Eksôdy 28
28
Ny fanamian’ny mpisorona
1«Ry Mosesy, ampanatòny ho eo akaikinao i Aharôna rahalahinao sy ny zanany efa-dahy, dia i Nadaba sy i Abihò ary i Elehazara sy i Itamara. Avaho amin’ny Israelita ireo mba hanompo Ahy amin’ny fisoronana. 2Hanaovana fanamiana voatokana i Aharôna ho mariky ny voninahitra amam-piandrianany. 3Ny torohevitra rehetra dia ambarao amin’ireo mpahay taozavatra izay nofenoiko hakingana, ka ireo no hanao ny fanamiana izay hoentin’i Aharôna amin’ny fanokanana azy ho mpisorona ho Ahy. 4Ireo fanamiana izay hataony dia ny saron-tratra, ny efôda, ny akanjo lava ivelany, ny akanjo vita peta-kofehy, ny satroka fehiloha ary ny fehikibo. Hanaovan’i Aharôna rahalahinao sy ny taranany ireo rehefa manao fisoronana amiko izy. 5Volon’ondry miloko volomparasy sy mena ary jaky mbamin’ny rongony madinika sy kofehy volamena no hampiasain’ireo mpahay taozavatra.
Ny efôda
6«Mpahay taozavatra no hanao ny efôda#28.6 Araka ny filazalazana manaraka, ny efôda dia karazana aron’akanjo voatokana. amin’ny kiran-drongony mafy, mifangaro volon’ondry miloko volomparasy sy mena ary jaky, ka asiana peta-kofehy volamena. 7Beritelo zairina amin’ny sisiny roa no hitondrana ny efôda. 8Hotenomina ho iray amin’ny efôda sady hatao amin’ny kofehy mitovy amin’ny nanaovana azy ny samboady fitazonana ny efôda. 9Avy eo dia halaina ny vato berila roa izay hanoratana an-tsokitra ny anaran’ireo zanakalahin’i Jakôba: 10ka ny anarana enina amin’ny vato voalohany, ary ny anarana enina amin’ny vato faharoa, arakara-jokiny. 11Mpivaofy vato no hisokitra ny anarana amin’ireo vato roa ireo; hataony toy ny fisokitra tombokase izany ka hapetaka anaty bokom-bolamena anankiroa. 12Avy eo dia hapetany eo ambony beritelon’ny efôda ireo vato roa ireo mba ho fahatsiarovana ny Israelita foko 12. Amin’izay i Aharôna dia hitondra ny anaran’izy ireo eny an-tsorony ao amin’ny Toeramasina, ka Izaho TOMPO tsy hanadino anareo. 13Rehefa vita ny bokom-bolamena anankiroa, 14dia hapetaka eo koa ny rojo volamena madinika anankiroa miolanolana toy ny tady voarandrana.
Ny saron-tratra
15«Mpahay taozavatra no hanao ny saron-tratra fitsarana#28.15 Ny saron-tratra fitsarana dia karazana paosy napetaka teo ambonin’ny efôda. Izy no mitahiry ireo zavatra voatokana (and 30) hampiasain’ny mpisorombe hikarohana izay sitrapon’Andriamanitra na izay fitsarany amin’ny toe-javatra sasany. amin’ny kiran-drongony mafy, mifangaro volon’ondry miloko volomparasy sy mena ary jaky, sady hasiana peta-kofehy volamena toy ny efôda. 16Ho paosy efamira izy io, ka mirefy 25 santimetatra ny lafiny tsirairay ary 17horavahana laharam-batosoa efatra: ny laharana voalohany dia sardoanina sy tôpaza ary emeralda; 18ny laharana faharoa dia robisy sy safira ary diamondra; 19ny laharana fahatelo dia ôpaka sy agata ary ametista; 20ny laharana fahefatra dia krizôlita sy berila ary jaspa. Samy apetaka anaty bokom-bolamena avy ny vato tsirairay#28.20 Tsy tena azo antoka ny famantarana ireo vatosoa isan-karazany eto.. 21Hosoratana an-tsokitra eo amin’ny vatosoa tsirairay avy ny anaran’ireo zanakalahin’i Jakôba izay miisa 12; hatao toy ny fisokitra tombokase izany, ka ireo vato ireo no ho solotenan’ny foko israelita 12.
