Isaià 10
10
Ny anton’ny fahatezeran’ny Tompo
1Lozan’ireo olona mamoaka didy tsy marina
ary maika hampanoratra lalàna mampahory.
2Hanesorana eo amin’ny fitsarana
ny fitarainan’ny madinika izany
ary hamerezan-jo aman-drariny
ny mahantra eo amin’ny vahoakako,
hamaboan-karena ny mpitondratena
ary koa handrobam-pananana ny kamboty.
3Amin’ny andro famalian’ny TOMPO,
raha ho tonga avy any lavitra
ny rambondanitra handrava,
inona no azonareo atao,
aiza no handosiranareo hitadiavam-bonjy
ary aiza no hametrahanareo ny harenareo?
4Izao ihany no azonareo atao:
hitanondrika miaraka amin’ireo babo
na hidaboka miaraka amin’ireo maty.
Saingy, na teo aza izany rehetra izany,
dia mbola tsy afaka ny fahatezeran’ny TOMPO
fa mihinji-tanana mandrahona ihany Izy#10.4 Jereo 5.25; 9.11, 16,20..
Nihoa-pefy ny Asirianina
5Hoy ny TOMPO hoe: «Lozan’i Asiria#10.5 Asiria: jereo Is 14.24-27; 30.27-33; 37.22-35; Ezek 32.22-23; Na 1–3; Tsef 2.13-15.,
izay tsorakazo mampihatra ny fahatezerako!
Eny, izy no mitazona eny an-tanany
ny kibay mampihatra ny fahavinirako.
6Nirahiko izy hamely firenena tsy mpivavaka
ary nalefako hamely vahoaka ratsy fanahy
mba handroba sy hanangona babo avy aminy,
ka hanosihosy azy toy ny fotaka eny an-dalambe.
7Kanjo tsy araka izany no heverin’i Asiria;
zavatra hafa no kasain’ny fony,
ny handringana no tao an’eritreriny
ary ny hamongotra firenena maro indrindra.
8Fa hoy izy hoe: ‹Moa tsy mitovy lanja
amin’ny mpanjaka ve ireo jeneraliko?
9Tsy tahaka an’i Karkemisy ve
no niafaran’ny tanànan’i Kalne?
Tsy tahaka an’i Arpada ve
no niafaran’i Hamata?
Tsy tahaka an’i Damasy ve
no niafaran’i Samaria#10.9 Ny filaharan’ireo tanàna voatanisa ireo dia maneho fa mandroso tsy hay tohaina mankany Jerosalema ny tafika asirianina.?
10Haiko ny namely ireo fanjakana
izay manompo andriamani-tsiizy,
na dia nihoatra noho ny an’i Jerosalema
sy ny an’i Samaria aza ny sarivongan-tsampiny.
11Koa tsy ho tahaka izay nataoko tamin’i Samaria
sy tamin’ny andriamani-tsiizy notompoiny ve
no hataoko koa amin’i Jerosalema sy ny sampiny?›
12Kanefa rehefa vitan’ny Tompo avokoa ny asany
ao an-tendrombohitra Tsiôna sy ao Jerosalema,
dia hofaiziny ny mpanjakan’i Asiria
noho ny fony feno avonavona
sy ny fijeriny miandranandrana.
13Satria hoy izy anakampony hoe:
«Ny herin-tsandriko sy ny fahendreko
no nahavitako ny zavatra rehetra,
fa izaho no marani-tsaina indrindra.
Nofoanako ny faritanin’ny firenena maro
ary norobaiko ny tahirin-karenany.
Ary toy ny lehilahy mahery fo aho
raha nanongana ny mpanjakany.
14Toy ny fakàna ny akanim-borona
ka angoronana ny atody nilaozan-dreniny
no nakako ny haren’ireo firenena
sy nangoronako ny fananan’ny tany tontolo,
ka tsy nisy afa-nikopaka elatra,
na nisoka-bava na nikiakiaka.»
15Ny famaky ve hirehareha amin’ny mpikapa?
Ny tsofa ve hiavonavona amin’ny mpanatsofa?
Mova tsy hoe ny tsorakazo indray
no manetsika izay mpanainga azy,
na mova tsy hoe ny kibay indray
no manandratra ny olona mampiasa azy!
16Noho izany, ny Tompo ANDRIAMANITR’izao rehetra izao
dia tsy hampamokatra intsony ny tany lonaka ao Asiria.
Ary toy ny fihanaky ny afo rehefa misy hain-trano
no hiparitahan’ny afo mihanaka
eo ambanin’ny famirapiratan’io firenena io.
17Ny TOMPO, fahazavan’i Israely, dia hanjary afo
ary ilay Masiny dia hanjary lelafo
handoro ny tsilo sy ny songosongo
ka handevona azy anatin’ny indray andro monja.
18Holevoniny tanteraka ny alany mirenty
mbamin’ny sahany mahavokatra;
ho toy ny marary miala aina izany.
