Nomerỳ 22
22
I ISRAELY TAO AMIN’NY LEMAK’I MÔABA
Ny tantaran’i Balahama:
Ny antson’i Balàka mpanjaka
1Niainga indray ny Israelita ka nitoby tao amin’ny lemak’i Môaba, teo an-dafy atsinanan’i Jôrdàna tandrifin’i Jerikao. 2-4I Balàka, zanakalahin’i Tsipôra, no mpanjakan’i Môaba tamin’izay fotoana izay. Fantany tsara izay rehetra nataon’ny Israelita tamin’ny Amôrita; ka raiki-tahotra mafy izy sy ny Môabita sady nangorohoro nahita ny Israelita izay vahoaka marobe. Dia hoy ity mpanjaka tamin’ny loholon’ny Midîanîta:
–Ankehitriny ireto vahoaka marobe ireto dia hanimba ny faritra rehetra manodidina antsika, toy ny firaokan’ny omby ny ahitra eny an-tsaha!
5Dia naniraka olona i Balàka hankany amin’i Balahama zanakalahin’i Behôra any Petôra amoron’ny ony Eofrata, any amin’ny tanin’ny Hamavita#22.5 Balahama: jereo 2Pt 2.15-16; Joda 11. –Petôra: toerana tsy fantatra, mety ho any avaratr’i Siria ankehitriny. –ny Hamavita dia mponina tao Siria avaratra fahizany.; ka izao no teny nampitondrainy ho an’i Balahama: «Misy vahoaka niala tany Ejipta tonga eto amiko, ary mandrakotra ny taniko sady mitoby eto anatrehako. 6Koa mba tongava atỳ re ianao hanozona io vahoaka io, fa mahery noho izaho izy; angamba haharesy azy aho amin’izay ka haharoaka azy hiala amin’ny tany. Satria fantatro fa izay tsofinao rano dia voatsodrano ary izay ozoninao dia voaozona.» 7Dia lasa ireo loholona môabita sy midianita nitondra izay hanakaramana ilay mpanao fankatoavana. Rehefa tonga tany amin’i Balahama ireo, dia nilaza ny tenin’i Balàka. 8Ary hoy i Balahama tamin’ny iraka:
–Mandria eto anio alina ianareo fa homeko valin-teny araka izay holazain’ny TOMPO amiko.
Dia nijanona tao amin’i Balahama ireo olo-manan-kajan’i Môaba. 9Ary nankao amin’i Balahama kosa Andriamanitra ka nanontany azy hoe:
–Iza moa ireo lehilahy tonga ato aminao ireo?
10Dia hoy i Balahama tamin’Andriamanitra:
–I Balàka zanakalahin’i Tsipôra sy mpanjakan’i Môaba no naniraka olona hiteny amiko hoe: 11«Ilay vahoaka izay niala tany Ejipta dia mandrakotra ny taniko. Koa mba tongava atỳ re ianao, hanozona azy; angamba haharesy azy aho amin’izay ka haharoaka azy.»
12Ary hoy i Andriamanitra tamin’i Balahama:
–Tsy handeha hiaraka aminy ianao ary tsy hanozona koa io vahoaka izay efa notahîko io.
13Ny ampitso maraina, rehefa nifoha i Balahama, dia niteny tamin’ireo olo-manan-kaja nirahin’i Balàka hoe:
–Miverena any amin’ny taninareo, fa tsy navelan’ny TOMPO hiaraka aminareo aho.
14Dia lasa ireo olo-manan-kajan’i Môaba niverina tany amin’i Balàka, ka nilaza taminy hoe: «Tsy nety niaraka taminay i Balahama.» 15Nefa mbola nandefa olo-manan-kaja hafa maro kokoa sady malaza noho ny teo aloha i Balàka. 16Rehefa tonga tany amin’i Balahama ireo, dia nanao taminy hoe:
–Izao no lazain’i Balàka, zanakalahin’i Tsipôra: «Aoka re mba tsy holavinao ny hankanesanao atỳ amiko e! 17Fa hitafotafo mihitsy ny voninahitra izay homeko anao, ary hataoko avokoa izay holazainao amiko rehetra. Koa mba tongava atỳ re ianao hanozona io vahoaka io.»
18Fa hoy i Balahama namaly ireo mpanompon’i Balàka:
–Na dia homen’i Balàka volafotsy sy volamena mahafeno ny tranony aza aho, dia tsy afaka hanao zavatra na kely na lehibe izay mifanohitra amin’ny tenin’ny TOMPO Andriamanitro. 19Nefa mijanòna ihany atỳ anio alina, hahafantarako sao mbola misy holazain’ny Tompo amiko.
20Tamin’ny alina, dia nankao amin’i Balahama Andriamanitra ka nanao taminy hoe:
–Raha haka anao no nahatongavan’ireo olona ireo, dia mandehana miaraka aminy; kanefa izay holazaiko aminao ihany no hataonao.
