Genesỳ 38
38
I Joda sy i Tamara
1Tamin’izany fotoana izany dia niala teo amin’ny rahalahiny i Joda ka nidina tany Hadolama, ho any amin’ny lehilahy atao hoe Hirà. 2Tany no nahitan’i Joda ny zanakavavin’i Sohà lehilahy kanahanita, ka nalainy ho vady. 3Nitoe-jaza ilay ramatoa ka niteraka zazalahy, izay nantsoin’i Joda hoe Hera. 4Mbola nitoe-jaza indray ravehivavy ka niteraka zazalahy nantsoiny hoe Onàna. 5Avy eo dia mbola nitoe-jaza hafa indray izy ka nantsoiny hoe Selà. Tany Keziba i Joda no niteraka an’i Selà ny vadiny.
6Naka vady ho an’i Hera lahimatoany i Joda, ka Tamara no anarany. 7Fa ratsy fanahy teo imason’ny TOMPO i Hera ka nampamonoin’ny TOMPO ho faty. 8Dia hoy i Joda tamin’i Onàna:
–Mandehana mankany amin’ny vady navelan’ny rahalahinao, ka alao ho vady loloha#38.8 Fampiharana ny lalàna voalaza ao amin’ny Deot 25.5-6. izy mba hamelo-maso ny rahalahinao.
9Fantatr’i Onàna fa tsy ho azy ny taranaka raha misy, koa isaky ny nandry tamin’ny zaobaviny izy, dia nandraraka ny tsirinainy tamin’ny tany mba tsy hanome taranaka ho an’ny rahalahiny. 10Ary hita fa ratsy teo imason’ny Tompo izay nataon’i Onàna, ka nampamonoin’ny TOMPO ho faty koa izy. 11Dia hoy i Joda tamin’i Tamara vinantovaviny:
–Mitoera ho mpitondratena any an-tranon’ny rainao#38.11 Izany no fitsipika mifehy ny vehivavy maty vady tsy manan-janaka. aloha mandra-pahalehiben’i Selà zanako lahy.
Fa hoy i Joda anakampony hoe: «Sao dia ho faty toy ny rahalahiny eo koa i Selà.» Dia lasa i Tamara nonina tany an-tranon-drainy.
12Ary nony afaka elaela, dia maty ihany koa ny vadin’i Joda izany hoe ilay zanakavavin’i Sohà. Ary rehefa afa-tsaona i Joda, dia niakatra ho any Timnà niaraka tamin’i Hirà izay Hadolamita sakaizany mba hijery ireo mpanety ny ondriny. 13Rehefa ren’i Tamara fa nankany Timnà ny rafozany mba hanety ny ondriny, 14dia nanaisotra ireo fitafiany maha mpitondratena azy ravehivavy ka nisarona fisalobonana tsy hamantarana azy, ary nandeha nipetraka teo am-bavahadin’i Henaîma, amin’ny lalana mankany Timnà. Hitan’i Tamara manko fa efa lehibe i Selà, kanefa tsy nomena ho vadiny. 15Hitan’i Joda i Tamara ka noheveriny ho mpivarotena, satria nanaron-tava ravehivavy. 16Tsy nahafantatra azy ho vinantovaviny i Joda, ka dia nivily nanatona azy teo amoron-dalana sy nanao taminy hoe:
–Avelao mba handry aminao aho.
Fa hoy ny navaliny azy:
–Inona anefa no homenao ahy amin’izany?
17Dia hoy i Joda hoe:
–Handefasako zanak’osy avy amin’ny andian’ondry aman’osiko ianao.
Fa namaly ravehivavy hoe:
–Eny, raha omenao antoka aho mandra-pandefanao ny zanak’osy.
18Ary hoy i Joda hoe:
–Inona àry no antoka homeko anao?
Dia novaliany hoe:
–Ny tombokasenao sy ny tadiny#38.18 Ny tombokase manokana an’olona tsirairay matetika dia mifatotra amin’ny tady ary iambozonan’ny tompony. ary iny tehinao eny an-tananao iny.
Dia nomen’i Joda azy tokoa ireny, ka nandeha nandry tamin’i Tamara izy; ary nitoe-jaza ravehivavy. 19Avy teo dia niainga i Tamara, ka nandeha nody; nesoriny ny fisalobonana, dia nanaovany indray ny fitafiana maha mpitondratena azy. 20Nirahin’i Joda ilay Hadolamita sakaizany mba hitondra ny zanak’osy ho any amin’ilay ramatoa sady haka ny tombokase; kanefa tsy nahita azy ralehilahy, 21dia nanontany ny olona tao Henaîma hoe:
–Aiza ilay vehivavy mpivarotena tamoron-dàlana teto iny?
Ka hoy ny navalin’ireo azy:
–Tsy mbola nisy vehivavy mpivarotena izany mihitsy teo.
22Ary niverina tany amin’i Joda ilay sakaizany ka nanao taminy hoe:
–Tsy hitako ilay ramatoa; ary ny olona tao an-toerana aza dia nanamafy tamiko fa tsy mbola nisy vehivavy mpivarotena izany mihitsy teo.
23Dia hoy i Joda:
–Aoka ho lasany any ireny zavatra ireny, sao afa-baràka eo isika! Indro aho efa nampanatitra ny zanak’osy, nefa tsy hitanao ilay ramatoa.
24Nony afaka telo volana, dia nisy nitantara tamin’i Joda hoe:
–Nivaro-tena i Tamara vinantovavinao, ka indro bevohòka izy!
Dia hoy ny baikon’i Joda hoe:
–Avoahy izy hodorana velona.
25Ary raha iny mbola navoaka ny trano iny ilay ramatoa, dia nampaniraka ho any amin’ny rafozan-dahiny izy hilaza hoe:
–Izay lehilahy tompon’ireto zavatra ireto no nahabevohòka ahy. Koa fantaro izay tompon’ireto fitombokase sy tady ary tehina ireto?
26Fantatr’i Joda ireo zavatra ireo ka hoy izy hoe:
–Marina kokoa noho izaho i Tamara, satria tokony ho nomeko ho vadiny i Selà zanako lahy kanefa tsy nataoko izany.
Dia tsy nandry tamin’i Tamara intsony i Joda.
27Rehefa tonga ny andro hiterahan’i Tamara, dia indreo zaza kambana no tao an-kibony. 28Teo am-piterahana, dia niseho ny sandrin’ny zaza iray ka nosamborin’ny mpampivelona sady nofatorany kofehy mena fa hoy izy hoe:
–Ity zaza ity no teraka voalohany.
29Kanjo nahemotr’ilay zaza ny sandriny, dia indro ny rahalahiny indray no tafavoaka, ka hoy ny mpampivelona hoe:
–Ahoana izao fibosesika nafitsokao izao?
Dia nataon’i Joda hoe Peretsa na Fibosesika ny anarany. 30Avy eo dia teraka indray ilay zaza misy kofehy mena tamin’ny sandriny ka nataon’i Joda hoe Zera na Fiposahana ny anarany.
Voafantina amin'izao fotoana izao:
Genesỳ 38: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.