यूहना 12
12
यीसू गै पगां पर तेल ढोलणो
(मत्ती 26:6-13; मरकुस 14:3-9)
1फसह गै त्यूंहार ऊं छ दिन पेलां यीसू बैतनिय्याह गाम ऊं चाल पड़यो। बठै लाजर रेवंतो हो झिकै नै यीसू मरेड़ा मू जींवंतो करयो हो। 2बठै यीसू गै आदर गै खातर आथण गी रोटी तैयार करी अर मारथा रोटी घाल दैय है अर लाजर बी बांगै सागै रोटी खाण बेठ ग्यो। 3जद मरियम जटामांसी ऊं बणाएड़ी आदै किलै गी भोत मेंगी सेंट यीसू गै पगां पर लगायो अर आपगै बाळा ऊं बिंगा पग पूंछया जद बिं सेंट गी सुरम सारै घर में होगी।
4जद बिंगै चेला मू एक यहूदा इस्करियोति झिको बिनै धोखो देण आळो हो। 5बण केयो ईं सेंट गो मोल लगभग एक साल गी मजदूरी गै बराबर है इनै बेचगे पीसा कंगाला नै देणा चईयै। 6बण आ बात ईंखातर कोनी कैई ही कै बो कंगाला गी चिंता करतो हो पण बो तो खुद चोर हो अर पीसां गी थेली बिंगै कनै रेवंती ही अर बिमै झिको कीं घालतो बिमुं कीं चोरी ऊं काड़ लेवंतो हो।
7यीसू केयो, “बिनै तंग ना करो क्यूंकै बण मेरो सरीर दफण करण ऊं पेलां सेंट लगागे तैयार करयो है। 8क्यूंकै कंगाल तो थारै सागै सदां रेवैगा पण मैं थारै सागै सदां कोनी रेऊंगा।”
9जद फसह गो त्यूंहार मानण खातर आएड़ा यहुदी लोग जाणग्या कै यीसू बैतनिय्याह गाम में है। ईंखातर बठै गेया अर एकलै यीसू नै कोनी पण झिकै लाजर नै बण मरेडै़ नै जींवंतो करयो हो बिनै बी देखण आया हा। 10ईंखातर मुख्य याजकां लाजर नै बी मारण गी योजना बणाई ही। 11क्यूंकै बिंगै कारण भोत सारा यहुदी लोग आपगै अधिकारियां नै छोड़गे यीसू पर बिस्वास करण लागग्या हा।
यरुसलेम में जीत गे जाणो
(मत्ती 21:1-11; मरकुस 11:1-11; लूका 19:28-40)
12फेर दूसरै दिन फसह गो त्यूंहार मनाण आएड़ा भोत लोग सुण्यो कै यीसू यरुसलेम में आण लागरयो है। 13ईंखातर बां खजूर गी डाळियां लेगे मिलण खातर चाल पड़या अर ऊंची आवाज में बोलण लागरया,
“होसना!”
“धन्य है बो झिको प्रभु गै नाम ऊं आवै है!”
“बो झिको इसराएल गो राजा है!”
