मत्ती 23
23
नेम सिखाण आळा अर फरीसियां ऊं सावधान
(मरकुस 12:38,39; लूका 11:43,46; 20:45,46)
1यीसू फेर आपगै चेलां अर भीड़ गै लोगां नै केयो, 2“यहुदी नेम सिखाण आळा अर फरीसी मूसा गै नेम विधान नै सिखाण गा अधिकारी है। 3ईंखातर झिको कीं बे केवै बिं पर चालो अर बिंगो पालण करो। पण झिको कीं बे करै बिंया ना करियो। मैं ओ ईंखातर बताऊं कै बे केवै कीं है अर करै कीं ओर है। 4बे लोगां गै उपर इतो भार लद दैय कै बांगो चालणो मुसकिल होज्यै। पण बे आं बातां पर कोनी चालै। 5बे आच्छा काम लोगां नै दिखाण खातर करै। पण बे साची में आपगा तबीत अर चोळा नै मोटा कर'गे पेरे राखै जिंऊं लोग बानै ग्यानी समझै। 6बे त्यूंहारां में ऊंची जिग्यां बेठणो चावै अर सतसंग में बानै मोटो आसण मिलै। 7बे चावै लोग म्हानै देखगे निमस्कार करै। अर बे चावै कै लोग म्हानै मोटा गुरूजी केगे बुलावै। 8पण थे अपणै आपनै मोटा गुरू ना कुहाईयो क्यूंकै थारो साच्चो गुरू तो एक ई है। 9थे सारा भेन भाई हो। धरती पर किनैई आपगो आध्यात्मिक पिता ना केईयो क्यूंकै थारो पिता तो एक ई है झिको सुरग में है। 10अर ना किनैई आपगो मालिक केईयो क्यूंकै थारो मालिक तो एक ई है बो मसी है। 11थारै मू मोटो आदमी बो ई होवैगो झिको थारो सेवक बणैगो। 12झिको अपणै आपनै ऊंचो करैगो बिनै नीचो करिज्यैगो। अर झिको अपणै आपनै नीचो करैगो बिनै ऊंचो करिज्यैगो।
13अरै पाखण्डी नेम सिखाण आळो, अर फरीसियो, थारै सागै भोत बुरो होवैगो। थे लोगां खातर सुरग गै राज गो बारनो बंद करण लागरया हो। ना थे आप बिमै जावोगा अर ना दूसरा नै जाण देवोगा झिका कोसिस करै। 14-15अरै पाखण्डी नेम सिखाण आळो, अरै फरीसियो, थारै सागै भोत बुरो होवैगो। थे विधवा गा घर खुरड गे खा जावो। अर लोगां नै दिखाण खातर लंबी पराथना करो। ईंखातर थानै भोत मोटी सजा मिलैगी। अर कपटी नेम सिखाण आळो, अर फरीसियो, थारै सागै भोत बुरो होवैगो। थे जद किनैई आपगै सागै रळाओ तो धरती अर समुंदर पार कर जावो। जद बो थारै सागै रळज्यै तो बो थारूं दो गुणा जादा नरक गो भागी बणज्यै। 16हे आंधा गुरुवों थारै सागै बुरो होवैगो। थे केवो, कै मिन्दर गी सोगन खावां तो कीं कोनी होवै। पण जे मिन्दर गै मा सोनै गी सोगन खावां तो बिंगै सागै बंद जावांगा। 17अरै ओ मूरखो, मोटो कुण है? मिन्दर या मिन्दर गो सोनो? बो मिन्दर ई सोनै नै पवितर करै है। 18थे ओ केओ कै जे कोई मिन्दर गी बेदी गी सोगन खावै तो कीं बात कोनी। पण जे बेदी चढाएडै़ चढावै गी सोगन खावै तो बिंगै सागै बंद जावै। 19अरै ओ आंधो, मोटो कुण है? भेंट या बेदी झिका ऊं भेंट पवितर होवै। 20ईंखातर जे कोई बेदी गी सोगन खावै तो बेदी पर रखेड़ी चीज गी बी सोगन खावै। 21झिको मिन्दर गी सोगन खावै बो मिन्दर में रेण आळै गी बी सोगन खावै। 22अर झिको सुरग गी सोगन खावै बो परमेसर गै सिंहासन अर बिं पर बेठण आळै गी सोगन खावै। 