Genesỳ 21
21
Ny nahaterahan’i Itsehàka
1Nitahy an’i Sarà ny TOMPO ka notanterahiny taminy tokoa izay nampanantenainy. 2Dia nitoe-jaza i Sarà na dia efa antitra aza i Abrahama, ary niteraka zazalahy izy tamin’ny fotoana izay efa nambaran’Andriamanitra taminy. 3Nataon’i Abrahama hoe Itsehàka ny anaran’ilay zazalahy naterak’i Sarà ho azy. 4Noforan’i Abrahama i Itsehàka zanany lahy, rehefa feno valo andro araka izay efa nandidian’Andriamanitra azy#21.4 Jereo Koa Gen 17.12; Asa 7.8.. 5Ary efa feno zato taona i Abrahama tamin’ny nahaterahan’i Itsehàka zanany lahy. 6Dia nilaza i Sarà hoe:
–Nanao izay nampihomehy ahy Andriamanitra, ary izay rehetra mandre ny momba an’i Itsehàka dia hihomehy miaraka amiko#21.6 Jereo Gen 17.19 sy nta..
7Ary hoy koa izy hoe:
–Iza moa no afaka hilaza amin’i Abrahama fa hampinono zaza i Sarà? Kanjo niteraka zazalahy ho azy tamin’ny fahanterany aho.
Ny nandroahan’i Abrahama an’i Hagara sy i Jismahela
8Rehefa lehibe ny zaza, dia nosarahi-nono. Koa nanao fanasana lehibe i Abrahama noho izany.
9Indray andro dia hitan’i Sarà nilalao#21.9 nilalao: ny LXX dia manao hoe nisangisangy tamin’i Itsehàka zanany ny zanakalahin’i Hagara... Abrahama. ny zanakalahin’i Hagara ejiptianina, izay naterany ho an’i Abrahama; 10ka hoy i Sarà tamin’i Abrahama:
–Roahy io mpanompovavy io sy ny zanany#21.10 Jereo Gal 4.29-30., satria tsy tokony handova miaraka amin’i Itsehàka zanako ny zanany.
11Nampalahelo an’i Abrahama loatra izany teny izany, satria zanany koa i Jismahela. 12Nefa hoy Andriamanitra tamin’i Abrahama:
–Aza malahelo ny amin’ny zazalahy sy ny mpanompovavinao, fa ekeo izay rehetra nolazain’i Sarà taminao; amin’ny alalan’i Itsehàka manko no hisian’ny taranaka hitondra ny anaranao#21.12 Jereo Rom 9.71; Heb 11.18.. 13Kanefa ilay zanakalahin’ny mpanompovavinao koa dia hataoko tonga firenena, satria taranakao izy.
14Dia nifoha vao maraina be i Abrahama ka naka mofo sy siny hoditra feno rano; dia nomeny an’i Hagara izany sady napetrany teo an-tsorony, ary natolony azy koa ny zaza. Dia nalefan’i Abrahama izy mianaka ka nandeha nirenireny tao an-taniefitr’i Beera-Seba. 15Rehefa tapitra ny rano tao amin’ny siny hoditra, dia navelan’i Hagara teo am-pototry ny hazo iray ny zaza; 16dia lasa izy nipetraka tandrifiny tery lavidavitra tokony ho tratry ny zana-tsipîka, fa hoy izy anakampo hoe: «Aza hitako anie izay hahafatesan’ny zaza.» Fony nipetraka tandrifin’ny zaza izy, dia nanandra-peo nitomany. 17Nefa henon’Andriamanitra ny kiakiakan’ny zaza; koa niantso an’i Hagara avy any an-danitra ny anjelin’Andriamanitra nanao taminy hoe:
–Inona no mahazo anao, ry Hagara? Aza matahotra, fa efa henon’Andriamanitra ny kiakiakan’ny zaza eo amin’ny toerany eo. 18Mitsangàna, ndeha areno ny zaza ka tantano; fa hataoko tonga firenena lehibe izy.
19Dia nataon’Andriamanitra nahiratra ny mason’i Hagara, ka nahatazana lavaka fantsakana. Dia lasa izy nameno rano ny siny hoditra ary nampisotro rano ny zaza.
20Ary nombàn’Andriamanitra ny zaza ka nihalehibe, ary nonina tany an-taniefitra ka lasa mpandefa tsipîka mahay. 21Nangalan-dreniny vady avy tany Ejipta izy ary nonina tao an-taniefitr’i Paràna.
Ny fifanekena nataon’i Abrahama sy i Abimelèka
22Tamin’izany fotoana izany dia nankany amin’i Abrahama i Abimelèka, niaraka tamin’i Pikôla lehiben’ny tafiny, ka nanao taminy hoe:
–Homba anao anie Andriamanitra amin’izay rehetra hataonao. 23Ankehitriny ianiano amin’Andriamanitra aho fa tsy hamadika ahy na ny zanako na ny taranako ianao. Fa ho tahaka ny soa izay nataoko taminao no hataonao amiko sy amin’ity tany izay ivahinianao ity.
24Dia hoy i Abrahama hoe:
–Ianianako izany!
25Ary nitarainan’i Abrahama i Abimelèka noho ilay lavaka fantsakana nalain’ireo mpanompon’i Abimelèka an-keriny. 26Fa namaly azy i Abimelèka hoe:
–Tsy fantatro izay nanao izany zavatra izany, ary ianao koa tsy nanambara tamiko sady izao aho vao mandre izany.
27Dia naka ny ondry aman’osy sy omby i Abrahama, ka nomeny an’i Abimelèka; dia nanao fifanekena izy roa lahy. 28Ary nanavaka ondrivavy kely fito i Abrahama 29ka nanontanian’i Abimelèka hoe:
–Nahoana no avahanao ireo ondrivavy kely fito ireo?
30Dia namaly i Abrahama hoe:
–Mba ekeo avy amin’ny tanako ireo ho vavolombelona amiko fa izaho no nandavaka ilay fantsakana.
31Izany no niantsoana io toerana io hoe Beera-Seba, satria teo izy roa lahy no nanao fianianana#21.31 Amin’ny TM dia misy tsilalaon-teny roa sosona ao amin’ny and 28-31: ny anarana hoe Beera-Seba manko dia mety midika hoe fantsakan’ny fianianana na hoe Fantsakan’ny Ondrivavy Fito. .
32Nanao fifanekena tao Beera-Seba i Abrahama sy i Abimelèka; avy eo dia niainga i Abimelèka sy i Pikôla, lehiben’ny tafiny, ka lasa niverina nankany amin’ny tanin’ny Filistinina.
33Ary i Abrahama namboly hazo voamadilo tao Beera-Seba, ka teo no nivavahany tamin’ilay Andriamanitra mandrakizay sy niantsoany Azy hoe TOMPO. 34Naharitra ela ny fivahinian’i Abrahama tao amin’ny tanin’ny Filistinina.
Voafantina amin'izao fotoana izao:
Genesỳ 21: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.