Asa 18
18
I Paoly tao Kôrinto
1Taorian’izany, dia tafala tao Atena i Paoly ka tonga tany Kôrinto#18.1 I Kôrinto dia renivohitry ny faritany Akaîa. Tanàna be mponina sady nahitana karazan’olona samihafa, noho izy foibe ara-barotra nanan-tseranana anankiroa; nefa nalaza ratsy ihany koa noho ny fahalòvan’ny fitondrantenan’ny olona mbamin’ny fanompoana an’ilay andriamanibavy atao hoe Afrôdita.. 2Hitany tao ity Jiosy atao hoe Akoilà izay teraka tany Pônto; vao tonga avy any Italia i Akoilà mbamin’i Prisila vadiny, satria nodidian’ny amperôra Klaody#18.2 I Pônto dia faritany amin’ny avaratr’i Azia Minôra, manamorona ny Ranomasina Mainty. Klaody: jereo 11.28 sy nta. Fantatra fa nisy tokoa io didin’ny amperôra Klaody io tamin’ny taona 49 na 50. hiala tany Rôma daholo ny Jiosy. Nanatona azy mivady i Paoly; 3ary satria mitovy asa tanana aminy rahateo i Paoly (fa samy mpanao lay izy ireo), dia nitoetra tao amin-dry i Akoilà sy i Prisila izy ary nifarimbona asa taminy. 4Isaky ny andro sabata, dia nifanakalo hevitra tao amin’ny sinagôga i Paoly ary niezahany horesen-dahatra na ny Jiosy na ny Grika.
5Rehefa tonga avy any Masedônia#18.5 Jereo 17.15. i Silasy mbamin’i Timôty, dia ny toriteny no nimasoan’i Paoly, ary nambarany tamin’ny Jiosy fa i Jesoa no ilay Mesia. 6Kanefa nanohitra sy nanevateva azy ry zareo; ka dia nanopakopa-damba#18.6 Ny manopakopa-damba toy izany dia isan’ny fihetsika manambara fa afaka andraikitra amin’ireo Jiosy ireo i Paoly. Ampit Mk 6.11 sy nta ary koa Asa 13.51; 22.23. i Paoly sady nanao taminy hoe:
–Anareo ny andraikitra raha toa ka manalavitra an’Andriamanitra ianareo, fa afaka adidy aminareo aho. Manomboka anio dia any amin’ny hafa firenena no halehako.
7Dia niala teo i Paoly ka nankao amin’i Tisio Josta, mpanaja an’Andriamanitra, izay nanan-trano nifanolotra tamin’ny sinagôga. 8Kanefa nino ny Tompo i Krispo, lehiben’ny sinagôga, mbamin’ny ankohonany#18.8 Ampit 16.15, 33. manontolo; ary maro koa ny Kôrintianina nihaino an’i Paoly no tonga mpino ary natao batisa.
9Indray alina dia nisehoam-pahitana i Paoly, ka nilazan’ny Tompo hoe:
–Aza matahotra, fa mitenena hatrany ary aza mangina. 10Fa momba anao Aho, ary tsy hisy olona afaka hihazona anao mba hampahorîna, satria vahoaka maro no voatokana ho Ahy amin’ity tanàna ity.
11Nitoetra herintaona sy tapany tao Kôrinto i Paoly, ka nampianatra ny tenin’Andriamanitra tamin’ny olona.
12Fony i Galiôna no governora tany Akaîa#18.12 Ny raki-tsoratra tamin’izany fotoana izany dia ahazoana manondro ny taona 51-52 na 52-53 ho taona niasan’i Galiôna tao Kôrinto., dia niara-nioko namely an’i Paoly ny Jiosy ary nitondra azy teo amin’ny fitsarana 13ka nanao hoe:
–Mitaona ny olona hanaraka fivavahana mifanohitra amin’ny lalànan’i Mosesy io lehilahy io!
14Efa ndeha hiteny indrindra i Paoly no nilaza tamin’ny Jiosy i Galiôna hoe:
–Ry Jiosy, raha momba ny hoe heloka bevava na zavatra ratsy natao, dia vonon-kihaino anareo aho. 15Fa raha voambolana sy anarana ary lalànanareo manokana no iadianareo hevitra, dia raharahanareo; fa izaho tsy te hitsara an’izany.
16Dia noroahin’i Galiôna hiala teo amin’ny fitsarana ny Jiosy. 17Fa nosamborin’izy rehetra kosa i Sôstena, lehiben’ny sinagôga, ka nokapohiny teo anoloan’ny fitsarana. Nefa tsy nisy nahoan’i Galiôna izany.
Miverina any Antiôkia i Paoly
18Mbola tafajanona elaela tao Kôrinto i Paoly. Avy eo dia nanao veloma ny havana iray finoana izy ka niondrana nankany Siria, niarahan-dry i Prisila sy i Akoilà. Talohan’ny hiondrana, dia niharatra volon-doha tao Senkrea i Paoly, satria nisy voady nataony#18.18 Mandritra ny fe-potoana aharetan’ny voady kosa dia tsy haratana ny volon-doha: jereo Nom 6.5-18. –Senkrea: anankiray amin’ireo seranan’i Kôrinto, dia ilay teo atsinanan’ny andilantany.. 19Ary tonga tao Efeso izy ireo; dia nandao azy mivady i Paoly ka nankany amin’ny sinagôga ary nifanakalo hevitra tamin’ny Jiosy. 20Nangatahin-dry zareo izy mba hitoetra maharitraritra, kanefa tsy nety 21fa nanao veloma azy sady niteny hoe:
–Raha sitrapon’Andriamanitra, dia mbola hiverina atỳ aminareo aho.
Ary dia niondrana an-tsambo niala tao Efeso i Paoly. 22Nony tody tao Kesaria izy, dia niakatra tany Jerosalema mba hiarahaba ny Fiangonana; izay vao nidina nankany Antiôkia. 23Rehefa avy nijanona kelikely tao izy, dia lasa indray nitety mifanesy ny faritany Galatia sy Frijia#18.23 Jereo 16.6 sy nta., ka nampahery ny mpianatra rehetra.
Mitoriteny ao Efeso sy ao Kôrinto i Apôlao
24Tonga tao Efeso ity Jiosy atao hoe Apôlao, teraka tany Aleksandria, lehilahy mpandaha-teny mahay sady nahalala tsara dia tsara ny Soratra Masina. 25Efa nianatra ny lalana nosoritan’ny Tompo izy ary nafana fo nanambara sy nampianatra mazava tsara momba an’i Jesoa, saingy ny batisan’i Jôhany#18.25 Ampit 19.3-4. no hany fantany. 26Niteny tamim-pahasahiana tao amin’ny sinagôga i Apôlao; ary nony nandre azy i Prisila sy i Akoilà, dia naka azy ho any aminy ka nanazava marina kokoa taminy momba ny lalana nosoritan’Andriamanitra. 27Avy eo dia nanam-paniriana ho any Akaîa i Apôlao; ka nampirisika azy ny havana iray finoana sady nanoratra taratasy ho an’ny mpianatra amin’io faritany io mba handraisany azy tsara. Nony tafapaka tany i Apôlao, dia nanampy tokoa ireo olona efa niasan’ny fahasoavan’Andriamanitra ka tonga mpino; 28teny feno hery tokoa no nandreseny lahatra ny Jiosy ampahibemaso ka nanaporofoany tamin’ny alalan’ny Soratra Masina fa i Jesoa no ilay Mesia.
Voafantina amin'izao fotoana izao:
Asa 18: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.