Matius 7
7
“His en wene is pema enebam po erlak,” oluk, moʼgulentesi wene
(Lukas 6:37-38, 41-42)
1Asogo moʼgulentesirik e, mesik disogo moʼgulentesi,
“At Allah en wene henebam poluk wiagaphonobuano oluk e, his en aphwami pema wene enebam poluk wiagabonobogup o. 2His en wene is pema enebam pogu legep ai ʼgelaʼge, at Allah en ogo asogoat wene henebam pouwa o. Ye, his en elit aʼge walholuk is pema wogontogu legep ai ʼgelaʼge, at Allah en elit aʼge ai pam walsogo wokhontouwayat o. 3His honuʼgwarek henil pam e ʼgong ʼbelak aʼge walurak on ano re, ʼgwelakho erlakma en de, is henarilak honorokhwi pema enil mokmuk wei aʼge ʼgoluk oruak aʼge ano paget nak e, wokhouwogoluk ningsogo ʼgwelagontogu legep ai nopaget. 4Honuʼgwarek henileʼgenma e ʼgong lok aʼge walurak welat e, henarilak honorokhwi ai moʼgulontogulat,
Hil mokmuk ʼgwegei aʼge ai wokhiaik, oluk ningsogo u no? 5Henagap pam nak op ʼgelaʼge welat henede ʼbiren yema re! Honuʼgwarek henileʼgenma e ʼgong lok aʼge ai naduk wokholuk en de, henil ano arat dek oso holuk e, pobuk henarilak honorokhwi enil mokmuk oruak aʼge ano elirat wokho yo,” oluk moʼgulentesi.
6Asogo moʼgulentesirik e, mesik disogo moʼgulentesi,
“Allah akhit pogwi aʼge ano mene wogogwiam pobuk lagaksogo iak en ʼbalhenebisomano oluk, wogorogup o. Ye, henalli aʼge op oʼgo aʼbik aʼge ai, wam wogogwiam oyuk en lologun-lelagansogo hwikhouwano oluk, wogorogubat o,” oluk moʼgulentesi.
Allah ʼgonu ogwiam esaʼgo hweliso wene
(Lukas 11:9-13)
7-8Asogo moʼgulentesirik e, mesik disogo moʼgulentesi
“Is aphwami enebe loʼbok en Allah ʼgonu moʼgulogwiam e, at en enebe loʼbok wogentasu nak o. Ye, is logon enebe loʼbok en di aʼge yu aʼge at ebam horotogwiam e, enebe loʼbok hwiakhorlogwi nak o. Ye, is nin logon enebe loʼbok en ʼgoduk puk puk hogwiam e, at en enebe loʼbok ʼgoduk hurentasu nagat o. Ai en e, his e, Allah ʼgonu moʼgulogu lomup o. Moʼgulummu re, wokhontouwayat o. Op aʼge at ebam heratogu lomup o. Heratogulomma re, hwiakhwerlagubat o. Ye, ʼgoduk puk pugat hogu lomup o. Puk puk hogolomma re, at en ʼgoduk huthontouwayat o. 9His pema heneiyagai en,
Soʼboru roti aʼge nele o, ogwi holuk, enaiklak en e, helep aʼge wogontogu legep no? 10Ye, at e,
Hiane nele, ogwi holuk, ʼgosu aʼge wogontogu legep no? Erlagat o. 11His henebabut wiak togu legep aʼgeat de, eneiyagai op aʼge wogontogwi ai henalukmu re, op aʼgeat wogontogu legep o. Ai ʼgelaʼge re, henaik Allah ʼbogorl pam aʼge ai re, ʼgonu moʼgulorogup aʼge modok op aʼge wogontouwa erlak no? Wogontouwayat o. 12His honogola en,
Is logon en, disogo taknenebelep e, oluk opogu legep ai ʼgelaʼgeat, his en is ai asogoat tagonobogu lomup o. Wene Allah en Musa yoʼgo poluk nenesaʼgo weregei wene ai emin, is Allah en yoʼgo enebasuam iak moʼgulontogu legesa wene ai emin, laʼbolik logo re, aiat o,” oluk moʼgulentesi.
“Ebela wei oʼgwe ai ʼgwi lit o,” oluk moʼgulentesi wene
(Lukas 13:24)
13Asogo moʼgulentesirik, mesik disogo moʼgulentesi,
“Wiakma nal lai lagai ai, ʼgoduk emde ʼbelak ai logat o. Ye, ebela ebe yogoʼgwe lagai ai ebe logatma re, aphwami aʼbigat ʼgogwi o. Ai en e, his ebela wei ʼbeterak aʼge yogo oʼgwe ai pamat ʼgwi lit o. 14Ebela op oʼgwe lagai aʼge ai re, ʼgoduk emde ogo weiyat. Ye, ebe lagai ai modok ʼbi-ʼbeterakma no oluk e, aphwami aʼbik ʼgwi lo mia en e, enebe wei nagat ʼgogwi o,” oluk moʼgulentesi.
