङदोङराङ जिङसीमानानी ओ़ह लुहङबा तोङदी डोएँ। 25ओहले येहपाराङ, खाङबा च्‍यी़गी मिहया़ राहङ नाहङदोङराङ जिङदी तेहसीमाना ओ़ह खाङबाॱआङ नोहङदी डोएँ। 26ओ़ह ल़ेहमुराङ पेहती ती़ह गो-छ्येवागी क्‍याहल-खापॱलाङ ठ़ूस्‍यी ओहङसीमाना ओ़ह छ्या़ मी़हखुएँ ओहले खो राहङराङ तोङदी डोएँ। 27ओहले येहपाराङॱआङ, स्‍युक छ्यिम्‍बु येहकेन्‍गी मिहला ताहम्‍ना मिहम्‍बा, खोगी खाङबा नाहङला स्‍य़ूहदी पेला ख्‍येर मी़हखुएँ ग्‍यिले। खोला ताहम फान्‍ज्‍यो गा पेलाया़ ख्‍येर ख़ूएँ।
28 तेहम्‍बाराङ ङाह ख्‍याला माएँ, मिहगी पेहकेन्‍गी तिहक्‍पा थाम्‍ज्‍यीराङ ता़ह ख़ूएँ, किन्‍ज्‍योला स्‍ये़हन्‍डील पेहक्‍योगी तिहक्‍पाॱआङ ता़ह ख़ूएँ, 29यिहॱनाङ नाम्‍पार-ताहक्‍पा थुला स्‍ये़हन्‍डील पेहकें तिहक्‍पाया़दी नाहमॱआङ ता़ह ख़ूज्‍ये म़ेह। ओ़ह मिहया़ला नाहम्‍स्‍यी किन्‍दुॱराङ ङ्य़ेहबा फो़ज्‍ये येह।” #लूक १२:१० 30खुङया़गी येशूला मेहचाङा नाम्‍स्‍यी स्‍य़ूहसीन दु म़ेदी माक्‍यो सोङबे येशूगी दि स्‍याहल सुङ नाङग्‍यो यिहम्‍बा।
येशूगी आमा दाङ नो़हया़
(मत्ती १२:४६-५०; लूक ८:१९-२१)
31ओ़ह ती़हजीलाराङ येशूगी आमा दाङ नो़हया़ लेप्‍सीन। खुङया़गी फिलाॱराङ कू़हदे येशूला क़े क्‍याहप्‍च्‍येला ताङ चाहङसीन।
32येशूगी कोर-क्‍यिहलेॱराङ मिह-माहङ तेहती येहकें। ओहले खुङया़गी येशूला मासीन, “ज़ी़-नाङदोङ, राहङगी आमा, नो़हया़ दाङ आज्‍यी-नुहमुया़गी फिला राहङला क़े क्‍याहप नाङगेराङ येहबा।” 33ओहले येशूगी, “ङाहगी आमा दाङ ङाहगी नो़हया़ सु यिहम्‍बा?” म़ेदी टी़ह नाङसीन। 34ओहले येशूगी ओ़हला येहकेन्‍गी मिह थाम्‍ज्‍यीलाराङ ज़ी़दी सुङ नाङसीन, “त़ेदोङ, ङाहगी आमा दाङ नो़हया़ दिया़राङ यिहन। 35च्‍यिबेमाना किन्‍ज्‍योगी थु ङ्ये़बागी ल़ेह पेहकेनया़ॱराङ ङाहगी नो़ह, नुहमु दाङ आमा यिहन” म़ेदी सुङ नाङसीन।

Voafantina amin'izao fotoana izao:

मर्कूस 3: HYLM

Asongadina

Hizara

Dika mitovy

None

Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra