Lukas 12
12
Kafoinaꞌu kafepuuni so anaguhuꞌino Yesus
12:1-12
Mat 10:19-20, 26-33
1Wakutuu anaꞌa nehewundo mie dopohato-hatomo tadopogua-guamo. Yesus netandakimo nofofoinaꞌu, kabhao-bhaono nopugaumo ne anaguhuꞌino ambano, “Posiꞌondoomu bhe kodhagaomu ne ragindo miendo Farisi, maꞌanano kafehaaꞌulando. 2Kapaꞌamo kosasawiꞌae tifebuniꞌano damotiumbae, sabhaha tisongkowiꞌano dalumengkae. 3Dadiꞌanomo pugaumiu kohondoꞌa natifetingke ole-oleo, nepokamuntuiꞌaomiu weo boloku damolelee ne mie bhahi.
4Hintimiu sabhangkaꞌiku, amohatokoomu, koise moteꞌiomu ne mepongkono mbadha, hampano namada anaꞌa paemo daeafa-afaa. 5Amohatoangkoeꞌomu so nemoteꞌimiu. Moteꞌiomu Lahataꞌala, kapaꞌamo pada nofopongko, nokokuasa dua nofoꞌoho we narakaa. Kotu-kotuꞌu amohatokoomu moteꞌiomu ne Anoa.
6Ingka dopandeꞌaanemo o rone doasoe lima ulu haa dhoi, tamaka mahinggamo peda naꞌa bhe naseꞌulu miina bhe nemolimpuꞌaono Lahataꞌala. 7Hintimiu itu bhemo wuluno fotumiu dopadae doꞌeapie. Dadiꞌanomo koise moteꞌiomu, noliuꞌe kakofahalaamiu bhe kawaindo rone.
Koemo doteꞌi dopugau doangkafi Yesus
12:8-12
Mat 10:32-33, 12:32, 10:19-20
8Amohatokoomu, laꞌa-laꞌae pugauno ne wisendo manusia putae noangkafi Idi, Anano Manusia, asumakusiiane dua te wisendo malaꞌekatino Lahataꞌala. 9Tamaka laꞌa-laꞌae gumagano ne wiseno manusia putae anoa miina namangkafi Idi, agumagaiꞌe dua ne wiseno malaꞌekatino Lahataꞌala. 10Ane o mie nopahampugau noewangi Anano Manusia, natiꞌamponi; tamaka ane dopahampugau dofekaꞌaebu Rohino Lahataꞌala paise natiꞌamponia.
11Ane daowakoomu weo lambu kasambaheaꞌa dabhitahakikoomu, ne wisendo pamarinta tawa ne wisendo kabhala, koemo nekenda-kenda handamiu bhahaꞌi nada amai potunduꞌao wutomiu tawa pugauꞌaoꞌomu ae. 12Kapaꞌamo wakutuu aitu dua namoinaꞌukoomu Rohino Lahataꞌala o ae so nepugauꞌaomiu.”
Kapalendano mie hangkaea kumabhohe-bhoheno
12:13-21
13Nopugau seemie ne olotando mie bhahi naꞌa ne Yesus ambano, “Guru, fohato kanau isaku nadumawu kanau dua kahunsaꞌaono ama mani.” 14Tamaka Yesus tanotobhoosi ambano, “Lamoꞌane, laꞌae bhahaa sumangke kanau so bhitahakikoomu tawa so dumawuno kahunsaꞌaomiu?” 15Ambano toha Yesus ne mie bhahi, “Posiꞌondoomu bhe kodhagaomu ne sabhaha kakadau-dau, kapaꞌamo mahinggamo mie napontalabhi-labhi kahangkaeano, dadino miina naeate ne kahangkaeano naꞌa.”
16Pada aitu nopugaumo nepakeanda kapalenda ambano, “Nandoo seemie hangkaea, pehapino witeno nopontalabhi-labhi. 17Nokodukumo lalono, ‘Aeafamo bhahaa, ingka miinamo bhe lambu so katihompuꞌano pehapiku ini?’ 18Ambano toha mie anaꞌa, ‘Nada ini so nehabuku. Ahumunggada bhantea kaehompuꞌaku pehapi ini maka aefoehe guda sedhuluꞌano kabhalaꞌi, ne itumo so katihompuꞌano kosasawiꞌae paeku bhe sabhaha fehebuaꞌaku. 19Mada aitu amugaumo ne wutoku, ‘Hintu itu nobhahimo kanandoomu, tanekanta-kantawumo pae bhe kawoloa ntini taꞌu-taꞌu. Fewuleꞌo toha, humaa fohoꞌu, fekataaꞌi namisimu!’ ’ 20Tamaka Lahataꞌala nokobhoasaomo ne mie anaꞌa, ‘Hintu mobhohe, alo aini dua inawamu damalaemo, maka kanandoo nefontaa-ntaamu itu so laꞌae bhahaa?’ 21Nadamo aitu so netompaloino mie mefoꞌonuno kahangkaea so wutono, tamaka miina nahumangkaea ne pomatano Lahataꞌala.”