21Ny ampitso maraina dia nanisy lasely ny borikivaviny i Balahama ka niainga niaraka tamin’ireo olo-manan-kajan’i Môaba.
Ny borikivavin’i Balahama
22Tezitra mafy tamin’i Balahama Andriamanitra raha nahita azy nandeha ihany; ary nijanona teo an-dalana hisakana azy ny anjelin’ny TOMPO raha iny izy nizotra nitaingina ny borikiny sady narahin’ny mpanompony roa lahy iny. 23Hitan’ny boriky ilay anjelin’ny TOMPO nijanona teo amin’ny lalana sady nitana sabatra; dia nivily lalana ny boriky ka namantana tany amin’ny saha. Nokapohin’i Balahama ilay boriky mba hiverina amin’ny lalana. 24Ary ilay anjelin’ny TOMPO nijanona indray teo amin’ny lempona iray teo anelanelan’ny tanimboaloboka voafefy andaniny roa. 25Nony nahita ilay anjelin’ny TOMPO ity boriky dia nitampify teo amin’ny rindrina ka nanery ny tongotr’i Balahama teo. Dia nikapoka azy indray izy. 26Mbola nihoatra azy ireo fanindroany ilay anjelin’ny TOMPO ka nijanona teo amin’ny lalan-tery tsy ahafahana mivily na miankavanana na miankavia. 27Nony nahita ilay anjelin’ny TOMPO ity boriky, dia nandry teo ambanin’i Balahama. Vinitra aok’izany i Balahama ka nikapoka ny boriky tamin’ny tehina. 28Dia nampitenenin’ny TOMPO ilay boriky ka nilaza tamin’i Balahama hoe:
–Fa inona loatra no nataoko taminao no dia nokapohinao intelo aho?
29Ka hoy ny navalin’i Balahama azy:
–Satria namazivazy ahy ianao; fa raha nisy sabatra tetỳ amiko, dia efa novonoiko ho faty teo no ho eo ihany ianao!
30Ary hoy ilay boriky tamin’i Balahama:
–Boriky fitainginao hatramin’izay nanananao ahy aho, ka mba fanaoko ve ny manao toy izao aminao?
Dia hoy izy hoe:
–Tsy fanaonao izany!
31Tamin’izay dia nosokafan’ny TOMPO ny mason’i Balahama hahita ilay anjelin’ny TOMPO izay nijanona teo amin’ny lalana sady mitana sabatra. Dia niondrika i Balahama ka niankohoka tamin’ny tany. 32Fa hoy ilay anjelin’ny TOMPO taminy:
–Nahoana no nokapohinao intelo ny borikinao? Tonga aho hisakan-dalana anao, satria heveriko fa mankamin’ny fahaverezana ny dianao. 33Nahita ahy ny boriky ka intelo nivily ahy. Fa raha toa ka tsy nivily ahy izy, dia ianao no ho novonoiko ho faty teo no ho eo, fa izy kosa notsimbiniko ny ainy.
34Dia hoy i Balahama tamin’ilay anjelin’ny TOMPO:
–Nanota aho satria tsy nahafantatra fa ianao no nisakan-dalana ahy. Koa ankehitriny raha tsy tianao ny hankanesako any, dia hiverina hody aho.
35Fa hoy ny navalin’ilay anjelin’ny TOMPO azy:
–Tsia! Mandehana ihany miaraka amin’ireo olona ireo, saingy izay teny asaiko lazainao ihany no holazainao.
Dia nanohy ny diany niaraka tamin’ireo irak’i Balàka i Balahama.
Fihaonan’i Balahama sy i Balàka
36Rehefa ren’i Balàka fa tamy i Balahama, dia lasa izy nitsena azy tany Hiry-Môaba#22.36 I Hiry-Môaba dia tanàna teo akaikin’i Harôhera. izay tanàna teo amin’ny sisin-tany voafaritr’i Arnôna. 37Ary hoy i Balàka taminy:
–Nahoana no tsy tonga ianao tamin’ireo iraka voalohany izay nalefako? Sao dia heverinao tsy ho haiko ny hanome voninahitra anao!
38Dia hoy i Balahàma tamin’i Balàka:
–Indro aho efa tonga eto aminao ankehitriny. Nefa inona moa no azoko lazaina aminao afa-tsy izay teny hataon’Andriamanitra ao am-bavako ihany?
39Dia lasa niaraka tamin’i Balàka nankany Kiriata-Hotsôta i Balahama. 40Namono omby aman’ondry hatao sorona i Balàka, ka nampanaterany ho an’i Balahama sy ireo olo-manan-kaja niaraka taminy.
I Balahama nitsodrano ny vahoaka israelita
41Nony maraina dia nalain’i Balàka i Balahama ka nentiny niakatra ho ao Bamôta-Bahala#22.41 Bamôta-Bahala: angamba mety ho toerana iray ity sy ilay Bamôta ao amin’ny 21.19. izay nahatazanana ampahan’ny vahoaka israelita.
Voafantina amin'izao fotoana izao:
Nomerỳ 22: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.