Isaià 42
42
Ilay mpanompon’ny Tompo
(tononkira voalohany)
1Indro ny mpanompoko#42.1 Ny fiandohan’ny and 1 dia tsiahivina ao amin’ny Mt 3.17; 17.5; Mk 1.11; Lk 3,22; 9.35. –Ny and 1-4: jereo Mt 12,18-21. izay tohanako,
ilay voafidiko sady ankasitrahiko.
Napetrako tao aminy ny Fanahiko
mba hamoahany ny lamina ara-drariny ho an’ny firenena.
2Tsy hiantsoantso izy na hampiaka-peo
sady tsy hanao kabary eny an-dalambe.
3Tsy hotapahiny ny volotara folaka,
ary tsy hovonoiny ny lahin-jiro manetona
fa hamoaka ny lamina ara-drariny tokoa izy.
4Tsy ho reraka na ho kivy izy
mandra-panoriny ny lamina ara-drariny amin’ny tany
fa hiandry dia hiandry ny lalànany
ireo mponina any amin’ny nosy.
Fahazavana ho an’ny firenena rehetra
5Izao no tenin’ny TOMPO Andriamanitra
Izay nahary ny lanitra sy nanenjana azy hidadasika,
Izay namelatra ny tany mbamin’ny zava-maniry vokariny,
Izay manome fofonaina ho an’ny olona eo aminy
sy fanahy ho an’ny mponina miriaria ao#42.5 Ampit 17.24-25.;
eny, izao no tenin’ny TOMPO Andriamanitra
amin’ilay mpanompo voafidiny:
6«Izaho TOMPO no niantso anao
araka ny fahamarinana
ka nitantana anao.
Izaho no niaro anao ka nanendry anao
ho antoky ny fanekempihavanako amin’ny olona
ary koa ho fahazavan’ireo firenena#42.6 fanekempihavanako... firenena: jereo 49.8; Lk 2.32; Asa 13.47; 26.23..
7Dia hampahiratra ny mason’ny jamba ianao,
hamoaka ny gadra avy ao am-ponja,
eny, hamoaka ireo mipetraka anaty haizina
hialany amin’ny trano nihazonana azy.»
8Izaho no TOMPO, izany no anarako
ka ny voninahitro tsy homeko ny hafa
ary ny fiderana Ahy tsy avelako ho an’ny sampy.
9Indro efa lasa iny ny zava-niseho voalohany#42.9 Jereo 41.22 sy nta.;
koa zava-baovao indray no ambarako aminareo.
Ary hampahafantariko anareo izany,
na dia mbola tsy miseho aza.
Mirotsaka an-tsehatra ny Tompo
10Mihirà hira vaovao ho an’ny TOMPO;
miderà Azy avy any am-paran’ny tany
ianareo mpivezivezy eny an-dranomasina
sy ianareo mponina any amin’ny nosy.
11Aoka hanandra-peo ny tanàna any an-taniefitra
sy ny any an-toby fonenan’ny Kedarita#42.11 Kedarita: foko anankiray any Arabia avaratra; jereo 21.16 sy nta. –Harambato : angamba i Petrà , tanànamimanda ao amin’ny taniefitra edômita izany.!
Aoka hihoby ny mponina any amin’ny Harambato;
avy any an-tampon-tendrombohitra any
no aoka hanaovany hiram-pifaliana!
12Hanome voninahitra ny TOMPO anie ireny;
ary aoka hitory ny fiderana Azy
ny mponina any amin’ny nosy lavitra!
13Mandroso toy ny miaramila maherifo ny TOMPO
ary vonona toy ny mpiantafika zatra ady.
Miantsoantso manao hiakan’ady Izy;
ka maneho hery hihantsiana an’ireo fahavalony.
Ny fikasan’ny Tompo
14Efa hatry ny ela Aho no nangina,
ka tsy nanao na inona na inona, hoy ny TOMPO.
Fa izao kosa Aho mitaraina toy ny vehivavy miteraka
izay sempotsempotra sady tsy avy miaina.
15Hovolosako ny tendrombohitra sy ny havoana,
ka hataoko maina ny ahi-maitso rehetra ao aminy;
hovako ho tany hay ny ony
ary hataoko maina ny farihy.
16Ny jamba hampandehaniko
amin’ny lalana tsy mbola fantany;
sakeli-dalana tsy mbola hainy
no hitarihako azy ireo.
Hovako ho mazava ny haizina eo anatrehany
ary ho mahitsy ny lala-miolakolaka.
Hotanterahiko ireo fikasàko ireo
fa tsy hisy havelako velively.
17Aoka hianòtra amin-kenatra tokoa
ianareo mitoky amin’ny sampy
sady milaza amin’ny sarivongana hoe:
«Ianareo no andriamanitray.»
Vahoaka jamba sy marenina
18Ianareo marenina, aoka handre;
ary ianareo jamba, mahirata mba hahita.
19Iza moa no jamba raha tsy ny mpanompoko?
Ary iza no marenina tahaka ny iraka izay irahiko?
Eny, iza no jamba tahaka ny mpitondrateniko,
ary marenina tahaka ny mpanompoko?
20Betsaka ny zavatra hitany
nefa tsy nisy tadidiny;
manongilan-tsofina hihaino izy,
nefa tsy misy zavatra reny.
21Fa sitraky ny TOMPO ho fandresen’ny fahamarinany
ny haneho fa lehibe sy heni-boninahitra ny lalànany,
22ka indro ity vahoaka fa voaroba sy voasambotra:
naiditra am-ponja avokoa izy rehetra
ary nahiboka an-tranomaizina.
Voaroba nefa tsy nisy namonjy,
voasambotra nefa tsy nisy nanao hoe: «Avereno!»
23Iza aminareo no hanongilan-tsofina
handre izao teny izao
ka ho mailo hihaino azy amin’ny ho avy?
24Iza no nanolotra ny firenen’i Jakôba
tamin’ny mpisambotra?
Iza no nanolotra ny vahoaka Israely
tamin’ny mpandroba?
Moa ve tsy ny TOMPO izay nanotantsika?
Satria ny vahoaka Israely tsy nety handeha
tamin’ny lalana nosoritany,
ary tsy nihaino ny lalànany.
25Koa nazeran’ny TOMPO tamin’ny vahoaka Israely
ny fahatezerany mirehitra sy ny ady mangotraka.
Nandoro ny faritra manodidina an’i Israely izany,
saingy tsy fantany velively;
nandoro tao anatiny mihitsy aza izany,
nefa tsy nahoany akory.
Voafantina amin'izao fotoana izao:
Isaià 42: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.