Isaià 13
13
Ny fiafaràn’i Babilôna
1Hafatra momba an’i Babilôna#13.1 Ny amin’i Babilôna dia jereo Is 21.1-10; 47.1-15; Jer 50–51; Apôk 17–18. araka ny fahitàn’i Isaià, zanakalahin’i Amôtsa.
2Hoy ny TOMPO hoe: «Manangàna faneva
eo an-tendrombohitra mangadihady.
Ampandreneso amin’ny koka lava ireo mpiady.
Hofahofay tanana izy mba hiditra
amin’ny vavahadin’ny miaramila manolo-tena#13.2 Ny vavahadin’ny miaramila manolo-tena dia heverina fa toerana dinganin’ireo miaramila manolo-tena ho mariky ny firotsahany an-tsitrapo (ampit Mpits 5.2,9)..
3Izaho mihitsy no mibaiko ireo voatokana ho Ahy
Izaho koa no niantso ireo mpiady mahery,
dia ireo faly handresy ho voninahitro
mba hanehoana ny fahatezerako.»
4Henoy izany horakoraka any an-tendrombohitra
fa toy ny feon’ny vahoaka marobe.
Henoy izany fitabatabana
ataon’ny fanjakana sy firenena maro tafavory:
ny TOMPOn’izao rehetra izao
no misafo ny andian-tafika hiady.
5Tonga avy any an-tany lavitra ireo,
avy any am-paravodilanitra any
hoenti-mandrava manontolo io tany io:
ny TOMPO sy ireo fitaovan’ny fahatezerany izany.
6Manaova kiakiakam-pisaonana,
satria akaiky ny andron’ny TOMPO;
toy ny loza tsy hay tohaina no firongany
avy amin’Andriamanitra Tsitoha#13.6 Jl 1.15..
7Noho izany dia hiraviravy tanana ny besinimaro
ary ho ketraka ny fon’ny olona rehetra.
8Ho very hevitra tokoa izy
noho ny fanaintainana sy ny fahoriana mahazo azy
ka hiolanolana toy ny vehivavy hiteraka.
Talanjona izy mifampijery
ka mivaloarika ny tarehiny.
9Indro avy ny andron’ny TOMPO,
andro ombàm-pahatezerana tsy azo ivalozana
sy isehoam-pahavinirana mirehitra,
ka hahatonga izany tany izany ho hay
sady handringanana ny mpanota tsy ho ao intsony.
10Ny kintana eny an-danitra, na ny telonohorefy aza,
dia tsy hampamirapiratra ny fahazavàny intsony;
vao miposaka ny masoandro dia ho maizina,
ary ny volana tsy handefa ny tarany intsony#13.10 Ampit Ezek 32.7; Mt 24.29; Mk 13.24-25; Lk 21.25; Apôk 6.12-13; 8.12..
11Hoy ny Tompo hoe: «Hirotsaka an-tsehatra Aho
hamaly ny faharatsian’izao tontolo izao
sy ny heloka vitan’ny olon-dratsy.
Hatsahatro ny fireharehàn’ny mpiavonavona
ary haetriko ny rehaky ny mpanao didy jadona.
12Hataoko mahalana ny olombelona
ka ho saro-tadiavina noho ny volamena madio,
mahalana ka ho saro-tadiavina
noho ny volamena avy any Ôfira aza#13.12 Jereo 1 Mp 9.28 sy nta..»
13Ny lanitra dia hihozongozona
ary ny tany hihovitrovitra eo amin’ny toerany
noho ny fahatezeran’ny TOMPOn’izao rehetra izao,
dia amin’ny andro hirehetan’ny fahavinirany.
14Amin’izany ny olona ho tahaka ny gazela hazaina
na ho tahaka ny ondry aman’osy tsy misy mpiandry,
ka samy ho lasa any amin’ny fireneny avy
sy handositra any amin’ny taniny avy.
15Izay rehetra ho hita ao Babilôna
dia ho gorobaky ny tsipîka,
ary izay rehetra ho tratra ao
dia hovonoina amin’ny sabatra.
16Hotorotoroina eo imasony ny zanany madinika
ary horobaina ny tranony sady hosavihina ny vadiny.
17Hoy ny TOMPO hoe: «Indro hampirisihiko hamely azy
ny Medianina izay tsy tia volafotsy
sady tsy mankamamy volamena.
18Haringany amin’ny tsipîkany ny tanora,
tsy hamindrany fo ny zaza vao teraka,
ary tsy hiantrany akory ny ankizy.»
19I Babilôna, izay ravaky ny fanjakana
sady tabiha sy reharehan’ny Babilônianina,
dia horavàn’Andriamanitra
tahaka an’i Sôdôma sy i Gômôra#13.19 Jereo 1.7 sy nta..
20Tsy honenana intsony i Babilôna
ary tsy hisy mponina mandrakizay.
Tsy hanorin-day ao ny mpifindrafindra lasy
ary tsy hampandry ondry ao ny mpiandry ondry.
21Sakadia no hiorim-ponenana ao
ary vorondolo no hameno ny tranony.
Vorombe no hanao akany ao
ary osidia no hifalihavanja ao#13.21 Ampit Is 34.14; Tsef 2.14; Apôk 18.2..
22Ny fosa no hinaonaona ao an-tranobeny,
ary ny amboadia no honina ao an-dapany.
Akaiky ho tonga ny oran’i Babilôna;
ary tsy hisy hataka andro intsony ho azy.
Voafantina amin'izao fotoana izao:
Isaià 13: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.