John 2
2
1ထို့နောက် သုံးရက်မြောက်သောနေ့၌ ဂါလိလဲပြည်ရှိ ကာနဟုအမည်ရှိသောမြို့တွင် မင်္ဂလာဆောင်ပွဲတစ်ခုကျင်းပရာ ကိုယ်တော်ယေရှု၏မယ်တော်မာရိသည် ထိုမင်္ဂလာပွဲ၌ ရှိနေလေ၏။ 2ကိုယ်တော်နှင့် တပည့်တော်များသည်လည်း ဖိတ်ကြားခြင်းခံရသဖြင့် ရောက်ရှိလာကြ၏။ 3ထိုပွဲ၌ ဧည့်ခံကျွေးမွေးနေဆဲတွင် စပျစ်ရည်ကုန်သွားသဖြင့် ကိုယ်တော်၏မယ်တော်က ကိုယ်တော့်အား “သူတို့၌ စပျစ်ရည်မရှိတော့ပါ” ဟုဆိုလေ၏။ 4ထိုအခါ ကိုယ်တော်က သူမအား “အကျွန်ုပ် မည်သို့ပြုရမည်ကို မပြောပါနှင့်။ ကျွန်ုပ်၏အချိန်မကျသေး” ဟုမိန့်တော်မူ၏။ 5ထို့ကြောင့် မယ်တော်ကလည်း “သူစေခိုင်းသမျှကို ဆောင်ရွက်ကြလော့” ဟု အစေခံတို့အား ဆိုလေ၏။ 6ထိုနေရာ၌ ဂျူးလူမျိုးတို့၏ဘာသာရေးအရ ဆေးကြောသန့်စင်ခြင်းအတွက် အသုံးပြုကြသည့် ရေဂါလံနှစ်ဆယ်မှ သုံးဆယ်ခန့်aထိဆန့်သော စဉ့်အိုးခြောက်လုံးရှိ၏။ 7ကိုယ်တော်က အစေခံတို့အား “ဤစဉ့်အိုးတို့ကို ရေအပြည့်ဖြည့်ကြလော့” ဟုစေခိုင်းသဖြင့် ထိုသူတို့လည်း အိုးနှုတ်ခမ်းဝအထိ ရေဖြည့်ကြလေ၏။ 8ထို့နောက် ကိုယ်တော်က သူတို့အား “ယခု ရေအနည်းငယ်ခပ်၍ ဧည့်ခံပွဲတာဝန်ခံထံသို့ သွား၍ပေးကြလော့” ဟုမိန့်တော်မူ၏။ အစေခံတို့သည်လည်း ထိုသူ့ထံသို့ သွား၍ 9စပျစ်ရည်ဖြစ်သွားသောရေကို ပေးရာ ဧည့်ခံပွဲတာဝန်ခံလည်း မြည်းစမ်းကြည့်လေ၏။ ထိုရေကို ခပ်သောအစေခံတို့သည် စပျစ်ရည်ကို အဘယ်ကရသည်ကို သိကြသော်လည်း ဧည့်ခံပွဲတာဝန်ခံကမူ မသိသဖြင့် သူသည် သတို့သားကို ခေါ်ယူကာ 10“လူတိုင်းသည် အကောင်းဆုံးသောစပျစ်ရည်ကို ဦးစွာဧည့်ခံလေ့ရှိကြပြီး ဧည့်သည်များဝလင်စွာ သောက်သုံးကြပြီးမှ အညံ့စားစပျစ်ရည်ကို ဧည့်ခံတတ်ကြ၏။ သင်မူကား၊ အကောင်းဆုံးစပျစ်ရည်ကို ယခုထိတိုင် သိမ်းဆည်းထားသည်တကား” ဟုဆိုလေ၏။ 11ကိုယ်တော်ယေရှုသည် သူ၏ဘုန်းတန်ခိုးတော်ကို ပြသသည့်အနေဖြင့် ဂါလိလဲပြည် ကာနမြို့၌ ဤပထမဦးဆုံး အံ့ဖွယ်အမှုကို ပြုခဲ့ခြင်းဖြစ်လေ၏။ ထို့ကြောင့် တပည့်တော်တို့သည်လည်း ကိုယ်တော့်ကို ယုံကြည်ကြ၏။ 12ထို့နောက် ကိုယ်တော်သည် မယ်တော်မှစ၍ ညီများ၊ တပည့်တော်များနှင့်အတူ ကပေရနောင်မြို့သို့ ကြွတော်မူ၍ ထိုမြို့တွင် ရက်အနည်းငယ်ခန့် နေထိုင်တော်မူ၏။ 13ထို့နောက် ဂျူးလူမျိုးတို့၏ပသခါပွဲတော်အချိန်ကျရန် နီးကပ်လာသဖြင့် ကိုယ်တော်သည် တပည့်တော်တို့နှင့်အတူ ဂျေရုဆလင်မြို့သို့ ကြွတော်မူ၏။ 14ကိုယ်တော်သည် ဗိမာန်တော်ဝန်း၌ နွားများ၊ သိုးများနှင့် ခိုငှက်များ ရောင်းချနေသူများကိုလည်းကောင်း၊ ငွေကြေးလဲလှယ်သူများသည် သူတို့၏စားပွဲများတွင် ထိုင်နေကြသည်ကိုလည်းကောင်း မြင်တော်မူသောအခါ 15ကြိုးဖြင့် ကြာပွတ်ကိုကျစ်၍ သိုးများ၊ နွားများအားလုံးကို ဗိမာန်တော်ဝန်းမှ နှင်ထုတ်တော်မူ၍ ငွေကြေးလဲလှယ်သူတို့၏ငွေဒင်္ဂါးပြားများကို သွန်ချပြန့်ကြဲပစ်၍ ထိုသူတို့၏စားပွဲများကို မှောက်လှန်တော်မူ၏။ 16ထို့နောက် ကိုယ်တော်က ချိုးငှက်ရောင်းသူတို့အားလည်း “၎င်းတို့ကို ဤနေရာမှ ယူသွားကြလော့။ ငါ၏အဖဘုရားအိမ်တော်အား ဈေးရုံကဲ့သို့ ပြုနေခြင်းကို ရပ်တန့်ကြလော့” ဟုမိန့်တော်မူ၏။ 17ထိုအခါ သူ၏တပည့်တော်တို့သည် “အို ဘုရားရှင်၊ အရှင်၏အိမ်တော်အပေါ် အကျွန်ုပ်၏ဆည်းကပ်ခြင်းသည် အကျွန်ုပ်၏ကိုယ်အတွင်း၌ မီးသဖွယ် လောင်ကျွမ်းလျှက်ရှိပါ၏” ဟုဖော်ပြထားသော ကျမ်းစာပိုဒ်ကို အမှတ်ရကြလေ၏။ 18ထို့နောက် ဂျူးဘာသာရေးအကြီးအကဲတို့ကလည်း ကိုယ်တော်အား “သင်သည် ဤအရာအားလုံးကို လုပ်ဆောင်ရန် ဘုရားရှင်ထံမှ အခွင့်အာဏာရထားသည်ဆိုခြင်းကို အကျွန်ုပ်တို့အား မည်သည့်အံ့ဖွယ်နိမိတ်လက္ခဏာဖြင့် သက်သေပြမည်နည်း” ဟုမေးမြန်းကြလေ၏။ 19ထိုအခါ ကိုယ်တော်က သူတို့အား “ဤဗိမာန်တော်ကို ဖြိုချကြလော့။ ငါသည် သုံးရက်အတွင်း ၎င်းကို ပြန်တည်ဆောက်မည်” ဟုဖြေတော်မူ၏။ 20ဂျူးဘာသာရေးအကြီးအကဲများကလည်း “ဤဗိမာန်တော်ကို တည်ဆောက်ရန် နှစ်ပေါင်းလေးဆယ့်ခြောက်နှစ်မျှ ကြာ၏။ ဤသည်ကို သင်က သုံးရက်အတွင်း ပြန်တည်ဆောက်မည်လော” ဟုဆိုကြလေ၏။ 21သို့သော်လည်း ကိုယ်တော်ညွှန်းဆိုသည့် ဗိမာန်တော်ဆိုသည်မှာ သူ၏ကိုယ်ခန္ဓာကို ပြောဆိုခြင်းဖြစ်၏။ 22နောက်ပိုင်းတွင် ကိုယ်တော်အသက်ဇီဝိတဒါနပြုပြီးနောက် အသက်ပြန်ရှင်တော်မူသောအချိန်၌ တပည့်တော်တို့သည် ကိုယ်တော်မိန့်တော်မူခဲ့သော ဤစကားကို အောက်မေ့အမှတ်ရကြကာ ကျမ်းစာနှင့် ကိုယ်တော်ယေရှုမိန့်တော်မူသောစကားကို ယုံကြည်ကြ၏။ 23ပသခါပွဲတော်အတွင်းတွင် ဂျေရုဆလင်မြို့၌ ကိုယ်တော်ယေရှုရှိနေစဉ် လူများစွာတို့သည် ကိုယ်တော်ပြတော်မူသည့် အံ့ဖွယ်နိမိတ်လက္ခဏာတို့ကို မြင်ကြရသဖြင့် ကိုယ်တော်အား ယုံကြည်ကြလေ၏။ 24သို့သော်လည်း ကိုယ်တော်သည် လူတို့၏အတွင်းစိတ်သဘာဝကို သိတော်မူသဖြင့် ထိုသူတို့ထံ၌ မိမိကိုယ်ကို ပုံအပ်တော်မမူ။ 25လူတို့၏စိတ်နှလုံးတွင်းရှိသမျှကို သိမြင်တော်မူသောသူဖြစ်သဖြင့် သူ့အား လူတို့၏အကြောင်းကို အဘယ်သူကမျှ သက်သေခံပေးရန် မလိုအပ်ပေ။
Voafantina amin'izao fotoana izao:
John 2: TPV-RV
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.