Lukas 11
11
Yesus nofoinaꞌu anaguhuꞌino dosambahea
11:1-13
Mat 6:9-13; Mat 7:7-11
1Sewakutuu Yesus nosambahea. Pada nosambahea nopugaumo seemie anaguhuno ambano, “Ompu, foinaꞌu kainsami tasumambahea peda Yohanes ⸤ Fokadiuno⸥ nofoinaꞌu anaguhuꞌino.” 2Notobhoosidamo Yesus ambano, “Ane sumambaheaꞌomu, pugauꞌomu nada ini:
Ama, notifosibhalaꞌo toha neamu,
nohatoꞌo toha Kafopahintaꞌamu.
3Waꞌa kainsami nehumaa kafaraluu mani seꞌo-seꞌoleo.
4Amponie sabhaha dhosa mani,
kapaꞌamo insaodi tamaꞌafuꞌao dua kokaꞌalano ne insaodi.
Koise folapasa kainsami ne sabhaha kasoba.”
5Pada anaꞌa Yesus nopugaumo dua ambano, “Ane ibahano nandoo ne olotamiu itu seemie ne kafewuntaꞌino alo nakumala we lambuno sabhangkano maka namugau, ‘O bhahitie, foada kanau rotimu natolu onu. 6Kapaꞌamo bhe sabhangkaku weo kala-kalano noangka se lambu maka miina takoꞌae-aea so naomaa.’ 7Koasimo dua mieno lambu naꞌa tanapugau, ‘Koise hungga-hunggai kanau, fointo notiꞌontomo, anaꞌiku bhe wutoku taodomo, pae naembalia amanu amaꞌangko roti.’ 8Amohatokoomu, mahinggamo kolambuno naꞌa nongahe namanu maka namaꞌane roti mbaꞌinomo doposabhangka, tamaka hampano nokiido naoambano, tetewei kolambuno naꞌa namanu maka namaꞌane kafaraluuno.
9Dadiꞌanomo amohatokoomu, tamesalomo, tetewei damaꞌangko; taꞌondofimo, tetewei poꞌawaane; tamekatengkimo fointo, tetewei dalumengkaangkoe. 10Kapaꞌamo sasuka mesalono naetahima, sasuka meꞌondofino naepoꞌawaꞌao, bhe sasuka mekatengkino fointo dalumengkaane.
11Nandoo bhahaa ne olotamiu itu seemie ama ane anano nesalo kenta tanowaꞌao ule so kalolino? 12Tawa ane nesalo unteli tanowaꞌao waꞌati-atikoho? 13Dadiꞌanomo sanginomo hintimiu mie modai pandemoomu waꞌaoꞌomu metaaꞌano ne anamiu, bhemo toha Amamiu te surugaa! Anoa namaꞌao Rohino ne laꞌae maka dua mesaloiꞌe.”
Yesus bhe Beelsebul
11:14-23
Mat 12:22-30; Mrk 3:22-27
14Sewakutuu Yesus nefolimba seetani mefekabhongano mie. Salimbano seetani anaꞌa, mie bhonga aitu nopandemo netula-tula sampe mie bhahi tadomente. 15Tamaka nandoo mugauno, “Anoa ini nefolimba seetani nopake kuasano Beelsebul, Kafeompuꞌandomo seetani.”
16Nandoo dua mesalono ne Yesus namotiwohaanda tanda tapa mentela so katandaino kuasano nomaiꞌao ne Lahataꞌala, tamaka patudhundo damansoꞌalaiꞌe. 17Tamaka Yesus nopandeꞌaane fekihindoa lasao nopugau ambano, “Ane seꞌonu kakolakiꞌa pae daseꞌise tamaka sadhia dopoewa-ewangi tetewei nabinasa, pedamo dua ane seꞌonu polambu pae daseꞌise tamaka sadhia dopogiha-giha tetewei nahumansuru. 18Dadiꞌanomo ane weo kafopahintaꞌano Kafeompuꞌando seetani pae daseꞌise, dapoewa-ewangi sanea-nea andoa, nada amai naentara dua kafopahintaꞌano seetani naꞌa? Kapugauꞌaku peda anaꞌa, kapaꞌamo ingka ambamiu aefolimba seetani apake kuasano Beelsebul. 19Dadiꞌanomo ane aefolimba seetani apake kuasano Beelsebul, anaguhuꞌimiu depake kuasa laꞌae defolimba seetani? Dadiꞌanomo nehabundo maitu katandainomo kaꞌalano fekihimiu. 20Tamaka ane aefolimba seetani apake kuasano Lahataꞌala, sakotuꞌuno nohatokoomu Kafopahintaꞌano Lahataꞌala.