Kamihino lalo
12:22-34
Mat 6:19-21, 25-34
22Yesus nopugaumo ne anaguhuꞌino ambano, “Dadiꞌanomo amohatokoomu, koise nomihi lalomiu ne kadadiꞌamiu bhahaꞌi momaaꞌomu ae, koise dua nomihi lalomiu ne mbadhamiu bhahaꞌi mepakeomu ae. 23Ingka noliuꞌe dadi ini bhe oti, noliuꞌe dua mbadha bhe pakea. 24Soba feꞌo-feꞌondoomu kaa maitu, miina dahumooa miina dakumapea, miina dua dakobhantea tawa o aꞌu so kaefoꞌonuꞌano pehapi, tamaka nopakandeda Lahataꞌala. Ingka foliuda hintimiu bhe kaꞌuhi lumolano maitu. 25Laꞌae bhahaa ne olotamiu itu hampano kamihino lalo namooli namodhulu dadino naseendai kaowu? 26Dadiꞌanomo ane giu mohobuno pedando naꞌa pae mondoiꞌeomu mehabuomu, noafa nomihiꞌao lalomiu ne giu sigaoꞌano?
27Soba feꞌo-feꞌondo kambeano kuni, miina dakumahadhaa, miina dua damoohu. Tamaka omputo Salomo foliuno kahangkaea maitu, pakeano miina naehatoa ne kakesano kamba-kamba aitu! #1Raj 10:4-7; 2Taw 9:3-6 28Kahoku tumumbuꞌano we pada oleo itu, namentae datumawuemo. Sanginomo kahoku maitu nolegasiemo Lahataꞌala, bhemo toha hintimiu. Kakuhano dua kaparasaeamiu! 29Dadiꞌanomo koise fekihiomu kansuhu o ae so nehumaamiu, o ae so nefohoꞌumiu pakade koise nekenda-kenda handamiu. 30Kosasawiꞌae naꞌa nefosibhalandomo sabhaha bansano liwu ne dhunia ini tapa mandeꞌaono Lahataꞌala. Tamaka Amamiu nopandeꞌaane kosasawiꞌae naꞌa ingka faraluuꞌeomu. 31Ampamo kaowu ondofiomu kadeki Kafopahintaꞌano Lahataꞌala maka kosasawiꞌae kafaraluumiu naꞌa namaꞌangkoeꞌomu dua.
32Hintimiu pata bhabhahino, koise moteꞌiomu! Kapaꞌamo Amamiu nopoindalomo nosangkekoomu so mieno Kafopahintaꞌano. 33Asopieꞌomu fehebuaꞌamiu maka dhoino waꞌandae mie mokae! Mehabuomu kadu-kaduno dhoi so tapa molusaꞌano, maꞌanano kahangkaea te surugaa tapa mowoowolono. Kahangkaea anaꞌa paise nahumatoe kasibu, paise dua naomaaꞌe faa. 34Kapaꞌamo ne amai kanandooꞌano kahangkaeamiu, ne ituꞌaemo dua totono lalomiu.”
Bhatua sadhia mantaa-ntaano
12:35-40
35Ambano toha Yesus, “⸤ Naetaa meate mantaa-ntaaꞌomu so kahatoꞌaku⸥ . Sadhia mekawaweomu bhe kantaleamiu sahende, 36peda mie ntumaa-ntaano kafeompuꞌando nomaiꞌao we hame-hameno kagaa. Ane nasumuli kafeompuꞌando naꞌa maka naekatengki fointo lasao dalumengkaane. 37Dokodawua mpuu bhatua nehatofino kafeompuꞌando nandoo demboto bhe dodhaga. Amohatokoomu, kotu-kotuꞌu kafeompuꞌa aitu nalumoli pakeano maka napugauanda bhatuano naꞌa daengkoha bhe naetaganaanda daomaa. 38Ane nahumato kafewuntaꞌino alo tawa namaꞌo kamentae maka nahumatofida dodhaga, dakodawua mpuu bhatua andoa maitu. 39Tamaka naetaa mandeꞌaaneomu, ane kolambuno namandeꞌaane hambi seꞌae so hatoꞌano kasoꞌo, teteweimo pae tanakumatahomoa lambuno dalumeloe. 40Dadiꞌanomo hintimiu mantaa-ntaaꞌomu dua, kapaꞌamo Anano Manusia nahumato ne wakutuu pata nepotu-potuluꞌao.”
