Genesỳ 24
24
Ny fanambadian’i Itsehàka sy i Rebekà
1Ary efa tena antitra be i Abrahama, sady notahîn’ny TOMPO tamin’ny zavatra rehetra. 2Indray andro dia hoy i Abrahama tamin’ilay mpanompony tranainy indrindra tao an-tranony, izay mpifehy ny fananany rehetra:
–Apetraho ato ambany feko ny tananao, 3ka mianiàna amin’ny TOMPO Andriamanitry ny lanitra sy ny tany ianao fa tsy haka vady ho an’ny zanako avy amin’ny zanakavavin’ny Kanahanita izay miara-monina amiko. 4Fa handeha ho any amin’ny tany fiaviako sy amin’ny havako ianao, ka haka vady ho an’i Itsehàka zanako.
5Dia namaly azy ilay mpanompo hoe:
–Angamba tsy te hiaraka amiko ho atỳ amin’ity tany ity razazavavy, koa moa tsy maintsy haveriko any amin’ny tany izay efa nilaozanao ve ny zanakao?
6Dia hoy i Abrahama namaly azy:
–Tandremo tsara mba tsy haverinao any ny zanako. 7Ny TOMPO, Andriamanitry ny lanitra, no naka ahy tao an-tranon’ny raiko sy tao an-tanindrazako. Niteny tamiko Izy sady nianiana tamiko fa hanome ity tany ity ho an’ny taranako. Izy no haniraka ny anjeliny eo alohanao, ka any no hakanao vady ho an’ny zanako. 8Raha tsy manaiky hanaraka anao ilay razazavavy, dia afaka amin’izao fianianana izao ianao; fa ny zanako kosa aza entinao miverina any.
9Dia napetrak’ilay mpanompo tao ambany fen’i Abrahama tompony ny tanany, ary nianiana taminy momba io raharaha io izy. 10Dia naka rameva folo tamin’ny ramevan’ny tompony izy sady nitondra izay zavatra tsara indrindra nananan’ny tompony, dia niainga hankany Mezôpotamia ambony, any amin’ny tanànan’i Nahôra#24.10 sady nitondra izay...tompony: dkt hafa notantanany avokoa ny fananan’ny tompony. –Nahôra eto dia mety ho anaran’ny tanàna asirianina iray na mety ho ny anaran’ny rahalahin’i Abrahama. (and 15; 11.27). Amin’ity farany, ny tanànan’i Nahôra dia i Haràna (11.31)..
11Nony tonga teo akaikin’ny fantsakana teo ivelan’ny tanàna izy, dia nampandohalika ny rameva, fa fotoana hariva fivoahan’ny vehivavy mantsaka tamin’izay. 12Izao no vavaka nataony:
–Ry TOMPO Andriamanitr’i Abrahama tompoko ô, mba ambino aho anio, ka manehoa fahasoavana amin’i Abrahama tompoko. 13Inty aho eto akaikin’ny fantsakana; ary ireo zatovovavy zanaky ny mponina ao an-tanàna dia hivoaka hantsaka rano eto. 14Koa izay zatovovavy hangatahako mba hampidina kely ny sininy hisotroako, ka hamaly hoe: «Misotroa ary aoka ny ramevanao hampisotroiko ihany koa!», dia amin’izay no hahafantarako fa izy no voatendrinao ho an’i Itsehàka mpanomponao ary efa naneho fahasoavana tamin’ny tompoko Ianao.
15Fa raha mbola tsy nifarana akory ny teniny, dia indro tamy i Rebekà milanja siny eny an-tsorony. Io Rebekà io dia zanakavavin’i Betoela zanakalahin’i Milkà izay vadin’i Nahôra rahalahin’i Abrahama. 16Tsara tarehy tokoa razazavavy sady virijiny fa tsy mbola nisy lehilahy niray taminy. Ary nidina teo am-pantsakana izy ka nameno ny sininy, dia niakatra. 17Fa nihazakazaka hihaona amin-drazazavavy ilay mpanompon’i Abrahama ka nanao hoe:
–Mba ampisotroy rano kely avy amin’ny sininao aho azafady!
18Ary hoy razazavavy hoe:
–Misotroa, tompoko.
Nampidininy haingana ny siny ho eo an-tanany, dia nampisotroiny ralehilahy. 19Ary rehefa vitany izany, dia hoy indray razazavavy hoe:
–Hantsaka ho an’ny ramevanao koa aho ambara-pisotron’izy rehetra.
