ମାତିଉ 1
1
ଜିସୁନା ତୁତାଲେବୁସାଁନେ
(ଲୁକ 3:23–38)
1ଜିସୁ କିରିସ୍ଟନା#1:1 ମାସିଗା ଡ'ସେକ୍ ଏବ୍ରିସାମ୍ବକ୍ ଡୁତା ମାରି କିରିସ୍ଟ ଡ'ସେକ୍ ଗିରିକ୍ ସାମ୍ବକ୍ ଡୁତା । ମୁଇ କାମ୍ପୁଲେଇ ସିରେଲତା ଡ'ସେକ୍ ଅସୁଇ'ପୁଲେଇ ସୁ'ଉବୁରଂ ସୁସୁଲ'ତା । ବୁସାଁନା ଇମି ଦାଉଦ୍, ମାରି ଦାଉଦ୍ନା ବୁସାଁନା ଇମି ଅବ୍ରାଆମ୍, ସା' ମା'ଏ ଗୁଲାଇର ମୁଇ ଡିଂଅଁନ୍ରେମ୍ । ସା' ଜିସୁ କିରିସ୍ଟନା ତୁତାଲେବୁସାଁନେ ଗୁଲାଇର ଜାଜା ଡ'ନା ମା'ଏନା ଇମି ଡି'କେନ୍ ଲେକ୍ଲ'ତା: 2ଅବ୍ରାଆମ୍ଲା ଇସାକ୍ନା ବା । ଇସାକ୍ଲା ଜାକୁବ୍ନା ବା । ଜାକୁବ୍ଲା ଜିଉଦାନା ମାରି ମାଇନା ବୁୟାଂଏଁନା ବା । 3ଜିଉଦାଲା ପେରସ୍ନା ମାରି ସେରକ୍ନା ବା । ମାଇପାନା ୟଂନା ଇମି ତାମର୍ । ପେରସ୍ଲା ଇସ୍ରନ୍ନା ବା । ଇସ୍ରନ୍ଲା ଅରାମ୍ନା ବା । 4ଅରାମ୍ଲା ଅମିନାଦାବ୍ନା ବା । ଅମିନାଦାବ୍ଲା ନଅସନ୍ନା ବା । ନଅସନ୍ଲା ସଲମନ୍ନା ବା । 5ସଲମନ୍ଲା ବୟଜ୍ନା ବା । ବୟଜ୍ନା ୟଂନା ଇମି ରାଆବ୍ । ବୟଜ୍ଲା ଅବେଦ୍ନା ବା । ଅବେଦ୍ନା ୟଂନା ଇମି ରୁତ୍ । ଅବେଦ୍ଲା ଜିସିନା ବା । 6ଜିସିଲା ଦାଉଦ୍ ରାଜାନା ବା । ଦାଉଦ୍ଲା ସଲମନ୍ନା ବା । ସଲମନ୍ନା ୟଂ ଉରିୟ ଡ'କୁନୁଂ ମୁଇନ୍ଡାନା କୁନୁଇ' ଡୁକୁ । 7ସଲମନ୍ଲା ରିଅବିୟାମ୍ନା ବା । ରିଅବିୟାମ୍ଲା ଅବିୟନା ବା । ଅବିୟଲା ଆସାନା ବା । 8ଆସାଲା ଜିଅସାପାଟ୍ନା ବା । ଜିଅସାପାଟ୍ଲା ଜରାମ୍ନା ବା । ଜରାମ୍ଲା ଉଜିୟନା ବା । 9ଉଜିୟଲା ଜତମ୍ନା ବା । ଜତମ୍ଲା ଆଆସ୍ନା ବା । ଆଆସ୍ଲା ଇଜକିୟନା ବା । 10ଇଜକିୟଲା ମନସିନା ବା । ମନସିଲା ଆମନ୍ନା ବା । ଆମନ୍ଲା ଜସିୟନା ବା । 11ଜସିୟଲା ଜିକନିୟନା ବା । ଆଇସ୍ରାଏଲ୍ରେମଲେ ବାବିଲନ୍ ଦେସ୍ବକ୍ ଗତିରେମ୍ସୁଗ ଜବର୍ଦସ୍ ରିଂଅଁ' ଉଇକୁନୁଂବେଲା ଜିକନିୟଲା ମାରି ମାଇନା ବୁୟାଂଏଁ ଜନମ୍ ଡେଂଗା' ।