19Hazo vitsy sisa no ho tavela amin’ny alany,
ka na ny zaza bodo aza dia afaka hanisa azy.
Ny sisa velona amin’i Israely
20Amin’izany andro izany, ireo sisa velona amin’i Israely na ireo sisa tavela amin’ny taranak’i Jakôba, dia hitsahatra tsy hiankina amin’ireo namely azy intsony; fa ny TOMPO, ilay Masin’i Israely, no hiankinany marina tokoa. 21Hisy sisa hiverina, eny, hisy sisa amin’ny taranak’i Jakôba hiverina amin’Andriamanitra mahfkery#10.21 hisy sisa hiverina: jereo ny naoty momba ny 7.3. –Andriamanitra mahery: jereo 9.5.. 22Kanefa na dia marobe toy ny fasika eny amoron-dranomasina aza ny vahoakanao, ry Israely, dia io sisa io ihany no hiverina amin’ny Tompo. Efa voatendry ny fandravana, izay hampihanaka ny fahamarinana. 23Eny, ny fandravana izay voatendrin’ny Tompo ANDRIAMANITR’izao rehetra izao no hotanterahiny eo anivon’ny tany#10.23 Ny and 22-23 dia voatsiahy amin’ny fomba malaladalaka ao amin’ny Rm 9.27. tontolo.
Aza matahotra ny Asirianina
24Izany no antony ilazan’ny Tompo ANDRIAMANITR’izao rehetra izao hoe: «Aza matahotra an’i Asirianina, ry vahoakako monina ao Tsiôna! Kibay sy langilangy no ikapohany anao toy izay nataon’ny Ejiptianina taminao fahiny#10.24 Misy fahatsiahivana ny fanompoana mafy nampiharin’ny Ejiptianina tamin’ny Israelita etoana; jereo Eks 1.; 25fa rehefa afaka kelikely, fotoana fohy monja, dia hitsahatra ny fahavinirako aminao ary hisampotina aminy ny fahatezerako.» 26Harangarangan’ny TOMPOn’izao rehetra izao manko ny karavasy hikapohany an’i Asiria tahaka izay nataony tamin’ny famelezana ny Midianita teo amin’ny harambaton’i Hôreba; ary hatsotrany eny ambony ranomasina ny tehiny, toy izay nataony tany Ejipta#10.26 Ny famelezana ny Midianita... Hôreba dia voatantara ao amin’ny Mpits 7.23-25; ampit Is 9.3 sy nta. –hahinjiny... ny tehiny: jereo Eks..
27Amin’izany andro izany,
hoesoriny eo an-tsorokao ny enta-mavesatra,
ary halàny eo am-bozonanao ny zioga#10.27 And 9a ampit 9.3..
Manatona an’i Jerosalema ny fahavalo
Miakatra ao Samaria ny fahavalo,
28tonga ao akaikin’i Haiata,
dia mandalo ao Migrôna
ary mametraka ny entany ao Mikmasy#10.28 Haiata: tanàna tokony ho 16 km ao avaratr’i Jerosalema. Manakaiky an’i Jerosalema kokoa hatrany ireo tanàna voatanisa manaraka. Ny fanafihana voateny etoana dia toa ilay fanafihana tamin’ny taona 734 tal J.K., izay efa voalazan’i Isaià rahateo indrindra ao amin’ny 7.1-9; jereo ny naoty momba ny 7.6..
29Mamakivaky ny hadilanana#10.29 Ity hadilanana ity dia ilay nampiasain’i Jônatàna fahiny araka ny 1 Sam 14.4. izy sady miteny hoe:
«Any Geba isika no hitoby anio alina.»
Mangovitra noho ny tahotra ny ao Ramà;
lasa mitsoaka ny ao Gibehà,
izay tanàna fiavian’i Saoly.
30Miantsoantsoa mafy, ry olona ao Galima!
Mihainoa ianareo ao Laisà,
ary mamalia ianareo ao Hanatôta#10.30 mamalia: araka ny dkt tranainy siriaka. –Hanatôta: jereo 1 Mp 2.26; Jer 1.1..
31Mandositra ny ao Madmenà
ary misitrika ny mponina ao Gevima.
32Fa androtr’io ihany ny fahavalo
dia maka toerana ao Nôba,
ka maninji-tanana mandrahona an’i Tsiôna,
dia ilay tendrombohitra mampahonena,
ilay havoana iorenan’i Jerosalema.
33Indro ny Tompo ANDRIAMANITR’izao rehetra izao
fa manjera rantsana amin-kerisetra;
voakapa ny hazo mijoalajoala,
voadaboka ny hazo avo dia avo.
34Kapaina amin’ny famaky ny ala mikitroka,
nianjera ny sedera mijoalajoalan’i Libano#10.34 Libano: tendrombohitra tomandavana any avaratr’i Palestinina, ka malaza noho ny ala sedera ao aminy; jereo 37.24..
Voafantina amin'izao fotoana izao:
Isaià 10: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.