Ohabolana 27
27
1Aza mirehareha ny amin’ny ho ampitso ianao;
fa izay hiseho anio aza tsy fantatrao akory#27.1 Jereo Jak 4.13-16..
2Aoka ny olon-kafa na ny vahiny no hidera anao,
fa tsy ny tenanao no hisoka-bava hanao izany.
3Mavesatra ny vato ary manan-danja ny fasika;
fa manoatra noho izy roa tonta ny lolom-pon’ny adala.
4Masiaka ny havinirana ary manafotra ny hatezerana,
fa iza no mahajoro eo anoloan’ny fialonana?
5Aleo fampitandremana tsy misorona
toy izay fitia afinafenina.
6Ny tsikera ataon-tsakaiza dia itokiana hahasoa
fa ny oroky ny fahavalo kosa mamitaka#27.6 mamitaka: dkt hafa tafahoatra. .
7Izay voky tsy mahahinan-tantely
fa izay noana kosa mankamamy sakafo mangidy.
8Toy ny vorona miriorio lavitry ny akaniny
ny olona mirenireny lavitry ny fonenany.
9Ny menaka fanosotra sy ny ranomanitra dia mahafaly ny fo
fa ny fahoriana mampisafotofoto ny fanahy.
10Aza mahafoy ny sakaizanao na ny naman-drainao.
Raha tojo fahasahiranana ianao,
aza mankany amin’ny rahalahinao,
fa tsara kokoa ny mpifanila akaiky
noho ny rahalahy lavitra.
11Hendre, anaka, ary ampifalio ny foko
mba hamaliako izay miteny ratsy ahy.
12Mahatsinjo ny loza ny malina ka miery,
fa ny kely saina kosa mandroso ka voa.
13Raha misy olona sahy miantoka trosan’olona vahiny,
dia tano ny akanjony ho antoka ny amin’io olon-tsy fantatra io.
14Izay manaitra namana vao maraina be
satria niarahaba azy tamim-peo mahery
dia tahaka ny manozona azy.
15Ny vehivavy tia ady dia toy ny fantsona
izay tsy mitsaha-mitete amin’ny andro manorana,
16izay misakana azy dia toy ny misakan-drivotra
na mamihina menaka amin-tanana ila.
17Ny vy no andranitana ny vy;
dia toy izany koa ny olona ihany
no andranitana ny sain’olon-kafa.
18Izay mikolokolo ny aviaviny hihinana ny voany
ary izay mikarakara ny tompony homem-boninahitra.
19Tahaka ny itarafanao ny tandindonao anatin’ny rano
no itarafanao ny tenanao anatin’ny fonao.
20Tsy mba mety voky ny fonenan’ny maty
ary tsy mba mety afa-po ny mason’olombelona.
21Misy ny memy fisedrana ny volafotsy
ary ny fatana fandrendrehana ny volamena,
fa ny lazany kosa no itsarana ny olona.
22Na dia totoinao toy ny vary an-daona aza ny adala,
dia tsy ho afaka aminy akory ny hadalàny.
23Fantaro tsara ny toetoetry ny ondry aman’osinao
ary tandremo fatratra ireo biby fiompinao;
24satria ny harena akory tsy haharitra mandrakizay
ary ny satroboninahitra tsy hateza
hampitaina amin’ny taranaka mifandimby.
25Tapaho ny ahitra eny an-tsaha,
ka mandritra ny itsiran’ny solofony,
dia angony ny vilo-maina eny an-tendrombohitra.
26Manàna ondry hahazoanao fitafiana,
manàna osilahy hahafahanao mividy saha;
27ary hanome ronono be ny osivavinao
ka hisy hamelomanao ny tenanao
sy ny ankohonanao ary ny mpanompovavinao.
Voafantina amin'izao fotoana izao:
Ohabolana 27: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.