12ମାରି ମା'ଏ ଆତା ବାବିଲନ୍ ଦେସ୍ବକ୍ ଗତିରେମ୍ସୁଗ ଡୁକୁନୁଂବେଲା ସଅଲ୍ତିୟେଲା ଜନମ୍ ଡେଂଗା' । ଜିକନିୟଲା ସଅଲ୍ତିୟେଲ୍ନା ବା । ସଅଲ୍ତିୟେଲ୍ଲା ଜିରୁବାବିଲ୍ନା ବା । 13ଜିରୁବାବିଲ୍ଲା ଅବିଉଦ୍ନା ବା । ଅବିଉଦ୍ଲା ଏଲିୟାକିମ୍ନା ବା । ଏଲିୟାକିମ୍ଲା ଆସର୍ନା ବା । 14ଆସର୍ଲା ସାଦକ୍ନା ବା । ସାଦକ୍ଲା ଆକିମ୍ନା ବା । ଆକିମ୍ଲା ଏଲିଉଦ୍ନା ବା । 15ଏଲିଉଦ୍ଲା ଏଲିୟାଜର୍ନା ବା । ଏଲିୟାଜର୍ଲା ମତାନ୍ନା ବା । ମତାନ୍ଲା ଜାକୁବ୍ନା ବା । 16ଜାକୁବ୍ଲା ଜସେପ୍ନା ବା, ଜସେପ୍ଲା ମରିୟମ୍ନା ଇମ୍ପର୍ । କେନ୍ ମରିୟମାଉ#1:16 ମରିୟମ୍ନା ସୁଲଇ'ବକ୍ଉ ଜିସୁଲା ପବିତ୍ର ଆତ୍ମାନା ବପୁବୁରଂ ରେମ ଏଗ୍ସେକ୍ ଜନମ୍ ଡେଂଗା' । କିରିସ୍ଟ#1:16 କିରିସ୍ଟ ଡ'ନା ମାପ୍ରୁ ସିରେଲ'ସେକ୍ ବେନ୍ଟାୟ'କୁନୁଂ ଡ'ସେକ୍ ଅର୍ତ ଡୁତା । ଡ'ସେକ୍ ଅଇମିଲ'କୁନୁଂ ଆଜିସୁଲା ଜନମ୍ ଡେମ' ।
17ସା' ଡୁ'ତୁନ୍ଉ ମା'ଏନ୍ ତୁତାଲେବୁସାଁନେନା ଇମି ଗୁଲାଇଉ ଲେକ୍ଲ'କୁନୁଂ ଜୁଲ'ନା ଅବ୍ରାଆମ୍ନାକୁରୁଂ ଦାଉଦ୍ଲା ଡୁକୁନୁଂ ପନ୍ତେକ୍ ସଉଦଟା ତୁତାଲେବୁସାଁନେ ଡୁକୁ ମାରି ଦାଉଦ୍ଲା ଡୁକୁନୁଂବାଂସା' ଆଇସ୍ରାଏଲ୍ରେମଲେ ବାବିଲନ୍ ଦେସ୍ବକ୍ ଗତିରେମ୍ସୁଗ ଜବର୍ଦସ୍ ରିଂଅଁ' ଉଇକୁନୁଂପନ୍ତେକ୍ ସଉଦଟା ତୁତାଲେବୁସାଁନେ ଡୁକୁ ମାରି ବାବିଲନ୍ ଦେସ୍ବକ୍ ଗତିରେମ୍ସୁଗ ଡୁକୁନୁଂବାଂସା' କିରିସ୍ଟଲା ସୁସାପ୍ପନ୍ତେକ୍ ସଉଦଟା ତୁତାଲେବୁସାଁନେ ଡୁକୁ ।
ଆଜିସୁ କିରିସ୍ଟଲା ଜନମ୍ ଡେମ'କୁନୁଂ
(ଲୁକ 2:1–7)
18 #
ଲୁକ 1:27
ଜିସୁ କିରିସ୍ଟଲା ମି ଜନମ୍ ଡେଂଗା' ଡ'ନା: ଜସେପ୍ଲାପୁଲେଇ ଆଜିସୁନା ୟଂ ଆମରିୟମା ତେୟ'ବୁଂଅଁ' । ମାତର୍ ଡିଂଅଁସିଂ ସିଁସେଇଁଉ ପବିତ୍ର ଆତ୍ମାନା ବପୁବୁରଂ ମରିୟମା ଅନ୍ତୁର'ତା ଡ'ସେକ୍ ମାଗ' । 19ମରିୟମ୍ନା ଇମ୍ପର୍ ଜସେପ୍ଲା ମୁଇନ୍ଡା #1:19 ଇମ୍ବ'ନା ଟିକ୍ ଡୁତା ଗୁତୁନାଉ ଡେମ'କୁଦରମ୍ବାଇ' ରେମ ଡୁକୁସା' କେନା ଅଂଅଁ'ସେକ୍ ରେମଲେ ଆମରିୟମା ନିନ୍ଦାତବେ ଡ' ମାଇ ମାଗ'ସେକ୍ ଜାଏସା ମଉନଂ ମମୁନାକ୍ବେଲାଉ ଆମାଇ ଆରିଂତିଂ ଡ'ସେକ୍ ଏତ୍ଗା' ।