23हे कपटी फरीसियो अर नेम सिखाण आळो, थारै सागै बुरो हो'सी। थे पोदिनो अर सूंप अर जीरै गो दसमांस देवो। पण थे नेम विधान गी बात जिंया न्याय, दया अर बिस्वास नै छोड दियो है। थानै चईयै कै आनै बी करतां रेवंता अर आनै ना छोड़ता। 24अरै ओ आंधा गुरुवों, थे लोग पाणी ऊं माछर छाणो जिंया छोटा नेम तो मानो पण ऊंट साबतो खाज्यो जिंया परमेसर गो मोटो नेम विधान कोनी मानो। 25हे कपटी फरीसियो अर नेम सिखाण आळो, थारै सागै बुरो हो'सी। थे आपगी बाटी अर थाळी बारूं तो मांजल्यो पण माऊं लाळच अर सुआरथ ऊं भरेड़ी है। 26अरै ओ आंधा फरीसियो, पेलां आपगी बाटी माऊं मांजो झिकै ऊं बा बारूं ऊं साफ दिखै। 27हे कपटी फरीसियो अर नेम सिखाण आळो, थारै सागै बुरो हो'सी। थे लिपेड़ी कबर बरगा हो झिकी बारूं तो सुणी दिखै। पण माऊं गळेड़ै हाड मांस ऊं भरेड़ी है। 28इंया थे बारूं तो म्हात्मा दिखो। पण माऊं पाखण्ड ऊं भरया पड़या हो। 29हे कपटी फरीसियो अर नेम सिखाण आळो, थारै सागै बुरो हो'सी। थे परमेसर गी बात बताण आळा खातर मोटा मोटा घर बणावो अर धरम गुरुवां गी कबरां नै सजावो। 30जे म्हे म्हारै बडेरां गै टेम में होवंता तो परमेसर गी बात बताण आळा नै मारण खातर सागै कोनी होवंता। 31इंगो मतलब ओ है कै थे मानो कै म्हे बांगै हत्यारां गी उळाद हां। 32ईंखातर झिको थारै बडेरा सरू करयो बिनै पूरो करो। 33अरै ओ सांप गा बच्चों, थे किंया सोचो कै नरक ऊं बच ज्यागां?
34ईंखातर मैं थानै बतावूं कै मैं थारै कनै परमेसर गी बात बताण आळा, बुद्धिमान अर गुरुवां नै भेजूंगा। थे बामूं भोत सारा नै मार दयोगा अर केईयां नै करूस पर चढा दयोगा अर केईयां नै सतसंग घर में कोड़ा मरवावोगा। अर बांगै लारै एक नगर ऊं दूसरै नगर तांई फिरोगा। 35थे निरदोस हाबिल ऊं लेगे बिरिकियाह गै बेटै जकरियाह तांई झिकै नै थे मिन्दर अर बेदी गै बिचाळै मरवा दियो, हर एक निरदोस आदमी गी मोत गो दण्ड थारै पर होवैगो। 36मैं थानै साची केऊं कै पेलां होएड़ा कामां गै द्वारा ईं पीढी गै लोगां नै बी दुख भुगतणो पड़सी।”
यरुसलेम खातर दुख
(लूका 13:34,35)
37यरुसलेम गा लोगो, थे परमेसर गी बात बताण आळा नै मारदैयो अर परमेसर गै भेजेड़ा पर पथर मारया। मैं किती बारी चायो जिंया कूकड़ी आपगै बच्चा नै पांख्या निचै भेळा करल्यै बिंया मैं बी थानै भेळा करूं पण थे लोग आ बात समझया कोनी। 38ईंखातर अब तेरो नगर पूरी तरियां उजड़ जावैगो। 39अर मैं थानै साची केऊं, “तूं मनै जद तांई कोनी देखैगो जद तांई तूं ओ ना केवैगो, धन्य है बो झिको प्रभु गै नाम ऊं आवै।”#भजन संगिता 118:26
Voafantina amin'izao fotoana izao:
मत्ती 23: BGQ
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023 (Active), Wycliffe Bible Translators, Inc. All rights reserved. © WIn Publishing Trust