20Dia naidiny faingana tao anaty tavy fisotroam-biby ny rano tao an-tsiny ary nihazakazaka nantsaka indray izy, ka nantsakany avokoa ireto rameva rehetra. 21Ary nandinika tsara an-drazazavavy tamim-panginana ilay rangahy mba hahafantarany raha nambinin’ny TOMPO tokoa ny diany na tsia. 22Rehefa tapitra nisotro ny rameva, dia naka kavin’orona volamena iray tokony ho folo grama sy haba volamena roa tokony ho zato grama avy izy ho an-drazazavavy, 23sady nanontany azy hoe:
–Mba lazao ahy hoe: Zanak’iza moa ianao? Ary misy toerana azonay andriana ve ao an-tranon-drainao?
24Dia namaly razazavavy hoe:
–Zanakavavin’i Betoela aho, sady zafikelin’i Milkà sy i Nahôra.
25Ary mbola nampiany hoe:
–Na ny mololo na ny vilona dia samy betsaka ao aminay sady misy toerana handrianareo koa.
26Niondrika ilay rangahy ary niankohoka nisaotra ny TOMPO 27nanao hoe:
–Hisaorana anie Ianao, ry TOMPO Andriamanitr’i Abrahama tompoko, fa tsy namela ny fitiavanao sy ny toetranao mahatoky hiala tamin’ny tompoko Ianao, fa teny an-dalana aho dia nentinao hankaty amin’ny tranon’ireo havan’ny tompoko.
28Dia lasa nihazakazaka nankany an-tranon-dreniny razazavavy hilaza ny vaovao. 29Ary nanana anadahy atao hoe Labàna anefa i Rebekà; dia nihazakazaka io nankany amin’ilay rangahy tany ivelany, teo am-pantsakana. 30Tazany manko ny kavin’orona sy ireo haba teny an-tanan’ny anabaviny ary henony koa ny nitantarany izay voalazan’ilay rangahy. Dia tonga teo amin’ilay rangahy i Labàna; ary mbola mijoro eo anilan’ny fantsakana miaraka amin’ny ramevany izy 31no nitenenany hoe:
–Mandrosoa ao an-trano, ry ilay notahîn’ny TOMPO. Nahoana ianao no mijanona etỳ ivelany? Izaho anie efa nanomana ny trano sy namboatra toerana ho an’ny rameva e!
32Dia nandroso tao an-trano ilay mpanompon’i Abrahama. Novahana ny rameva, ka nomena mololo sy vilona; ary nitondrana rano hisasan-tongotra koa ilay rangahy sy ireo olona niaraka taminy. 33Norosoana sakafo izy nefa nilaza hoe:
–Tsy mbola hihinana aho aloha, raha tsy efa voalazako izay tokony holazaiko.
Ka hoy i Labàna hoe:
–Lazao àry.
34Dia namaly ilay rangahy hoe:
–Mpanompon’i Abrahama aho. 35Efa notahîn’ny TOMPO tokoa ny tompoko ka tonga olo-malaza. Nomen’ny TOMPO azy ny andian’ondry aman’osy sy omby ary koa volafotsy sy volamena, mpanompolahy sy mpanompovavy betsaka, ary rameva sy boriky. 36Ary i Sarà vadiny, na dia efa antitra aza, dia niteraka zazalahy taminy; ary izy io no namindrany ny fananany rehetra. 37Nampianiana ahy ny tompoko mba tsy haka vady ho an’ny zanany lahy avy ao amin’ny tanin’ny Kanahanita izay onenany. Ka hoy izy tamiko: 38«Mianiàna amiko fa any amin’ny fianakavian-draiko, any amin’ny foko nipoirako, no halehanao haka vady ho an’ny zanako.» 39Dia nanontany azy aho hoe: «Ary raha ohatra ka tsy mety hanaraka ahy razazavavy?» 40Dia novaliany hoe: «Eo anatrehan’ny TOMPO hatrany no izorako, ka Izy haniraka ny anjeliny hiaraka aminao sy hampahomby ny dianao; ny zanako dia hitondranao vady avy amin’ny foko nipoirako sy ny fianakavian-draiko. 41Ary rehefa mandeha any amin’ny foko nipoirako ianao, na dia tsy omeny aza, dia afaka amin’ny fampianianako.» 42Koa raha vao tonga teo akaikin’ny fantsakana aho androany, dia nivavaka hoe: «Ry TOMPO Andriamanitr’i Abrahama tompoko ô, mba ataovy mahomby ny anton-diako. 43Inty aho mby eto anilan’ny fantsakana, hisy zazavavy hivoaka hantsaka ka hiangaviako mba hampisotro ahy rano kely avy amin’ny sininy. 44Koa raha mamaly ahy izy hoe: ‹Misotroa ianao, ary ny ramevanao koa hantsakako›, dia izy no vehivavy voatendrinao, ry TOMPO, ho an’ny zanakalahin’ny tompoko.» 45Raha mbola tsy tapitra akory anefa ny teniko anakampo, dia tamy i Rebekà niantsoroka siny, dia nidina nankeo am-pantsakana ka nantsaka; ary hoy aho taminy: «Mba omeo aho hosotroiko, aza fady!» 46Dia nampidininy faingana avy teny an-tsorony ny siny ka hoy izy hoe: «Misotroa, ary hampisotroiko koa ny ramevanao.» Dia nisotro aho ary nampisotroiny koa ny rameva. 47Ary rehefa nanontany azy aho hoe: «Zanak’iza moa ianao?», dia novaliany hoe: «Zanakavavin’i Betoela aho, ary zafikelin’i Nahôra sy i Milkà.» Dia napetrako teo amin’ny oron-drazazavavy ny kavina ary nataoko teny an-tanany ny haba. 48Nandohalika aho hitsaoka ny TOMPO, Andriamanitr’i Abrahama tompoko, ary nisaotra Azy noho ny nitondrany ahy tamin’ny lalana marina haka ny zanakavavin’ny rahalahin’ny tompoko mba ho an-janany. 49Koa ankehitriny lazao ahy raha vonona haneho fitia sy firaiketam-po amin’ny tompoko ianareo. Fa raha tsy izany kosa dia handeha ho any an-kafa aho.
50Dia namaly i Labàna sy i Betoela hoe:
–Avy amin’ny TOMPO no niavian’izao zavatra izao ka tsy azonay iadian-kevitra. 51Indro i Rebekà eo anoloanao, ento miaraka aminao izy ary aoka ho vadin’ny zanakalahin’ny tomponao, araka izay nambaran’ny TOMPO.
52Rehefa nandre izany teny izany ilay mpanompon’i Abrahama, dia niankohoka tamin’ny tany hisaotra ny TOMPO. 53Avy eo dia namoaka firavaka volafotsy sy volamena ary fitafiana izy ka nomeny an’i Rebekà; nomeny zavatra sarobidy maro koa ny anadahiny sy ny reniny. 54Izay vao nihinana sy nisotro ilay mpanompon’i Abrahama sy ireo olona niaraka taminy; avy teo dia lasa natory.
Ny ampitso maraina, rehefa nifoha izy ireo, dia hoy ilay mpanompon’i Abrahama hoe:
–Alefaso àry aho hiverina any amin’ny tompoko.
55Fa namaly kosa ny anadahin-drazazavavy sy ny reniny hoe:
–Aoka hipetraka hiaraka aminay kelikely tokony ho folo andro aloha razazavavy, vao mandeha.
56Fa namaly azy ireo indray ilay mpanompo hoe:
–Aza tananareo aho, fa ny TOMPO efa nanambina ny diako; alefaso aho hiverina ho any amin’ny tompoko.
57Hoy kosa ireo hoe:
–Aoka àry hantsoinay razazavavy, aoka hanontaniana izay heviny!
58Dia nantsoin’ireo i Rebekà ka nanontaniany hoe:
–Moa handeha hiaraka amin’io lehilahy io ve ianao?
Ary hoy i Rebekà hoe:
–Eny, handeha aho.
59Koa navelan’ireo handeha i Rebekà sy ny mpitaiza azy hiaraka amin’ilay mpanompon’i Abrahama sy ny olony. 60Nitsodrano an’i Rebekà ireo ka nanao taminy hoe:
–Ho tonga renin’ny olona an’alinalina anie ianao, rahavana, ary ny taranakao anie hahazo ny tanànan’izay mankahala azy!
61Dia niainga i Rebekà sy ireo mpanompovaviny ka nitaingin-drameva, ary lasa nandeha niaraka tamin’ilay mpanompon’i Abrahama.
62I Itsehàka kosa niala tao amin’ny fantsakan’i Lahay-Roy#24.62 Ny fantsakana tao Lahay-Rôy: dia jereo Gen 16.13-14., ka nonina tao amin’ny faritany atsimo. 63Indray hariva raha nivoaka hitsangantsangana teny an-tsaha izy, dia nanopy maso ka nahita rameva nanatona. 64Rehefa nahatazana an’i Itsehàka i Rebekà, dia nidina niala tamin’ny rameva, 65ary nanontany ilay mpanompo hoe:
–Iza moa io lehilahy mandeha etỳ an-tsaha avy mitsena antsika io?
Ka hoy ilay mpanompo hoe:
–Io no tompoko.
Dia noraisin’i Rebekà ny voaly, ka nisaronany tarehy. 66Notantarain’ilay mpanompo an’i Itsehàka avokoa ny zavatra rehetra izay nataony. 67Avy eo dia nampandrosoin’i Itsehàka tao an-dain’i Sarà reniny i Rebekà, ka nalainy ho vady sy notiaviny; dia nampionona an’i Itsehàka izany taorian’ny nahafatesan-dreniny.
Voafantina amin'izao fotoana izao:
Genesỳ 24: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.