21Ane mie moꞌosa nosangka bhe ewangano nodhagani lambuno wutono, teteweimo sabhaha fehebuaꞌano natohopo. 22Ampamo kaowu nahumato seemie lumiuꞌe kaꞌosa maka napoewangiane bhe natumaloe, tetewei sabhaha katokano ewangano netangkaꞌaono narumampasie maka sabhaha fehebuaꞌano nerampasino nadumawu-dawue. #11:22 O mie moꞌosa ini kaꞌibahatino seetani; mie tumaloe kaꞌibahatino Yesus.
23Laꞌae tapa pobhaino bhe Idi noewangi kanau. Laꞌae tapa humamba kanau taefohompu mie, mie aitu mehabuno pogasa-gasaꞌando mie.”
Seetani nosuli kundo
11:24-26
Mat 12:43-45
24“Ane seetani nolimba nomaiꞌao ne manusia, tanolilimo ne wite mokekele neꞌondofi kabutuꞌano, tamaka miina naeꞌawaa. Dadiꞌanomo ambano, ‘Naetaa asumuli we lambuku kahunsaꞌaku.’ 25Hato nosuli ne itu, gahaꞌa lambu anaꞌa nonggelamo bhe notifosintuwu. 26Pada anaꞌa nosulikimo sabhangkano dopipitu maka dopesua deate ne itu. Seetani bhaiꞌino maitu dofoliuꞌe dua kadaindo. Panda-pandano mie aitu sedhuluꞌa dua kadahano bhe pakatandano.”
Mie kodawuano mpuu
11:27-28
27Tangasano Yesus nopugau, nokeimo seemie hobhine ne olotando mie bhahi naꞌa, “Nokodawua mpuu hobhine mowoowako bhe motitiko.” 28Tamaka Yesus tanopugau ambano, “Uumbe, tamaka sedhuluꞌa kakodawuando metingkeno bhoasaono Lahataꞌala bhe doangkafie.”
Tandano kumadhadhiano ne anabii Yunus
11:29-32
Mat 12:38-42
29Tangasano dolibu-libue mie bhahi maitu Yesus nopugaumo ambano, “Mie dhamani aini nodai diundo. Andoa desalo seꞌise tanda tapa mentela tamaka paise damaꞌanda ampamo kaowu tandano kumadhadhiano ne anabii Yunus. 30Hampano pedamo anabii Yunus padamo nembali tanda so miendo kota Niniwe, nadamo dua aitu Anano Manusia naembali tanda so mie dhamani aini. #Yun 3:4-5 31Nahumato Oleono Kiama, omputo hobhine maiꞌaono we Salata namai nasiwanuꞌa bhe mie dhamani aini maka namoꞌalada. Kapaꞌamo omputo hobhine aini nomaiꞌao we tompano dhunia nametingke kafoinaꞌu kotimbangino omputo Salomo. Sakotuꞌuno humatono ini noliuꞌe omputo Salomo. #1Raj 10:1-10; 2Taw 9:1-12 32Nahumato Oleono Kiama, miendo Niniwe dasiwanu-wanuꞌa bhe mie dhamani aini maka damoꞌalada. Kapaꞌamo miendo Niniwe dofetingke kaowu bhihita neowano anabii Yunus, dofetompaꞌaomo dhosando bhe dodoli ne Lahataꞌala. Sakotuꞌuno humatono ini noliuꞌe anabii Yunus.”
Kantaleano mbadha
11:33-36
33“Bhe naseemie miina bhe mesulano kantalea maka nahumunsae we wawa tawa nosongkowiane bhengki, tamaka tetewei dohunsae ne kangkailaoꞌano, neanomo sasuka mie mesuano weo lambu damoha tilangano. 34O mata kantaleanomo mbadhamu. Ane netaa matamu, nentaleamo dua mbadhamu; tamaka ane nodai matamu, nohohondomo dua mbadhamu. 35Dadiꞌanomo posiꞌondoomu, bhahasaa nahohondo tilanga ne wutomiu itu. 36Ane mbadhamu nentalea, miinamo bhe mohohondoꞌanoa, maka koseꞌulu-ulumiu nentalea sepaliꞌa, pasae notila-tilakoomu kantalea.”