Eniak eseiyat lalonobogwi wene
(Lukas 6:43-44)
15Asogo moʼgulentesirik, mesik disogo moʼgulentesi,
“Is logon en eniak eseiyat, Allah iak moʼgulontogwi aʼge ʼgelaʼge heneʼbek wagalat e, honogola ʼgagaluano oluk, henebabut heberlogo welemis o. Is ai onorogole re, wam domba wam ena aʼge orogole ʼgelaʼge takpoluk en wema aʼgeat de, enedemu re, mene orlomene anni aʼbik aʼge ʼgelaʼge wema o. 16Di agan yu agan eʼgen egesiso ai pam, edip enagat ago ai ʼgelaʼge, is en takhonobouwa ai pam, enebabut enagat ema o. Molip orlok wiak aʼgeat de, eʼgen e, herle anggur op aʼge eʼgen ʼgelaʼge egeikmu daganogwi no? Ye, at e, herle mul orlok wiak aʼgeat de, eʼgen e, e ara op aʼge eʼgen ʼgelaʼge egeikmu daganogwi no? Erlak o. 17E op aʼge holuk e, eʼgen ogo, op aʼgeat oso yo. Ye, e wiak aʼge holuk e, eʼgen ogo wiak aʼgeat oso yo. 18E op aʼgeat de, eʼgen e, e wiak aʼge en eʼgen egesu ʼgelaʼge mesik egesu re, erlak o. Ye, ai ʼgelaʼge re, e wiak aʼgeat de, eʼgen e op aʼge eʼgen egesu ʼgelaʼge mesik egesu re, erlak o. 19Di agan yu agan eʼgen op aʼge egesiso erlak aʼge ai re, edip mukho re, odoukmu modok hwikhai lagai o. 20Ai gelaʼge re, is aphwami asogo takhonobouwa ai pam, enebabut enagat ema o,” oluk moʼgulentesi.
“Hegitsogo tu pukmu en de, enemde pam en nak umu re, opma ʼgwi louwa erlak o,” oluk moʼgulentesi wene
(Lukas 13:25-27)
21Asogo moʼgulentesirik, mesik disogo moʼgulentesi,
“His aphwami en, an moʼgulnogulat e,
Nonue, nonue, oluk ogu legep ai pam henebe ʼberlegat, an naik ʼbogorl pam aʼge eragam enebasumu eba ʼgwi lagup erlak o. We, is pema, at Allah ogola epasu aʼge hegitsogo togwi aʼge aiat ʼgwi louwa o. 22O ologun pam ema ai erlige re, aphwami aʼbik neʼbek wemarik e, disogo moʼgulnema o,
Nonue o. Nis e, hat honuk pam wene op wene moʼgulontogulat, muʼgat ebabut wiak aʼge aphwami onogola ʼgwigisarik oruakma henokho lebikpogulat, tu puk aʼge elalinat aʼbik tugulat, til denaga lege ebano erlak no? oluk ua aʼgeat de, 23an en ʼbaksogoat disogo moʼgulentaik o,
His henebe an neperlak o. Wiak modok til denaga legep aʼge ai neragam ya wolorogup o. ʼBogolit o, oluk moʼgulentaik o,” oluk moʼgulentesi.
“Ap enebe ʼbiren en o werigisa,” oluk ebam elitsogo moʼgulentesi wene
(Lukas 6:47-49)
24Asogo moʼgulentesirik, mesik disogo moʼgulentesi,
“Holuk e, sa en, an niak ai esaʼgo hwelak poluk, hegitsogo tago holuk e, at en yu ʼgelaʼge tua o. Ap mesik ede oruak aʼge en o helep pam louksogo weregeimu, 25moru aʼbik ʼbu agalat, ik ebe aʼbik wagalat, yasobu aʼbik punhau wagalat, tegei ʼgal e, o ano helep pam louksogo weregeimu no oluk e, orloʼbuksogo lo erlak mo egei ai ʼgelaʼgeat tua o. 26Aʼge re, ap sa en an niak ai esaʼgo hweliselarat de, hegitsogo tago erlak holuk, yu ʼgelaʼge tua o. Ap mesik ede erlak aʼge en o ik ʼberlik pam louksogo werik polukmu, 27moru aʼbik ʼbu agalat, ik ebe aʼbik wagalat, yasobu aʼbik punhau wagalat, tagalat, o ano erleʼgalogo ʼbou tegeimu moluk-melaksogo re, wiagaregei ai ʼgelaʼgeat o,” oluk moʼgulentesi.
Enesaʼgo hweligisarik e, erliktigisa wene
(Markus 1:22; Lukas 4:32)
28-29Yesus en wene asogo il waga lagarik wene ologun wusogo egeimu re, is aphwami aʼbik ebano en e,
“Eige! Wene egei ai, is ap Allah iak pelal wogo eiye aʼge en moʼgulnontogwi ʼgelaʼge oso erlak o. We, at en e, wene ebe eiye aʼge en u ʼgelaʼge egei ai, nonogorlok e!” oluk erliktigisa.
Voafantina amin'izao fotoana izao:
Matius 7: WUL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra