Hamôsa 7
7
Ny fahitana voalohany: ny valala
1Izao no nasehon’ny Tompo ANDRIANANAHARY ahy tamin’ny fahitana: Indro Izy nanao andiam-balala tamin’ny fiandohan’ny fitsimohan’ny kolokolo, dia ny kolokolo taorian’ny fijinjana vary ho an’ny mpanjaka. 2Ary rehefa tapitra lanin’ny valala avokoa ny ahitra rehetra tamin’ny tany, dia hoy aho hoe: «Ry Tompo ANDRIAMANITRA ô, mba avelao re ny heloky ny vahoakanao! Fa fomba ahoana no hahajoroan’ny taranak’i Jakôba satria kely izy?» 3Dia niova hevitra tokoa ny TOMPO ka dia IZY mihitsy no niteny hoe: «Tsy hisy izany#7.3 Momba ny and 1-3: jereo Eks 32.9-14; Nom 14.13-19; Jer 15.1-6; Jak 5.16..»
Ny fahitana faharoa: ny afo
4Izao indray no nasehon’ny Tompo ANDRIANANAHARY ahy tamin’ny fahitana: Indro Izy Tompo ANDRIANANAHARY dia niantso ny afo hanatanteraka ny fitsarany; ka ny afo no nandritra ny ranobe any ambanin’ny tany sady nandoro ny tanin’i Israely. 5Dia hoy aho hoe: «Ry Tompo ANDRIANANAHARY ô, mba atsaharo amin’izay re! Fa fomba ahoana no hahajoroan’ny taranak’i Jakôba satria kely izy?» 6Ary niova hevitra tokoa ny TOMPO; ka dia Izy Tompo ANDRIANANAHARY no niteny hoe: «Tsy hisy izany.»
Ny fahitana fahatelo: ny fira-potsy
7Izao koa no nasehon’ny Tompo ANDRIANANAHARY ahy tamin’ny fahitana: Indro Izy Tompo mihitsy no nitsangana teo ambonina manda fira-potsy#7.7 fira-potsy: akora fanaovana fitaovam-piadiana ny fira-potsy fahizany ary dia ilazana ny fitaovam-piadiana handringanana an’i Israely. sady nitana fira-potsy teny an-tanany. 8Dia nanontany ahy ny TOMPO hoe:
–Inona no hitanao, ry Hamôsa?
Ka novaliako hoe:
–Fira-potsy.
Dia hoy indray ny Tompo hoe:
–Indro Aho hampiasa fira-potsy hamelezako eo afovoan’i Israely vahoakako, satria tsy holeferiko intsony ny fahadisoany. 9Fa hofoanako ireo toeram-panasinan’ny taranak’i Itsehàka, horavako ireo toeram-pivavahan’i Israely, ary hitsangana Aho hamely ny taranak’i Jerôbohama#7.9 hamely... Jerôbohama: jereo 2 Mp 15.8-10. amin’ny sabatra.
Noroahina tao Betela i Hamôsa
10Ary i Amatsià, mpisorona tao Betela, dia naniraka hilaza amin’i Jerôbohama mpanjakan’i Israely hoe: «I Hamôsa efa nikotrika fikomiana taminao teo anivon’ny vahoakan’i Israely; tsy zakan’ny tany intsony ireo kabariny rehetra. 11Fa izao manko no voalazan’i Hamôsa: Ho fatin’ny sabatra i Jerôbohama ary ny vahoakan’i Israely dia ho entina ho babo lavitra ny taniny.»
12Dia hoy i Amatsià tamin’i Hamôsa: «Ry mpahazo fahitana, mandehana mandositra any amin’ny tanin’i Joda ianao, ka any no ijoroy ny maha-mpaminany anao; dia ry zareo no hanome anao ny mofo hohaninao. 13Fa aza maminany eto Betela intsony, fa toeram-pivavahana najoron’ny mpanjaka sady lapan’andriamanjaka no eto.»
14Dia namaly an’i Amatsià i Hamôsa nanao hoe:
–Tsy mba mpaminany na anisan’ny tarika mpaminany aho taloha fa mpiandry biby fiompy sady mpanindrona voan’aviavy#7.14 voan’aviavy: ny aviavy dia hazo maniry eny amin’ny toerana ivaiva any Palestinina; ny voany dia natao sakafon’ny biby fiompy. Somary tsindronina kely ny voany mba hahamasaka azy faingana.. 15Saingy nalain’ny TOMPO teo am-piandrasana biby fiompy aho ka nitenenany hoe: «Mandehana ianao ka mijoroa ho mpaminany amin’ny Israely vahoakako.» 16Koa ankehitriny, henoy ny tenin’ny TOMPO. Ianao manao amiko hoe: «Aza maminany ny hamelezana an’i Israely ary aza manambara ny hamelezana ny taranak’i Itsehàka»; 17noho izany, ry Amatsià, dia izao no lazain’ny TOMPO:
Hijangajanga ao an-tanàna ny vadinao;
ireo zanakao lahy sy vavy
dia haringana amin’ny sabatra;
ny taninao dia hozarazaraina amin’ny tady
sy homena olon-kafa;
ianao dia ho faty any amin’ny tany fanompoan-tsampy
ary ny taranak’i Israely dia ho lasan-ko babo
lavitry ny taniny#7.17 Momba ny and 10-17: ampit Jer 20.1-6..»
Voafantina amin'izao fotoana izao:
Hamôsa 7: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.