Yohana 13
13
Yesu A Saal Naa Bɛtɔ Mɛlalɨ Gǝnɨ
1Nǝn kwama Dikulom Yabtǝmɔ a dwamaɨ, Yesu a kwɛl a nyǝm kwama gǝnɔ a la, wʊnɨ gǝ bǝla yooli nɨ lɛɨ, sǝ gǝ yǝla a daa Tɛtɛ woi. Yesu a swɨ nǝbam gǝnɔ a yooli nɨɨ, a nʊng ji swɨtǝm gǝnɔ a yɔ nǝn a dɨltǝm.
2Nǝn kwama Yesu jǝbɔ bɛtɔ mɛlalɨ gǝnɔ jǝ ja jǝjalǝn kumɔ lɛɨ, Mammɔ a kwɛl a dɔ mʊgɔ nǝl Yahuza Iskariyotii, bʊla Saminui, sǝ a lungto Yesu. 3Yesu a nyǝm Tɛtɛ a kwɛl a dǝg kanjǝlɔ gwam a kang gǝn. A nyǝm tag gǝ jel a daagɔ Kwaama woi, n daagɔ Kwaama woi gǝ yǝla gǝ shu lɛ woi. 4Kwama jǝ jam jǝjalǝnɔ lɛɨ, nǝngɔ a gun a jǝgǝm bɛllɛ gǝnɨ, nǝngɔ a do bɛ dwangɔ a bwa a kʊngɨ. 5Nǝngɔ a tal mwɛmɔ a mʊgɔ gʌmshii, a tǝl saaltǝm naa bɛtɔ mɛlalɨ gǝnɨ, waam naa jinɔ lɛ nǝn bɛ dwang nɨ a bwa a kʊng gǝnɨ. 6A bɛ a daa Bitrus woi, nǝngɔ Bitrus a sʊwa gǝn gɔ, “Tɛlalɔ, nǝmɔ mʊ saal mɨ naa lɛɨ ka?”
7Nǝngɔ Yesu a jǝla gǝn gɔ, “Kǝngkǝnɨ mɨsɔ mʊ nyǝm jʊ nɨ lɛ mǝ maa lɛɨ. Nǝn gul mʊ nyǝm nyǝm.” 8Nǝngɔ Bitrus a sʊwa gǝn gɔ, “Mɨsɔ mʊ saal mɨ naatɨn lɛ wo.” Nǝngɔ Yesu a jǝla gǝn gɔ, “Na mǝ saal mʊn bɔ naatɨn mʊnɨ, mʊ ke bɔ a mɨ.”
9Nǝngɔ Bitrus a sʊwa gǝn gɔ, “Tɛlalɔ, ke bɔ naatɨn mɨ kwaagɔ! Saal kangtɨn mǝndɨ jǝbɔ dul mǝndɨ gwam.” 10Yesu a sʊwa gɔ, “Na nǝl a yʊ bʊtɔ gǝnɔ mwɛɨ, a yǝlam sagsagɨ, mɨsɔ yʊ kaa mwɛ lɛ tag, gǝ saalǝm ka naatɨn gǝn. Jǝ́ sagsag, ke bɔ pʌd jenɔ.”
11Yesu a kwɛl a nyǝm nʊ nɨ lungto gǝn nɛɨ, n jʊ a bwɨ a sʊwa ji gɔ, “Ke bɔ gwam jenɔ jǝ́ sagsagɨ.”