20ମାଇ ଡି'କେନା ଏତ୍ସେକ୍ ଡୁକୁନୁଂବେଲା, ପ୍ରବୁନା ମୁଇନ୍ଡା ଦୁତ#1:20 ଦୁତଲେ ଜା ଡ'ନା ସରଗ୍ବକ୍ ଡୁକୁନୁଂଏଁ, ମା'ଏ ମାପ୍ରୁନା କବର୍ ସୁଁସୁପୁଲେଇ ଡୁତା, ମା'ଏ ଆମାପ୍ରୁ ଇସାଉ ସୁନ୍ଡ୍ରକ୍ସେକ୍ ଡୁତା ମାରି ମାପ୍ରୁ ଲେଇ'କୁନୁଂବକ୍ ଇସାଉ ଜାଗ୍ଲ'ସେକ୍ ଡୁତା । ଆଜସେପ୍ଲା ମୁସୁକ୍ଡିମ୍ବକ୍ ଅ'ତୁନାକ୍ସେକ୍ ସୁନ', “ଅ ଦାଉଦ୍ନା ଉଁ'ଉଁ ଜସେପ୍, ମାସା' ନ ବୁତୁଂସେକ୍ ଆମରିୟମା ଆରିଂତିଂ ଡ' ଏତ୍ଗୁତୁନ? ଆମାଇ ନ ରିଂଆଁ, ମାସା'ଡ'ନା ମାଇନା ସୁଲଇ'ବକ୍ ଡୁକୁନୁଂ ଉଁ'ଉଁ ପବିତ୍ର ଆତ୍ମାନା ବପୁବୁରଂ ମାଇ ଅନ୍ତୁର'ତା । 21#ଲୁକ 1:31ସା' ମାଇ ମୁଇ ଇଂଗେର୍ଗୁ ଜନମ୍ ଡେମ୍ତ । ମାଇ ଆମାଇନା ରେମଲେ ପାପ୍କୁରୁଂ ରକ୍ୟା ଡେମ୍ତସା' ଆମାଇ ନ ଜିସୁ#1:21 ଜିସୁ ଡ'ନା “ସଦାପ୍ରବୁ ରକ୍ୟା ଡିନ୍ଡେମା” ଡ'ସେକ୍ ଅର୍ତ ଡୁତା । ଗିରିକ୍ ସାମ୍ବକ୍ “ଏଅସୁୱା” ଡ'ସେକ୍ ଡୁତା । ଡ'ସେକ୍ ଅ'ଇମି” ଡ'ସେକ୍ ସୁନ' ।
22ଇନ୍ତେକନ୍ଡେକ୍ ପ୍ରବୁ ସୁଁ ଡ'ସେକ୍ ସୁନ'ସା' ମୁଇନ୍ଡା ବାବବାଦି#1:22 ମାପ୍ରୁନା ତୁମ' ଅଂଅଁ'ସେକ୍ ଆରେମଲେ ସୁଁସୁରେମ୍ବକ୍ ବାବବାଦି ଡ'ସେକ୍ ସୁନ୍ତ । ସୁନ'କୁନୁଂସୁଗ ଡିନ୍ଡେମ୍ପୁଲେଇଉ ଆ'ନା ଡି'କେନା ଡେଂଗୁତା । ମାଇ ମା ସୁନ'କୁ ଡ'ନା: 23#ଜିସାଇୟ 7:14“ମୁଇନ୍ଡା ମଇ'ପର୍ବାଇ' ସେଲାନ୍ଲା ଅନ୍ତୁର'ସେକ୍ ମୁଇ ଇଂଗେର୍ଗୁ ଜନମ୍ ଡେମ୍ତ । ଆମାଇ ଇମାନୁଏଲ୍ ଡ'ସେକ୍ ମା'ଏ ୱାଇତ । ଇମାନୁଏଲ୍ ଡ'ନା ‘ମାପ୍ରୁ ନେଇ'ବୁରଂ ଡୁତା’ ଡ'ସେକ୍ ଅର୍ତ ଡୁତା” ଡ'ସେକ୍ ସୁନ'କୁ ।
24ଜସେପ୍ଲା ମୁରାକ୍ସେକ୍ ପ୍ରବୁନା ଦୁତ ଆମାଇ ସୁନ'କୁନୁଂସୁଗ ଆମରିୟମା ଅ'ଡିଂଅଁଲ' । 25#ଲୁକ 2:21ମାତର୍ ଆତୁନ୍ ଇଂଗେର୍ଗୁ ଜନମ୍ ଡିନ୍ଡେମ୍ପନ୍ତେ'କା ଜସେପ୍ଲା ମରିୟମାବୁରଂ ଆଲେମ'ତା । ମରିୟମା ଜନମ୍ ଡେମ'ସା' ଜସେପ୍ଲା ଆତୁନ୍ ଗୁଲା ଜିସୁ ଡ'ସେକ୍ ଅ'ଇମିଲ' ।
Voafantina amin'izao fotoana izao:
ମାତିଉ 1: BFW
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
CC BY-NC-ND 4.0