Mpitsara 5
5
Ny tononkiran’i Debôrà#5.1 Ity tononkira tranainy dia tranainy ity dia mirakitra andian-teny sarotra faritana ny heviny.
1Tamin’izany andro izany i Debôrà dia nihira niaraka tamin’i Baràka zanakalahin’i Abinôhama ka nanao hoe:
2Efa samy vonon-kiantafika
ny vatan-dehilahy eto Israely#5.2 Fitenenana volo misandrahaka no hita eto ara-bakiteny. Kanefa toa fomban’ny miaramila vonon-kiady izany.,
nanolo-tena hiady ny vahoaka;
koa isaory ny TOMPO izany!
3Mihainoa ianareo, ry mpanjaka,
manongilàna sofina ianareo, ry mpifehy,
fa hihira ho an’ny TOMPO aho;
eny, hikaloako salamo
ny TOMPO Andriamanitr’i Israely.
4Rehefa tonga avy tany Edôma Ianao, Tompo ô,
ka nidina avy teny an-tendrombohitra Sehira#5.4 Sehira: jereo Gen 32.4.,
dia nihovotrovotra ny tany,
ary nandrotsaka orana ny rahona,
dia ora-mikija avy any an-danitra;
5ny tendrombohitra niempo teo anatrehanao,
ry TOMPO niseho tany Sinay#5.5 Jereo Eks 19.18.;
ny tendrombohitra niempo teo anatrehanao,
ry TOMPO Andriamanitr’i Israely.
6Tamin’ny andron’i Samgary zanakalahin’i Hanata
sy tamin’ny andron’i Jahela#5.6a Samgary: jereo 3.31. Jahela: jereo 4.17-22.
dia nidify ity faritra ity
ny andian’ireo mpitaingin-drameva#5.6b nidify...ireo mpitaingin-drameva: ny Kanahanita tao an-tany lemaka dia nisakana ny fivezivezen’ny olona sy ny andian-drameva teo amin’ny foko avaratra sy tamin’ny faritra be tendrombohitra any Efraîma.;
fa nanaraka lalan-kafa ireo mpandeha.
7Tsy nisy lehibe intsony,
tsy nisy lehibe intsony teto amin’i Israely,
mandra-pisehoko izaho Debôrà
ho toy ny reny teto amin’i Israely.
8Nifidy andriamani-baovao ny olona
ka vetivety dia vaky ny ady;
nefa zara raha nahitana ampinga na lefona iray
ho an’ny vatan-dehilahy andiany efapolo teto Israely.
9Ny ahy ny fo dia miandany
amin’ireo komandin’i Israely;
ny foko dia miandany
amin’ireo vahoaka nanolo-tena hiady;
koa isaory ny TOMPO izany!
10Ianareo izay mitaingina borikivavy fotsy,
ianareo izay mipetraka eo ambony karipetra,
ianareo izay mandeha eny an-dalana,
mankalazà ny TOMPO noho ny fandresena#5.10 Tamin’izay fotoana izay ny borikivavy no fitaingin’ireo lehibe sy olona manan-daza; ny karipetra eto dia karipetra eo amin’ny laselim-borikivavy (10.4; Nom 22.26).!
11Teo akaikin’ny fampisotroan-drano,
ireo mpizara rano ho an’ny biby fiompy
no nankalaza ny fandresen’ny TOMPO,
dia fandresena nomeny ireo lehiben’i Israely
fony injay nirotsaka hiady
teo am-bavahadin’ny tanàna
ilay vahoakan’ny TOMPO.
12Mifohaza, mifohaza ianao, ry Debôrà,
mifohaza, mifohaza ianao, ka miventesa hiran’ady.
Ry Baràka zanakalahin’i Abinôhama,
mitsangàna ka ataovy babo ireo mpamabo anao.
13Nirohotra nankany amin’ny lehibeny ireo Israelita
ary nivory teo amiko ny vahoakan’ny TOMPO
niaraka tamin’ireo lehilahy mahery fo.
14Ireo taranaka avy any Efraîma
dia efa tonga ao an-dohasaha,
ka narahin’ny fokon’i Benjamîna
izay nifangaro tamin’ny andian-tafiny.
Nipoitra avy amin’ny terak’i Makira#5.14 Ny terak’i Makira dia anisan’ny foko manasita, jereo Jos 17.1. ireo mpitari-tafika
ary avy amin’ny fokon’i Zebolòna ireo manampahefana.
15Ireo lehiben’i Jisakara dia niandany tamin’i Debôrà;
ary nifikitra tamin’i Baràka ny fokon’i Jisakara
ka niriotra nanaraka azy teny amin’ny tany lemaka.
Tao amin’ny fokon’i Reobena#5.15 Ny fokon’i Reobena dia tsy tapa-kevitra ny handray anjara amin’ny ady. Misy foko hafa koa homen-tsiny toy izany, dia ny foko tao Gilehada ary ny foko danita sy aserita (and 17). kosa
dia adihevitra tsisy farany.
