Jeremià 22
22
1Izao no voalazan’ny TOMPO tamin’i Jeremià:
–Midîna any an-dapan’ny mpanjakan’i Joda ianao ka ambarao any ity hafatra ity 2ary lazao hoe: «Mihainoa ny tenin’ny TOMPO ianao, ry mpanjakan’i Joda izay mipetraka eo amin’ny sezafiandrianan’i Davida, dia ianao sy ny manamboninahitrao ary ny vahoakanao izay miditra amin’ireto vavahadin’ny lapa ireto.» 3Izao no lazain’ny TOMPO: Mampihara ny rariny sy ny hitsiny, afaho eny an-tanan’ny mpitsentsitra ireo olona volosany. Aza mampijaly na misetrasetra ny vahiny sy ny kamboty ary ny mpitondratena; ary aza mamono ho faty ny tsy manan-tsiny amin’ity toerana ity. 4Raha manaraka tokoa izao teny izao ianareo, dia mbola hisy ihany mpanjaka hipetraka eo amin’ny sezafiandrianan’i Davida, ka handehandeha mitaingin-tsoavaly na kalesy. Ho afaka mandalo hatrany amin’ny vavahadin’ity lapa ity izy sy ny manamboninahiny ary ny vahoakany. 5Fa raha tsy hihaino izany hafatra izany kosa ianareo, dia ny tenako no ianianako ary Izaho TOMPO no miteny hentitra, fa ho rava tokoa ity lapa ity#22.5 Ampit Mt 23.38; Lk 13.35..
6Eny, izao no lazaiko momba ny lapan’ny mpanjakan’i Joda:
Na dia tsara tahaka ny alan’i Gilehada,
sy ny tendron’i Libano aza ianao amiko,
dia hataoko tonga taniefitra
sy tanàna tsy misy mponina.
7Hanetsika mpandrava hamely anao Aho,
dia mpandrava izay samy ary fitaovana.
Hokapainy ny sederanao voafantina
ka hatsipiny any anaty afo.
8Firenena maro no handalo eo akaikin’ity tanàna ity ka hifanontany hoe: inona no antony nahatonga ny TOMPO hamely ity tanàna ity tahaka izao? 9Dia hovaliana hoe: «Satria nandao ny fanekempihavanan’ny TOMPO Andriamaniny izy, ka niankohoka tamin’ny andriamani-kafa sady nivavaka tamin’ireny.»
Ny amin’i Salòma, mpandimby an’i Josià
10Ry olon’i Joda,
Aza itomanianareo ny maty,
dia i Jôsià mpanjaka;
ary aza anaovanareo fisaonana izy;
fa itomanio dia itomanio kosa#22.10 Maty tamin’ny ady tao Megidao tamin’ny 609 tal J.K i Jôsià (jereo 2 Mp 23.29-30). Ny zanany lahy Joahaza, nantsoina koa hoe Salòma (jereo and 11; 1 Tan 3.15), no nanjaka nandimby nandritra ny telo volana mialoha ny nanondranana azy ho sesi-tany tany Ejipta (jereo 2 Mp 23.30-34; 2 Tan 36.1-4).
ilay handeha, dia i Salòma mpanjaka,
satria tsy hiverina intsony izy
ka tsy hahita intsony ny tany nahaterahany.
11Eny, izao no lazain’ny TOMPO ny amin’i Salòma mpanjakan’i Joda izay nandimby an’i Jôsià rainy ary vao nandao ity toerana ity: «Tsy hiverina intsony izy. 12Ho faty any amin’ny toerana izay nitondrana azy ho babo any izy, fa tsy hahita ity tany ity intsony.»
Fitsikerana an’i Jôiakima
13Lozanao, ry Jôiakima#22.13 I Jôiakima, zanakalahin’i Jôsià iray hafa koa izay notendren’ny Farao Nekao ho mpanjaka hisolo an’i Joahaza-Salòma. Nanjaka nandritra ny taona 609-598 tal J.K izy (jereo 2 Mp 23.34–24.6; 2 Tan 36.5-7).,
fa nanorina ny lapanao ianao
nefa tsy araka ny hitsiny,
ary nanampy rihana ianao
nefa tsy araka ny rariny
fa nampiasainao maina ny namanao
ka tsy nomenao ny karamany.
14Hoy ianao anakamponao hoe:
«Manorina lapa miezinezina ho ahy aho
miaraka amin’ny rihana malalaka».
Dia loahanao hisy varavaran-kely izy
sady petahanao valin-drihana sedera
ary nasainao nolokoana mena ny rindriny.
15Te haneho ny maha mpanjaka ve ianao
ka nifidy ny hazo sedera
mba hampaningana anao?
Moa tsy nihinana sy nisotro
tahaka ny besinimaro ve ny rainao
sady nampihatra ny rariny sy ny hitsiny?
Ary nahitany hasambarana izany.