Yesus nefoꞌala miendo Farisi bhe pande-pande Kitabi
11:37-54
Mat 23:1-36; Mrk 12:38-40; Luk 20:45-47
37Nopalusi nofofoinaꞌu, Yesus nosaliꞌiemo seemie Farisi daomaa se lambuno. Dadiꞌanomo Yesus nokala se lambuno maka nengkoha nohumaa. 38Gahaꞌa miendo Farisi naꞌa tanomente nowoha Yesus tanohumaamo miina naewanu deki ⸤ peda atorano agama⸥ . 39Tamaka Ompu nopugaumo ambano, “Hintimiu miendo Farisi fewaniuꞌomu kundono kampomaaꞌa bhe kampohoꞌuꞌa tamaka we totono lalomiu noponoꞌao kasaohi buku bhe podiu modai. 40Hintimiu bhohe, ingka Lahataꞌala mokonandoono tiwohaꞌano we simbali, Anoamo dua mokonandoono meateꞌano weo totono lalo. 41Ampamo kaowu, iꞌino kampomaaꞌa bhe kampohoꞌuꞌa tabeano podawu-dawuomu dua bhe mie mokae. Ane nada anaꞌa naonggelamo kosasawiꞌae, naetaa mbadhamiu naetaa totono lalomiu.
42Tamaka balaamoomu hintimiu miendo Farisi, kapaꞌamo taꞌolentu-lentuomu pehapimiu mohobuꞌino peda sabhaha kagule #11:42 Sabhaha kagule, sakotuꞌuno: selasi, inggu bhe sabhaha kambulu. feompulu dawueꞌomu maka sedawu gaatiemoomu so kapopanga ne Lahataꞌala. #Im 27:30 Gahaꞌa o kaꞌadhili bhe kaasi ne Lahataꞌala miina konamianeomu. Haa hondano aini tetewei dhalangieꞌomu, tamaka atorano agama koise dua molimpuꞌaneomua.
43Balaamoomu hintimiu miendo Farisi kapaꞌamo weo lambu kasambaheaꞌa moasianeomu sepaliꞌa mengkohaomu ne kaengkohaꞌando kabhala, moasianeomu dua sepaliꞌa dofosibhalakoomu we wuntano daoa. 44Balaamoomu, kapaꞌamo hintimiu nopototo bhe kobuhu tapa kokatandai, mie mangkano te wawono tadofinda-findaꞌimo miina damandeꞌaanea.”
45Seemie pande Kitabi notobhoosimo ambano, “Guru, pugau peda naꞌa ingka fekaꞌaebumo dua bhe insaodi.” 46Tamaka ambano Yesus, “Balaamoomu hintimiu pande-pande Kitabi, kapaꞌamo sabhaha tubho nehabumiu tapeda wowoꞌo mobhie nefotongkumiu ne mie bhaimiu, gahaꞌa wutomiu mongaheomu bhe dumingkueꞌomu. 47Balaamoomu, kapaꞌamo mefekakesaomu kobuhundo ana-anabii, gahaꞌaitu awuaꞌimiu mongkoda. 48Habumiu naꞌa nokomaꞌanaꞌao akuiꞌomu dua podiundo awuaꞌimiu moasianeomu, kapaꞌamo awuaꞌimiu naꞌa mongkono ana-anabii andoa naꞌa maka hintimiu mekakesano kobuhundo. 49Dadiꞌanomo Lahataꞌala kotimbangino nokobhoasao ambano, ‘Aetudu ana-anabii bhe rasuluꞌi dakumala se andoa, sigaꞌa damongkoda bhe damodee-deeda.’ 50Kanandooꞌano peda anaꞌa neanomo mie dhamani aini damotongkuanda kaꞌala defolimba heando kosasawindo anabii mpini pakatifokonandoono dhunia. 51Maꞌanano notanda ne katipongkoꞌano Habel ampa ne katipongkoꞌano Zakaria, nepongkondo ne kadeteno Lambuno Lahataꞌala ne olotano medha kaefoampeꞌa bhe Boloku mongkilo. #Habel Kej 4:8; Zakaria 2Taw 24:20-22 Amohatokoomu dua, kosasawiꞌae kaꞌala naꞌa damotongkuandae mie dhamani aini.
52Balaamoomu hintimiu pande-pande Kitabi, kapaꞌamo hintimiu mintahano kunsino fointono kapande ⸤ maꞌanano kafoinaꞌu so dasumalamatiꞌao⸥ . Gahaꞌa wutomiu kiido mesuaꞌomu bhe mie moindalono mesuano onto-ontomidaomu.”
53Nokala kaowu nomaiꞌao ne itu pande-pande Kitabi bhe miendo Farisi dopoewangianemo sepaliꞌa bhe doangka-angkafiane kansuhu sabhaha kafeena. 54Patudhundo dakumabua alano wambano, somo tingkundo dahumakoe.
Voafantina amin'izao fotoana izao:
Lukas 11: mnbSD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022, Wycliffe Bible Translators, Inc. All rights reserved.