16Nahoana ianareo no nijanona
teny anelanelan’ny vala
hihaino ny siotsiokan’ny mpiandry ondry?
Tao amin’ny fokon’i Reobena tokoa
dia adihevitra tsisy farany.
17Tsy nihetsika koa ny terak’i Gilehada#5.17a Gilehada: anarana mahazatra iantsoana ny faritra atsinanan’i Jôrdàna, izay niorenan’ny foko gadita sy ny antsasa-poko manasita (jereo Nom 32.1).
teny an-dafy atsinanan’i Jôrdàna.
Ary nahoana ny fokon’i Dana#5.17b Tamin’izany andro izany ny fokon’i Dana dia mbola tao andrefan’ny faritr’i Benjamîna (jereo 18.1 sy nta). Angamba niasa ho tantsambo tamin’ny sambo fenisianina ny Danita.
no nipetra-potsiny teo anilan’ny sambony?
Ny fokon’i Asera#5.17d Ny fokon’i Asera dia nahazo ny lemaka amoron-tsiraka eo avaratry ny tendrombohitra Karmela. koa nonina teo amoron-dranomasina
ka nijanona teo amin’ny fitodian-tsambony.
18Ny vahoakan’i Zebolòna mbamin’i Naftalỳ kosa
dia nanaiky hanao vy very ny ainy
teo an-tany fiadiana, na dia ho faty aza!
19Tonga hiady ireo mpanjakan’i Kanahàna
ka dia nanafika tao Tahenàka,
teo akaikin’ny loharanon’i Megidao#5.19 I Tahenàka sy i Megidao dia tanàna kanahanita teo amoron’ny lemaka Jizrehela, ilany atsimo.,
nefa tsy nahazo na babo na volafotsy!
20Avy eny an-danitra eny
no nandray anjara tamin’ny ady koa ny kintana,
ka ny fihodinkodinana arahiny
no niadiany tamin’i Siserà.
21Renirano efa nikoriana hatry ny ela,
dia ny renirano Kisôna#5.21 Ny renirano Kisôna: jereo ny naoty momba ny 4.7,
no nipaoka ny fahavalo.
Aoka mba hiroso hiady amin-kerim-po koa aho!
22Dia nihazakazaka mafy ny soavaly;
ka nikatrokatroka ny hitsa-kitrony.
23Ozòny ny tanàna Merôza#5.23 Merôza: 12 km eo atsimo atsinanan’i Kedesa any Naftalỳ.,
hoy ilay anjelin’ny TOMPO.
Ozòny, ozòny ny mponina ao aminy
noho izy tsy tonga hikatroka
niaraka tamin’ireo mahery fo
mba hanampy ny TOMPO hiady.
24 Hotahîna mihoatra noho ny vehivavy rehetra kosa anie
i Jahela izay vadin’i Hebera lehilahy kenita!
Eny, hotahîna mihoatra noho ny vehivavy rehetra
izay mitoetra an-day anie izy!
25Fa rano no nangatahin’i Siserà;
nefa ronono kosa no nomeny azy,
dia rononomandry tao anaty tsatokaty marevaka.
26Avy eo noraisiny tamin’ny tanan-kavia ny tsimaday
ary tamin’ny tanan-kavanana ny tantanan’ny mpiasa,
dia nasiany ka vaky ny lohan’i Siserà;
ary nataony gorobaka ny fihirifany.
27Teo an-tongo-dravehivavy izy
no nitolefika sy nianjera ary nitsitra;
teo an-tongo-dravehivavy teo izy
no nitolefika sy nianjera;
teo amin’ny nahatolefika azy teo izy
no nianjera ka maty.
28Nitazana teo am-baravarankely ny renin’i Siserà,
teo anelanelan’ny makarakara izy no nitaraina hoe:
«Nahoana àry no mbola tsy tonga ihany ny kalesiny?
Nahoana àry no mitaredretra any ny kalesiny?»
29Izay hendry indrindra tamin’ireo andriambavy namany
no nanome azy izao valinteny manaraka izao,
ka izany koa no naverimberin’ny tenany hoe:
30«Manangona babo izay ny miaramila,
ary mbola eo am-pizaràna azy:
tovovavy iray na roa isaky ny mahery fo;
karazan-damba miloko samy hafa
sady vita peta-kofehy ho an’i Siserà;
eny, lamba vita peta-kofehy anatiny sy ivelany
no hahodidina ny vozon’ilay mpamabo.»
31TOMPO ô, aoka ny fahavalonao rehetra
ho faty tahaka an’i Siserà avokoa;
fa ny sakaizanao kosa anie ho toy ny masoandro
fony izy miposaka mamirapiratra mafy indrindra!
Dia nandry feizay ny tany nandritra ny efapolo taona.
Voafantina amin'izao fotoana izao:
Mpitsara 5: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.