14जद यीसू नै एक गधै गो बच्चों दिख्यो अर बो बिं पर बेठगे जाण लागग्यो अर परमेसर गै बचन में जिंया लिख्यो हो बो पूरो होयो, जिंया कै पवितर सासतर में लिख्यो है कै,
15“यरुसलेम गा लोगो, ना डरो।
पण देखो थारो राजा गधियै गै बच्चै
पर बेठगे थारै सामणै आण लागरयो है।”
16जद ऐ बातां चेला गै कीं समझ कोनी आई पण यीसू गै जी उठण गै बाद जद पिता परमेसर गै कनै सुरग में उड़ग्यो जद बानै याद आई अर समझया कै ऐ बातां बिंगै बारै में लिखेड़ी ही। लोग इंया कर'गे परमेसर गै बचन में झिको लिख्यो हो बिनै पूरो करयो हो।
17जद यीसू लाजर नै कबर मू बुला'गे मरेड़ा मू जींवंतो करयो हो जद भीड़ मू झिका बिंगै सागै बठै हा, बां बिंगै करेडै़ चमत्कार गै बारै में दूसरा नै बतायो। 18ईं कारण लोग बिंऊं बाता करण नै आया हा क्यूंकै बां सुण्यो हो कै बण ओ चमत्कार करयो है। 19जद फरीसी आपस में केण लागग्या, “सोचो थे लोग कीं कोनी कर सक्या, देखो सारा लोग बिंगै लारै हो'ग्या है।”
20फसह गै त्यूंहार में झिका आराधना करण आया हा बामै कीं लोग गेर यहुदी हा। 21बे गलील परदेस बेतसैदा गाम में रेण आळै फिलिप्पुस कनै गेया अर बिनै बिनती करी महोदय, म्हे यीसू गो दरसण करणो चावा हां। 22फेर फिलिप्पुस अन्द्रियास नै आ'गे बतायो अर फेर अन्द्रियास अर फिलिप्पुस यीसू कनै आ'गे केयो।
23यीसू बानै उतर दियो, मिनख गै बेटै नै आदर मिलण गो टेम आ'ग्यो। 24मैं तनै साची केऊं कै जद तांई कणक गो दाणो धरती गै मा जा'गे मर कोनी जावै जद तांईं बो एकलो रेवै है। जद बो मर जावै है तो भोत सारा दाणा नै जन्म देवै है बिंयाई जद मैं मरूंगा तो भोत लोगां नै अनन्त जीवन मिलैगो। 25झिको कोई आपगै प्राण नै प्यारो जाणै है बिनै अनन्त जीवन कोनी मिलैगो पण झिको ईं संसार में आपगै प्राणा ऊं बोळो प्रेम मेरै उपर राखै है बिनै अनन्त जीवन मिलैगो। 26जे कोई मेरी सेवा करै तो बो मेरै लारै हो जावै अर जठै मैं हूं बठै मेरो सेवक बी होवैगो। जे कोई मेरी सेवा करै तो पिता बिंगो आदर करैगो।
करूस गी मोत गो हिसारो
27अब मेरो जी घबराण लागरयो है। मैं के केऊं, “हे पिता, मनै दुख गी ईं घड़ी ऊं बचा, मैं ओ के कोनी सकूं, क्यूंकै ओ दुख सेण खातर मैं ईं संसार में आयो हूं। 28हे पिता थे किता म्हान हो कै लोगां नै दिखाओ। जद परमेसर सुरग ऊं बोल्यो अर लोगां नै सुणीज्यो कै पेलां बी दिखा दियो है कै मैं कितो म्हान हूं अर फेर बी दिखाऊंगा।” 29जद बठै खड़या लोग सुणै हा, बां केयो कै बादळ गरजयो है। दूसरां केयो, कोई सुरगदूत बिनै बोल्यो है।
30जद यीसू केयो, “आ आवाज मेरै खातर कोनी पण थारै फायदै खातर है। 31अब ईं संसार गै लोगां गो न्याय करण गो टेम आ'ग्यो है अर अब संसार गै लोगां गै उपर राज करण आळी सैतान गी सकती नै परमेसर नास करैगो। 32जद मनै मारण खातर धरती ऊं करूस पर चढायो जावैगो तो मेरै उपर बिस्वास राखण आळा सारै लोगां नै मैं आपगै कनै ले आऊंगा।” 33बो ओ बताणो चावै है कै मैं हिसी मोत मरूंगा।
34ईं पर लोगां बिनै केयो, “परमेसर गै बचन ऊं म्हानै ठा लागै है कै मसी कदी कोनी मरैगो। फेर तूं क्यामी केवै है कै मिनख गै बेटै नै मारण खातर करूस पर चढायो जाणो जरूरी है तो फेर ओ मिनख गो बेटो कुण है?”