Bhatua motuhuno lalo bhe tapa motuhuno lalo
12:41-48
Mat 24:45-51
41Nopugaumo Petrus ambano, “Ompu, patudhuno kapalenda naꞌa so insaodi kaa so kosasawindo manusia?” 42Ambano Ompu Yesus, “Kaowu laꞌae bhahaa mie mandeꞌaono lambuno kafeompuꞌano motuhuno lalo bhe kotimbangino maitu? Anoamo maitu so nesangkeno kafeompuꞌa so neangkando kosasawindo bhatua so metaganaanda daomaa napobutu bhe tempono. 43Nokodawua mpuu bhatua naꞌa ane nohatofie kafeompuꞌano tangasano noalaꞌi gunano. 44Amohatokoomu, kotu-kotuꞌu kafeompuꞌa naꞌa nasumangke bhatua aitu somo mandeꞌaono sabhaha fehebuaꞌano. 45Ampamo kaowu ane bhatua naꞌa nokoduku we lalono, ‘Ingka kafeompuꞌaku nandoo naompona maka nasumuli’, maka namepekimo bhatua sigaoꞌano namoꞌane nahobhine, naomaa bhe naohoꞌu sampe nalolanu. 46Gahaꞌa kafeompuꞌano tambaꞌomo nahumato ne oleo tapa nepotu-potuluꞌao, ne tempo tapa nenamu-namu. Bhatua anaꞌa namehaakebhae, kahukumu napototoane bhe mie pata meangkano ne Lahataꞌala. 47Seemie bhatua mandeꞌaono kapoindalono kafeompuꞌano tamaka miina namantaa-ntaa tawa miina nadhumalangiea, naobhahi naeꞌawa kabhebhe. 48Tamaka seemie bhatua tapa mandeꞌaono kapoindalono kafeompuꞌano maka nehabu kaꞌala sampe nopantasimo dabhebhee, seendai naeꞌawa kabhebhe. Kapaꞌamo mie metahimano nobhahi, naobhahi dua datumuntue; mie neposahunaꞌaono nobhahi, naobhahi dua so nesonso ne anoa.”
Yesus neowa kapowengkeꞌa
12:49-53
Mat 10:34-36
49“Hatoku ini aeꞌoho efi we dhunia ini; gaoku mpuu efi aini nohendemo! 50Idi ini tetewei aenamisi kakadee-dee, #12:50 Sakotuꞌuno: o kakadiu. nosabha sepaliꞌa handaku ane paeꞌo namalusi kakadee-dee anaꞌa. 51Kunaꞌemiu hatoku ini aeowa pometaa te dhunia ini? Miina sepaliꞌa! Amohatokoomu, suano pometaaꞌa, tamaka powengke-wengkeꞌa. 52Kapaꞌamo notanda aitu, ane dolidima weo polambu dapowengke-wengke, totoluno damewangi hoduano, hoduano damewangi totoluno. 53Amano namewangi anano moꞌane, ana moꞌane namewangi amano. Inano namewangi anano hobhine, anaꞌi hobhine namewangi inano. Kamungkula hobhine namewangi poniano hobhine, ponia hobhine namewangi kamungkulano hobhine.”
Damandeꞌao tandano dhamani
12:54-59
Mat 16:2-3
54Yesus nopugaumo dua ne mie bhahi maitu ambano, “Ane wohaomu olu nofoni we bhaha lasao pugauꞌomu, ‘Ingka nakoꞌuse’, maka kotu-kotuꞌu nokoꞌuse. 55Ane wohaomu kawea nofinda salata, ambamiu, ‘Naombena oleo seꞌoleo itu’, maka kotu-kotuꞌu nombena. 56Hintimiu mie mehaaꞌulano! Tanda-tanda te lani bhe we dhunia pandeꞌaane maꞌanakieꞌomu. Koasimo dua miina mandeꞌaane maꞌanakiomu tanda kumadhadhiano ne dhamani aini!
57Koasiꞌamo dua miina mondoiꞌeomu mebhotusiꞌaoꞌomu wutomiu medando ae kumotuꞌuꞌano? 58Kapaꞌamo ane bhe so mobhieangko te wiseno kabhala, ulei lalomu pometaaꞌane tinangke we laano sala. Ane paise kaewamu itu nabuluko ne wisendo pande bhitaha, maka pande bhitaha naꞌa namowako ne limano dhagano katohongku maka anoa naꞌumohoko weo katohongku. 59Amohatokoomu, kotu-kotuꞌu paise sepaliꞌa damolimbako ane paeꞌo momeaꞌe kosasawiꞌae dosamu.”
Voafantina amin'izao fotoana izao:
Lukas 12: mnbSD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022, Wycliffe Bible Translators, Inc. All rights reserved.