12A dɨ saaltǝm naatɨn jini, nǝngɔ a mal bɛllɛ gǝnɨ, a yǝla a shu a daa yɨm gǝnɔ gǝmɨ, nǝngɔ a bʌ ji gɔ, “Jǝ́ nyǝm jʊ nɨ mǝ maa jemi ka? 13Jǝ́ jo i gɔ ‘Feyi’ jǝbɔ ‘Tɛlalɔ.’ N dǝngdǝng. Mǝ na nyɔ. 14Kanga mǝ nǝn Tɛlalɔ jen jǝbɔ Nǝ Mɛlalɨ jeni, mǝ saal jem naatɨn jeni, jen tʌjen a yǝlam nyɔ ya jǝ́ saalka naa jenɔ lɛ. 15N jǝ nʊngtǝm mǝ nʊng jeni, sǝ ya jǝ́ maa lɛ nyɔ, kanga mǝ maa jemi. 16Bɨlǝngkɛl mǝ sʊwa jen nɛɨ, bwɛ jwaalɛ mɨ gǝ laa tɛlalɔ gǝnɔ lɛ. Bwɛ twama mɨ gǝ laa nʊ nɨ lɛ a twam gǝnɨ. 17Kǝngkɔ jǝ́ nyǝm kanjǝl nɨɨ, jǝ́ nya nya bwili na jǝ́ maa jii.
18“Ke bɔ a dul jen pʌd mǝ sʊwa kɛl nɨ lɛɨ, n nyǝm nǝbɔ mǝ jǝgamɨ. A bwɨ nyɔ sǝ a yii mʊlalɨ kɛl nɨ gɔ, ‘Nʊ nɨ ja jǝjalǝn mǝndɨ lɛɨ, a gun tʌgo a mǝ gǝm.’
19“Kǝngkǝnɨ mǝ sʊwa jen sʊwa sǝla jʊ nɨ a bwɨ, sǝ na ba bwɨɨ, jǝ́ nǝ bɨlǝngkɛl jengɔ nǝmǝ mǝ gɔ. 20Bɨlǝngkɛl, mǝ sʊwa jen nɛɨ, nʊ nɨ a yo nʊ nɨ mǝ twamɨ, a yo i. Nʊ nɨ a yo ii, a yo nʊ nɨ a twam ɨɨ.”
Yesu A Sʊwa Gɔ Jǝ Lungto Gǝn Lungto
(Mat 26:20-25; Mar 14:17-20; Luk 22:21-23)
21Kwama nɨ Yesu a sʊwa kɛl nɨ nyɨɨ, a do a nǝl gǝnɔ a tuu, nǝngɔ a jel a talɨ a sʊwa gɔ, “N bɨlǝngkɛl mǝ sʊwa jen nɛɨ, win a kʊm jen lungto i lungto i.”
22Nǝngɔ bɛtɔ mɛlalɨ gǝnɔ ja dʌngkoi, ja nyǝm bɔ bwɛ mɛlalɨ nɨ Yesu sʊwa kɛl lɛ a dul gǝnɨ. 23Win a kʊm bɛtɔ mɛlalɨ gǝnɔ wʊnɨ Yesu swɨ lɛɨ, yǝm a kɔtʌgo a Yesu gǝm, 24nǝngɔ Bitrus a sʊwa gǝn kɛlɔ nǝn kangɨɨ gɔ ga bʌ Yesu, a sʊwa ji nʊ nɨ gǝ sʊwa kɛl lɛ a dul gǝnɨ.
25Nǝngɔ bwɛ mɛlalɨ nɨ a bɛ nǝn dɔɔm a daa Yesu woi, a bʌ gǝn gɔ, “Tɛlalɔ, nuwo nyɨɨ?”
