Jenesis 10
10
Olketa laen blong trifala pikinini blong Noa
1 Stori abaotem laen blong Siem, an Ham, an Jafet hemi olsem:
Nao taem bikfala wata ya hemi finis, trifala pikinini ya blong Noa, hu nem blong trifala, Siem, an Ham, an Jafet, trifala ya i garem olketa pikinini blong trifala moa. Nem blong olketa nao hemi olsem:
2Olketa laen blong Jafet, nem blong olketa nao hemi, Goma, an Megog, an Madae, an Javan, an Tubal, an Mesek, an Tiras. An olketa laen wea olketa gohed fo garem olketa nem ya olketa bon kam long laen blong olketa ya.
3An olketa laen blong Goma, nem blong olketa nao hemi, Askenas, an Rifat, an Togama. An olketa laen wea olketa gohed fo garem olketa nem ya olketa bon kam long laen blong olketa.
4An olketa laen blong Javan, nem blong olketa nao hemi, Elisa, an Spen, an Saepras, an Roj. 5Hem nao olketa laen wea i kamaot bihaen long oloman Jafet ya blong bifoa. Olketa pipol ya i stap olobaot long olketa deferen aelan blong olketa, an graon blong olketa an falom olketa deferen laen blong olketa, an olketa garem olketa deferen langguis blong olketa tu.
6An olketa laen blong Ham, nem blong olketa nao hemi, Kus, an Ijip, an Libia, an Kenan. An olketa man blong olketa ples wea olketa gohed fo garem olketa nem ya, olketa i laen blong olketa.
7Olketa laen blong Kus, nem blong olketa nao hemi, Seba, an Havila, an Sabta, an Raama, an Sabteka.
An olketa laen blong Raama, hemi Seba an Dedan. An olketa man blong olketa ples wea olketa gohed fo garem olketa nem ya, olketa i laen blong olketa.
8An Kus ya hemi garem wanfala pikinini boe wea nem blong hem Nimrod, hu hemi fas man long wol fo kamap nambawan man fo faet, an hemi gohed fo winim olketa narafala kantri. 9Oltaem Yawe hemi gohed fo helpem hem, nao hemi kamap wanfala nambawan man tu fo handing, dastawe kam kasem tude, olketa man olketa gohed fo tok olsem, “Mi prea wea Yawe bae hemi mekem yu kamap wanfala nambawan man fo handing, olsem Nimrod ya blong bifoa.” 10Fastaem, ples wea hemi gohed fo bikman long hem hemi kavaremap trifala taon wea olketa kolem Babilon an Erek an Akad, wea trifala stap long kantri ya wea olketa kolem Sinaa.#10:10 “Sinaa” hemi olfala nem blong Babilonia. 11Bat long bihaen, hemi go long kantri ya wea olketa kolem Asiria, nao hemi wakem olketa taon ya wea olketa kolem Nineve, an Rehobot, an Kala, 12an Resen. Taon ya wea olketa kolem Kala, hemi wanfala bikfala taon, an taon ya wea olketa kolem Resen, hemi stap long midol long Kala an Nineve.
13An olketa laen blong Ijip, hemi garem olketa laen blong Lidia, an olketa laen blong Anam, an olketa laen blong Lehab, an olketa laen blong Naftu, 14an olketa laen blong Patrus, an olketa laen blong Kasluhu, an olketa laen blong Krit. An Krit ya, olketa pipol blong Filistia nao olketa bon kam long laen blong hem. An olketa man blong olketa ples wea olketa gohed fo garem olketa nem ya, olketa i laen blong olketa nao.
15An tufala pikinini boe blong Kenan, nem blong tufala nao hemi, Saedon wea hemi fasbon blong hem, an Het. An olketa laen wea i kamaot bihaen long tufala ya olketa garem nem blong tufala. 16An olketa narafala laen wea Kenan hemi grandadi blong olketa nao, hemi olketa laen blong Jebus, an olketa laen blong Amoa, an olketa laen blong Gigas, 17an olketa laen blong Hivi, an olketa laen blong Aki, an olketa laen blong Sini, 18an olketa laen blong Avad, an olketa laen blong Semari, an olketa laen blong Hamat. Nao olketa laen blong Kenan olketa gohed fo kamap plande moa, an olketa gohed fo stap long plande ples moa. 19An graon blong olketa ya hemi gohed fo kamap bikfala tumas, an hemi go kasem taon ya wea olketa kolem Saedon long not, an hemi go kasem taon ya wea olketa kolem Gerara, kolsap long taon ya wea olketa kolem Gesa long saot, an hemi go kasem olketa taon ya wea olketa kolem Sodom, an Gomora, an Adma, an Seboeim, kolsap long Lasa, wea olketa stap long saet long ist. 20Hem nao olketa laen wea i bon kam long laen blong oloman Ham ya blong bifoa. Olketa pipol ya i stap olobaot long olketa deferen kantri blong olketa, falom olketa laen blong olketa seleva, an olketa garem olketa deferen langguis blong olketa seleva tu.
21An Siem, hu hemi fasbon pikinini boe blong Noa, olketa laen blong Eba olketa bon kam long laen blong hem. 22Olketa pikinini boe blong Siem, nem blong olketa nao hemi, Elam, an Asua, an Afaksad, an Lud, an Aram. An olketa laen wea i kamaot bihaen long olketa, olketa gohed fo garem olketa nem ya. 23An olketa pikinini boe blong Aram, nem blong olketa nao hemi, Us, an Hul, an Geta, an Mesek. 24Afaksad ya, hemi bonem Sela, an Sela hemi bonem Eba. 25An Eba hemi bonem tufala pikinini boe blong hem, an hemi kolem fasbon blong hem Pileg, bikos long taem wea hemi bon, olketa man long wol olketa divaed, olketa toktok long olketa deferen langguis nao. An hemi kolem mektu pikinini blong hem Joktan.
26An olketa pikinini boe blong Joktan, nem blong olketa nao hemi, Almodad, an Selef, an Hasamavet, an Jera, 27an Hadoram, an Usal, an Dikla, 28an Obal, an Abimael, an Seba, 29an Ofia, an Havila, an Jobab. Olketa ya i grandadi blong olketa laen wea i bon kam long laen blong oloman Joktan, 30an ples blong olketa hemi stap long saet long ist, long midol long olketa hil, wea hemi stat long Mesa, an hemi go kasem Sefa. 31Hem nao olketa laen blong Siem. Olketa pipol ya olketa stap evriples long olketa kantri blong olketa, falom olketa deferen laen blong olketa, an olketa toktok long olketa deferen langguis blong olketa.
32Hem ya nao olketa laen blong Noa wea i bon kam long laen blong hem, wetem olketa kantri blong olketa wea olketa stap long hem. Bihaen long taem blong bikfala wata ya, olketa pipol blong olketa ples long wol olketa bon kam long laen blong trifala pikinini ya blong Noa.
Voafantina amin'izao fotoana izao:
Jenesis 10: SIPB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Pijin Catholic Bible © Bible Society of the South Pacific, 2008.