16Notsarainy ara-drariny tokoa
ny mahantra sy ny malahelo;
ary nahitany hasambarana izany.
Moa tsy izay manao toy izany ve
no tena mahalala marina Ahy TOMPO,
hoy ny teny hentitra ambarako?
17Fa ianao kosa tsy nijery
afa-tsy ny tombontsoanao,
ianao kosa tsy nieritreritra
afa-tsy ny hamono ny tsy manan-tsiny ho faty
ary ny hanao famoretana sy herisetra.»
18Noho izany, dia izao no lazain’ny TOMPO ny amin’i Jôiakima, zanakalahin’i Jôsià sady mpanjakan’i Joda:
Raha maty izy, dia tsy hisaonana,
na hifampitenenan’ny olona hoe:
«Loza ity, ry rahalahy! Loza ity, ranadahy!»
«Loza ity, ry rahavavy! Loza ity, ranabavy!»
Tsy hisy hitomany azy ka hanao hoe:
«Indrisy, ry tompokolahy!»
«Indrisy, ry ilay hajaina!»
19Halevina toy ny fandevina boriky izy;
ka ny fatiny hotaritarihina sy hariana
any ivelan’ny vavahadin’i Jerosalema.
Henatra sy fahafaham-baràka ho an’i Jerosalema.
20Miakara any an-tampon’i Libano
ka manaova koka lava, ry Jerosalema;
ataovy re any Basàna ny feonao
manaova koka lava
eny amin’ny havoanan’i Habarima#22.20 Miakara... Jerosalema: eto, toy ny any an-toeran-kafa dia aseho ho miendrika olona amin’ny toetran’ny vehivavy tanora iray i Jerosalema. –Ny havoanan’i Habarima: tangoron-tendrombohitra misy ny tendrombohitra Nebao (ampit Nom 27.12; Deot 32.49), any avaratry ny faritanin’i Môaba.
fa potika ny sakaizanao rehetra.
21Efa nampitandrina anao Aho
fony ianao nandry fahalemana
nefa novalianao hoe: «Tsy te hihaino aho.»
Fanaonao hatramin’ny fahazazana izany
ka tsy nety nihaino ny feoko mihitsy ianao.
22Indaosin’ny rivotra
ny mpitondra anao rehetra
ary lasan-ko babo ireo sakaizanao.
Ho menatra sy ho afa-baràka ianao
noho ny ratsy rehetra nataonao.
23Nilamina erỳ ianao
niteronterona teny Libano,
nanana akany tao anatin’ny sedera#22.23 Ny fisian’ny andry sy fanaka sedera tao amin’ny lapan’ny mpanjaka tao Jerosalema (jereo 21.14; 22.6-7) dia nitarika ny mpaminany hanao sary an’ohatra amin’ny tendrombohitra mitomandavana any Libano.;
kanjo akory izato sentonao
fa nahazo anao tampoka ny fanaintainana
tahaka ny fahararin’ny vehivavy miteraka!
Momba an’i Kônià, zanakalahin’i Jôiakima
24Hoy ny teny hentitry ny TOMPO hoe: «Velona Aho ka mianiana fa na dia toy ny peratra fanombohan-kase eo an-tanako havanana aza ianao, ry Kônià#22.24 Kônià: fanafohezana ny hoe Jekônià (24.1), anarana hafa niantsoana ny mpanjaka Jôiakina. Efa nanjaka telo volana izy raha tonga ny fiondranam-babo voalohany tamin’ny 597 tal J.K; jereo 2 Mp 24.8-16; 2 Tan 36.8-10. zanakalahin’i Jôiakima sady mpanjakan’i Joda, dia hoesoriko hiala eo. 25Hatolotro ho eo an-tanan’ireo mitady hahafaty anao ianao, dia ireo olona atahoranao fatratra, izany hoe i Nebokadnetsara mpanjakan’i Babilôna sy ny andian-tafiny. 26Horoahiko ianao sy ny reninao ho any amin’ny tany izay hafa noho ny tany nahaterahanareo, ka any no hahafatesanareo mianaka. 27Haniry mafy hiverina atỳ amin’ny taninareo ianareo, nefa tsy ho tafaverina atỳ intsony.»
28Ao ny manontany hoe: «Moa vilany vaky tsy ilaina ve na fanaka tsy misy vidiny intsony ity lehilahy atao hoe Kônià ity? Nahoana no nakifika izy sy ny taranany ka noroahina ho any amin’ny tany tsy fantany akory?»
29–Ry taniko ô, ry taniko ô, ry taniko ô, henoy ny tenin’ny TOMPO. 30Izao no lazainy: «Aoka iny lehilahy iny hosoratana ho toy ny tsy niteraka sady tsy nahomby tamin’ny androm-piainany. Fa tsy hisy taranany hahazo hipetraka hanjaka eo amin’ny sezafiandrianan’i Davida na hifehy an’i Joda intsony.»
Voafantina amin'izao fotoana izao:
Jeremià 22: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.