22«Rojo volamena madio anankiroa, miolanolana toy ny tady voarandrana, no hatao eo amin’ny saron-tratra; 23hisy haba volamena roa hamboarina ka hapetaka eo amin’ny zorony roa ambony amin’ny saron-tratra. 24Hafatotra tsirairay amin’ireo haba amin’ny saron-tratra ireo ny rojo volamena madinika; 25ary ny lanin’ny rojo roa kosa dia hapetaka amin’ny bokom-bolamena izay eo ambonin’ny beritelon’ny efôda mba hahatonga ny saron-tratra ho eo anoloana. 26Hisy haba volamena roa hafa koa hamboarina ka hapetaka eo amin’ny zorony roa ambany amin’ny saron-tratra manolotra ny efôda. 27Mbola hisy haba volamena roa hafa koa hamboarina ka hapetaka eo ambanin’ny beritelon’ny efôda eo anoloana, eo amin’ny fikambanany; eo ambonin’ny samboadin’ny efôda no hametrahana ireo haba volamena ireo. 28Hatohy tady volomparasy ny haban’ny saron-tratra sy ny haban’ny efôda mba ho eo ambonin’ny beritelon’ny efôda ilay saron-tratra ka tsy hifindrafindra eo amin’ny efôda.
29«Amin’izay, rehefa miditra ao amin’ny Toeramasina i Aharôna, dia hitondra eny an-tratrany ny saron-tratra fitsarana misy ny anaran’ny fokon’i Israely; ka Izaho TOMPO amin’izay dia tsy hanadino anareo na oviana na oviana. 30Ary ianao, ry Mosesy, apetaho eo amin’ny saron-tratra fitsarana ny Orîma sy Tomîma#28.30 ny Orîma sy Tomîma dia zavatra voatokana (tehinakely na kodiakely) nampiasaina tany am-boalohany, tamin’ny alalan’ny antsapaka, mba hoenti-mamantatra izay sitrapon’Andriamanitra; jereo Nom 27.21; 1 Sam 14.41; 28.6; Hez 2.63; Ne 7.65. mba hoentin’i Aharôna eny an-tratrany rehefa hiseho eo anatrehako Izaho TOMPO izy; tsy maintsy entin’i Aharôna mandrakariva eny aminy manko ireny isaky ny ho ao amin’ny Toeramasina izy mba hahazoany mamantatra ny sitrapoko momba ny Israelita.
Ny fanamiana hafa voatokana
31«Ny akanjo lava ivelany izay hitondran’i Aharôna ny efôda dia hatao manontolo amin’ny volon’ondry miloko volomparasy. 32Hasiana vavany eo afovoany mba hidiran’ny loha, ka hotenomina sy hohamafisina ny sisiny manodidina io vavany io mba tsy ho rovitra. 33Ny moron-tongotr’akanjo manodidina dia horavahana sarin’ampongabendanitra vita amin’ny volon’ondry miloko volomparasy sy mena ary jaky, sady hasiana lakolosy kely volamena. 34Ny sarin’ampongabendanitra dia hifanelanelana amin’ny lakolosy kely. 35Hanaovan’i Aharôna io fanamiana io rehefa manao ny raharaha maha mpisorona izy: koa rehefa hiseho eo anatrehako ao amin’ny Toeramasina izy, na hiala tao, dia ho heno ny feon’ny lakolosy kely ka tsy ho faty izy.
36«Hisy takela-bolamena madio iray hamboarina, ka hatao miendrika voninkazo ary eo amboniny hasiana soratra voasokitra toy ny amin’ny tombokase hoe: ‹Voatokana ho an’ny TOMPO›. 37Dia hafatotra amin’ny tady volon’ondry miloko volomparasy eo ambonin’ny satroka fehiloha, eo anoloana izy. 38Hoentin’i Aharôna mandrakariva eny amin’ny handriny io takela-bolamena io rehefa hiseho eo anatrehako Izaho TOMPO izy, ka amin’izay dia hoekeko ny fanatitra rehetra izay hatokan’ny Israelita ho Ahy na dia manao hadisoana aza ireo amin’ny fanolorana azy.
39«Farany dia hanenomana akanjo lava vita rongony i Aharôna, ary hanaovana satroka fehiloha rongony sy fehikibo vita peta-kofehy.
40«Ary ireo zanakalahin’i Aharôna koa dia hanaovana fanamiana mihaja sy be voninahitra, dia akanjo lava sy fehikibo ary satroka boribory#28.40 Ny voambolana hebreo izay nadika hoe satroka boribory dia satroka toa vita lamba, nefa tsy fantatra izay tena endriny marina..
41«Ry Mosesy, hampiakanjoinao ireo fanamiana ireo i Aharôna zokinao sy ny zanany lahy ary hohosoranao diloilo ny lohany, dia hapetrakao amin’ny toerany izy; toy izany no hanokananao azy hanompo Ahy amin’ny maha mpisorona azy. 42Mba hanaronana ny fitanjahany, dia hanaovana kilaoty rongony izy hanarona ny hatreo amin’ny tehezany ka hatramin’ny feny. 43Hiakanjoan’i Aharôna sy ny zanany izany rehefa hiditra ao amin’ny Tranolay fihaonana izy, na manatona eo amin’ny alitara hanao ny raharaha maha mpisorona ao amin’ny Toeramasina. Izany no tsy hahazoany heloka hahafaty azy. Ho fepetra raikitra izany ho an’i Aharôna sy ny taranany.
Voafantina amin'izao fotoana izao:
Eksôdy 28: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.