26Nǝngɔ a jǝla gɔ, “Mǝ dǝg dǝg kʊkkʊm nɨ a mʊgɔ taasa. Nʊ nɨ mǝ nǝ gǝnɨ, n nʊ gɔ.” Nǝngɔ Yesu a do kǝlɨ kʊkkʊm nɨ a dǝg a mʊgɔ taasaɨ, nǝngɔ a nǝ Yahuza bʊla Saminu Iskariyotii. 27Yotǝm kǝlɨ kʊkkʊm nɨ a kang Yesui, nǝngɔ Mammɔ a dɔ gǝnɨ. Nǝngɔ Yesu a sʊwa gǝn gɔ, “Jʊ nɨ mʊ swɨ maatǝmɔ lɛɨ, maa yagɨ yagɨ.” 28A mʊgɔ nǝb nɨ jǝ ja jǝjalǝn nɨ lɛɨ, mɨ nǝn nʊ nɨ a nyǝm jʊ a bwɨ Yesu a sʊwa gǝn nyɨɨ. 29Nǝn Yahuza ta bǝla kemʌn jinɔ lɛɨ, kaamɨ nyǝma lɛ gɔ Yesu gǝ sʊwa gǝn gɔ ya ga ten jim kʊkkʊm dikulom, na mɨ nyɨɨ, ga nǝ nǝb bʊnǝnɔ gǝm kaa jǝl. 30Yahuza a yo kǝlɨ kʊkkʊm nɨɨ, nǝngɔ a jel a yoolii, kwamagɔ kumɔ a fi.
Swatǝm Yaa Fɨgɔ
(Mat 26:31-35; Mar 14:27-31; Luk 22:31-34)
31Kwama nɨ Yahuza a jelʌmi, nǝngɔ Yesu a sʊwa gɔ, “N kǝngkɔ jǝ nǝ Bʊla Nǝlɨ dʊʊlǝn nɛɨ. N daa gǝ woi Kwaama nya dʊʊlǝn nɛɨ. 32Na Kwaama a nya dʊʊlǝn a kɛl dul gǝnɨ, Kwaama nǝ nǝ Bwɛ dʊʊlǝn a kɛl dul gǝn. Mɨsɔ ta bʊtɔ lɛ, nya nya dʊʊlǝn.
33“Jen jǝ́ bɛtɔ dwalǝn mǝndɨ, a bǝla kumtɨnɔ nǝn dǝm nyɔ mǝ na lɛ nǝbɔ jeni. Jǝ́ saa ɨ saa ɨ, mɨsɔ jǝ́ nya ɨ lɛ. Mǝ sʊwa jen nɛ kǝngkɔ, kanga mǝ sʊwa Yahudawagɔ mǝʊ, ‘Daa nɨ mǝ yilomi, mɨsɔ jǝ́ dwal lɛ jǝ́ yɔ wo.’
34“N diil fɨ mǝ nǝ jen nɛɨ, bɛ jǝ́ swɨka a kʊm jen, kanga mǝ swɨm jen nɛɨ, jen tʌjen bɛ jǝ́ swɨka nyɔ a kʊm jen. 35Na jǝ́ maa swɨkatǝm lɛɨ, n daagɔ nǝbɔ gwam nyǝm lɛ gɔ jǝ́ bɛtɔ mɛlalɨ mɨɨ.”
Bitrus Kana Kana Nyǝmtǝm Yesui
(Mat 26:31-35; Mar 14:27-31; Luk 22:31-34)
36Nǝngɔ Bitrus a bʌ Yesu gɔ, “Tɛlalɔ, mʊ yi a fee?” Yesu a jǝla gǝn gɔ, “Daa nɨ mǝ yilomi, mɨsɔ mʊ dwal lɛ ń bwang mɨ kǝngkɔ. Na nǝn guli mʊ bwang mɨ bwang.” 37Nǝngɔ Bitrus a sʊwa gǝn gɔ, “Tɛlalɔ, n wɛ bwɨ mɨsɔ mǝ dwal lɛ n bwang mʊn kǝngkɨɨ? Mǝ nǝ nǝ kʊlɨ mǝndɨ a kɛl dul mʊ.” 38Nǝngɔ Yesu a jǝla gǝn gɔ, “Bɨlǝngkɛl, mʊ nǝ nǝ kʊlɨ mʊnɔ a kɛl dul mɨ ka? Bɨlǝngkɛl mǝ sʊwa ń nɛɨ, mʊ kana kana nyǝmtǝm mǝndɨ naagɔ taal sǝla kwalɨ jangagɔ a ma kamɨ.
Voafantina amin'izao fotoana izao:
Yohana 13: DBD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©️2024 Luke Initiative for Scripture Translation