यूहना 15
15
यीसू सच्ची अंगूरा गी बेल है
1यीसू केयो, “सच्ची अंगूरा गी बेल मैं हूं। अर मेरो पिता देखभाळ करण आळो किसान है। 2झिकी डाळी मेरै में है अर फळ कोनी लागै बो बिनै बाड देवै है अर झिकी डाळी फळ ल्यावै है बिंगी देखभाळ करै है कै बा ओर जादा फळ ल्यावै है। 3झिको उपदेस मैं थानै दियो है बिं पर थे बिस्वास करयो है। ईंखातर थे लोग पेलां ई सुद्ध हो। 4थे मेरै में रेवो अर मैं थारै में रेऊंगा। जे डाळी अंगूरा गी बेल सागै जुड़गे कोनी रेवै तो फळ कोनी ल्या सकै बिंयाई जे थे बी मेरै में ना जुड़गे रेया तो फळ कोनी ल्या सको।
5मैं अंगूरा गी बेल हूं। थे बिंगी डाळियां हो। झिको मेरै में रेवै है अर झिकै में, मैं रेऊं हूं बो भोत फळ ल्यावै है क्यूंकै मेरै बिना थे कीं कोनी कर सको। 6जे कोई मेरै में ना बण्यो रेवै तो बिं डाळी गी तरियां फेंक दियो जावै है अर बो सूक जावै है। अर लोग बानै भेळी कर'गे आग लगा देवै है अर बे बळ जावै है। 7जे थे मेरै में बण्या रेवो अर मेरी बाता नै मानो तो झिको थे चावो अर मांगो, बो थानै मिल जावैगो। 8जद थे भोत सारो फळ ल्यावो तो मेरै पिता नै आदर मिलै है। जद थे दिखो कै सचमुच मेरा चेला हो।
9जिंया पिता मनै प्रेम करयो है मैं बी थानै बिंयाई प्रेम करयो है। मेरै प्रेम में बण्या रेवो। 10मैं आपगै पिता गी आग्या नै मानी है। ईंखातर सदां मैं बिंगै प्रेम में बण्यो रेऊं हूं, बिंयाई जे थे मेरी आग्या नै मानोगा तो मेरै प्रेम में बण्या रेवोगा। 11मैं ऐ बाता थानै ईंखातर कैई है कै मेरो आनंद थारै में रेवै अर थारो आनंद भरपूर हो जावै। 12आ मेरी आग्या है कै आपसरी में प्रेम करो जिंया मैं थारूं प्रेम करयो है। 13झिको कोई आपगै मित्र खातर जान देवै है बो ई है सारा ऊं मोटो प्रेम है। 14ईंखातर झिको उपदेस में थानै देऊं हूं अर थे बिं पर चालो तो थे मेरा मित्र हो। 15अब ऊं मैं थानै दास कोनी केऊंगा क्यूंकै कोई दास कोनी जाणै कै बिंगो मालिक के करै है। पण मैं थानै मित्र केयो है क्यूंकै मैं झिकी बाता आपगै पिता कनूं सुणी, बे सारी थानै बता दी। 16अर थे मनै कोनी चुण्यो पण मैं थानै चुण्या है अर जिमेदारी दी है। क्यूंकै थे जा'गे झिका आच्छा काम मैं करया बिंयाई कर'गे आच्छो फळ ल्यावो अर थारो फळ बण्यो रेवै। थे मेरै नाम ऊं पिता कनूं झिको मांगोगा बो मिल जावैगो।”
जगत गो बेर
17मैं थानै ओ उपदेस देऊं कै थे एक दूसरै ऊं प्रेम करो। 18यीसू फेर चेला नै केयो, “संसार गा लोग थारूं बेर करसी पण थे याद राखियो कै बण थारै ऊं पेलां मेरै सागै बी बेर राख्यो। 19अर जे थे बेर राखण आळा बरगा होवंता तो बे थारूं प्रेम करता क्यूंकै थे बी पेलां बांगै जिसा काम करता। पण अब थे संसार गा कोनी हो। मैं थानै ईं संसार मू चुण लिया है। ईंखातर बे थारूं बेर राखै है। 20मैं थानै केयो है कै कोई दास आपगै मालिक ऊं मोटो कोनी होवै। बिं बात नै याद करो, जे बां मनै दुख दियो तो थानै बी दुख देवैगा। बिंयाई जे बां मेरी बात मानी तो थारी बात बी मानैगा। 21पण बे मेरै कारण थारै सागै ओ सारो कीं करैगा क्यूंकै बे बिनै कोनी जाणै झिकै मनै भेज्यो है। 22जे मैं ईं संसार में ना आवंतो अर बानै परमेसर गी बाता ना सिखावंतो तो बे कीं बात गा दोसी ना होवंता। पण अब आपगै पापां खातर बांगै कनै कोई बचणै गो तरिको कोनी है। 23झिको मेरूं बैर राखै है बो मेरै पिता ऊं बी बेर राखै है। 24जे मैं बांगै बिचाळै चमत्कार गा काम ना करतो झिका चमत्कार कदी कणी कोनी करया तो बे पापां गा दोसी ना होवंता। पण अब तो बां मेरै द्वारा करेड़ा चमत्कार देख लिया है फेर बी मेरै अर मेरै पिता दोनां ऊं बेर राखै है। 25पण ओ ईंखातर होयो है कै नेम विधान में झिको लिखेड़ो हो बो पूरो होवै। बठै इंया लिखेड़ो हो कै ‘बिना कारण बां मेरूं बेर करयो।’
पवितर आत्मा गा काम
26बाद में पिता गै कनै ऊं एक मदद करण आळो मैं थारै कनै भेजूंगा बो पिता कनू आण आळो सच्चाई गो आत्मा है, बो मदद करण आळो आ'गे मेरै बारै में बतावैगो। 27अर थे बी गवाई बताओगा क्यूंकै मेरी सेवा गै सुरू ऊं थे मेरै सागै हा।”
Voafantina amin'izao fotoana izao:
यूहना 15: BGQ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023 (Active), Wycliffe Bible Translators, Inc. All rights reserved. © WIn Publishing Trust