Salamo 85
85
SALAMO Fiadanana ho an’ny vahoakan’Andriamanitra
1 Tao amin’ny tahirin-kiran’ny filohan’antoko-mpihira. Salamo nataon’ny terak’i Kôra#85.1 terak’i Kôra: jereo Sal 42.1 sy nta..
2TOMPO ô, nanehoanao fitia ilay taninao
ka nampodînao ny babo tamin’ny terak’i Jakôba.
3Nesorinao ny heloky ny vahoakanao
ary navelanao avokoa ny fahotany.
Fiatoana
4Nofoananao manontolo ny fahatezeranao
ka nialanao ny fahaviniranao mirehitra.
5Andriamanitra mpamonjy anay ô,
mba avereno ho firenena matanjaka izahay,
ka atsaharo ny loniloninao aminay.
6Ho tezitra aminay mandrakizay ve Ianao
ka hampaharitra ny fahaviniranao
amin’ny taranaka mifandimby?
7Tsy hovelominao indray ve izahay
mba hifalianay vahoakanao aminao?
8TOMPO ô, asehoy anay ny fitiavanao
ka omeo anay ny famonjenao.
9Te hihaino izay lazain’Andriamanitra TOMPO aho.
Fiadanana tokoa no ampanantenainy
ho an’ny vahoakany, dia ireo mpivavaka aminy,
raha tsy miverina amin’ny hadalàny intsony ireo.
10Eny, akaiky an’izay manaja Azy ny famonjeny;
hitoetra eto amin’ity tanintsika ity ny voninahiny.
11Tafahaona ny fitiavana sy ny fahamarinana,
mifanoroka ny rariny sy ny fiadanana.
12Mitrebona avy amin’ny tany ny fahamarinana
ary midina avy any an-danitra ny rariny.
13Ny TOMPO mihitsy no hanome ny zava-tsoa
ka hahavokatra tokoa ny tanintsika;
14ary handeha eo alohany ny rariny
ka hanoritra ny lalan-kodiaviny.
Voafantina amin'izao fotoana izao:
Salamo 85: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.