35यीसू बानै केयो, “मैं थारै खातर एक जोती हूं अर अब थोड़ी देर तांई मैं थारै सागै रेण आळो हूं। बिंगै बाद थे अंधेरै में चालण जिसा बण जावोगा अर झिको अंधेरै में चालै है। बो कोनी जाणै कै किनै जावै है। ईंखातर जद तांई मैं थारै सागै हूं जद तांई थे जोती में चालण आळा बणो। 36जद तांई जोती थारै सागै है बिमै बिस्वास राखो कै थे लोग जोती गी उळाद हो सको।” यीसू इतो केगे उड़ग्यो अर बांगी आंख्या गै आगै ऊं दूर रेयो।
यहुदियां गो अबिस्वास में बण्यो रेणो
37बण बांगै सामै इता चमत्कार दिखाया तो बी बां बिं पर बिस्वास कोनी करयो। 38ओ सारो कीं बिं तरियां जिंया यसयाह परमेसर गी बात बताण आळा गी किताब में लिखेड़ो हो,
“प्रभु म्हारै संदेस पर कुण बिस्वास करयो है
अर प्रभु गी सकती कण देखी है?”
39ईं कारण बे बिस्वास कोनी कर सक्या क्यूंकै यसयाह फेर केयो हो,
40परमेसर बांगी आंख्या आंधी कर दी
अर बांगो मन कठोर कर दियो।
ईंखातर बांगी आंख्या देख कोनी सकै
अर बांगा दिल समझ कोनी सकै
अर मैं बानै ठीक करूं पण बे मेरै कनै आ कोनी सकै।
41यसयाह ओ ईंखातर केयो हो कै बण यीसू मसी गी मेमां देखी ही अर बिंगै बारै में बात बी कैई ही। 42फेर बी यहुदी अधिकारियां मू भोत लोग बिं पर बिस्वास करयो। बे फरीसियों ऊं डरता हा। ईंखातर बां खुलै तोर पर घोसणा कोनी करी क्यूंकै बानै डर हो कै कठैई म्हानै सतसंग घर ऊं बारै ना काड़ दैय। 43बानै आदमियां गो आदर परमेसर गै आदर ऊं ज्यादा आच्छो लागतो हो।
44यीसू ऊंची आवाज में केयो झिको मेरै पर बिस्वास करै है बो मेरै पर ई कोनी पण मेरै भेजण आळै पर बी बिस्वास करै है। 45झिको मनै देखै है मेरै घालण आळै नै बी देखै है। 46मैं संसार में जोती गै रूप में आयो कै हर बो आदमी झिको मेरै पर बिस्वास राखै है अंधेरै में ना रेवै। 47जे कोई मेरी बातां सुणगे बांगो पालण कोनी करै तो मैं बिनै गुनहेगार कोनी बणाऊं क्यूंकै मैं संसार नै गुनहेगार बणागे फेंसलो करण कोनी आयो पण संसार नै मुकती देण खातर आयो। 48झिको मनै अर मेरी बाता नै तुछ मानै बिंगो फेंसलो करण आळो मेरो बचन है झिकै गो उपदेस मैं थानै दियो है। परमेसर लोगां गो फेंसलो करण गै दिन मेरो बचन बांगो फेंसलो करैगो। 49क्यूंकै मैं आपगै कनूं कोनी केयो पण पिता झिकै मनै भेज्यो है अर उपदेस दियो है कै मैं के केणो है अर मैं के बताणो है। 50मैं जाणूं हूं कै बिंगी आग्या अनन्त जीवन देण आळी है। ईंखातर मैं झिको बोलूं हूं बो जिंया पिता मनै केयो है बिंयाई बोलूं हूं।
Voafantina amin'izao fotoana izao:
यूहना 12: BGQ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023 (Active), Wycliffe Bible Translators, Inc. All rights reserved. © WIn Publishing Trust