Mpitsara 17
17
I Mikà sy ny toeram-pivavahany manokana
1Tao amin’ny faritra be tendrombohitra any Efraîma#17.1 Ny faritra be tendrombohitra any Efraîma dia ao avaratr’i Jerosalema. dia nisy lehilahy natao hoe Mikà. 2Indray andro dia hoy izy tamin’ny reniny:
–Tsaroanao moa fony nisy naka ny volanao sekela volafotsy 1 100, ka nanaovanao ozona izay reko tokoa ny nanononanao azy? Ao amiko io vola io, ary izaho ihany no naka azy.
Dia hoy ny reniny taminy:
–Hotahin’ny TOMPO anie ianao, anaka!
3Dia naverin’i Mikà tamin’ny reniny ny vola sekela 1 100; fa hoy kosa ny reniny taminy:
–Efa natokako mihitsy ho an’ny TOMPO ireo vola ireo ka hankinina aminao, anaka, mba hanamboarana sampy atao sarivongana metaly narendrika. Indro àry averiko aminao izy izao.
4Kanjo naverin’i Mikà tamin’ny reniny indray ireo. Ary nakan-dreniny sekela roanjato izany, ka nomeny ny mpandrendrika. Dia nanamboatra sampy atao sarivongana metaly narendrika io; ary napetraka tao an-tranon’i Mikà izany.
5Fa ity lehilahy atao hoe Mikà ity dia nanana toeram-pivavahana iray sady efa nampamboatra koa efôda mbamin’ny terafima; ary ny zanany lahy anankiray no natokany ho mpisorona. 6Tamin’izany fotoana izany dia tsy mbola nisy mpanjaka tany Israely, ka samy nanao izay heveriny ho mety avy ny olona tsirairay.
7Nisy zatovo levita anankiray nivahiny tao Betlehema any Joda, tanàna anisan’ny fokon’i Joda. 8Niala tao Betlehema izy mba hivahiny any amin’izay azony hitoerana. Raha mbola nandeha izy, dia tonga tany amin’ny faritra be tendrombohitra any Efraîma ka tafapaka teo amin’ny tranon’i Mikà. 9Dia nanontany azy i Mikà hoe:
–Avy aiza moa ianao?
Ka novaliany hoe:
–Levita avy any Betlehema any Joda aho, fa mandeha hivahiny any amin’izay azoko hitoerana.
10Dia hoy i Mikà taminy:
–Mijanòna eto amiko fa hataoko mpisorona ato anatin’ny fianakaviako ianao. Sekela volafotsy folo isan-taona sy fitafiana ary sakafo izay ilainao no homeko anao.
Dia niditra ny trano ilay levita, 11ary nanaiky hitoetra tao amin’i Mikà izay nitondra azy toy ny zanany lahy. 12Ary natokan’i Mikà ilay levita ka tonga mpisorony ary nipetraka teo aminy. 13Dia hoy i Mikà anakampo hoe: «Azoko antoka izao fa hanisy soa ahy ny TOMPO, satria ity levita ity no efa tonga mpisoroko.»
Voafantina amin'izao fotoana izao:
Mpitsara 17: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.