Jenesis 23
23
Sera hemi dae, an Ebraham hemi peimaot wanfala pisgraon fo berem hem
1Sera hemi stap go-go hemi kasem 127 yia blong hem nao hemi dae. 2-3Hemi dae long kantri ya wea olketa kolem Kenan, long taon olketa kolem Kiriataba, wea distaem, olketa kolem Hebron. Nao Ebraham hemi sore tumas an hemi krae fogud long waef blong hem ya wea hemi dae finis. Bihaen, hemi getap from ples wea olketa leim waef blong hem, nao hemi go fo lukim olketa bikman long laen blong Het wea olketa onam graon long ples ya, an hemi tok olsem long olketa, 4“Mi stap long ples blong yufala, bat mi wanfala strensa nomoa ya. Nao waef blong mi hemi dae finis, an mi laek fo peimaot wanfala pis graon long yufala, mekem mi save berem hem.”
5Bat olketa tok olsem, 6“Bos, plis yu lisin kam long toktok blong mifala. Mifala gohed fo luk long yu olsem wanfala bikfala lida blong mifala. Yu save go nomoa long eni beregraon blong mifala wea yu siusim, an yu save berem waef blong yu long hem. Sapos yu siusim wanfala beregraon blong mifala fo berem waef blong yu long hem, bae no eniwan long mifala save stopem yu nao.”
7Ebraham hemi getap an hemi baodaon long olketa, 8an hemi tok olsem, “Sapos yufala hapi tru fo letem mi berem waef blong mi long ples ya, plis yufala mas askem kam Efron hu i pikinini blong Soha, 9mekem hemi salem kam wanfala smolfala pis graon blong hem long mi. Mi laekem disfala smolfala pis graon ya wea kev hemi stap long hem ya, wea olketa kolem Makpela, wea i stap long saet long disfala gaden blong hem ya. Plis yufala mas askem hem fo hemi letem mi peimaot disfala graon ya long ae blong yufala, long ful praes blong hem, mekem mi save onam olsem beregraon blong mifala.”
10Nao olketa ya long laen blong Het i gohed fo sidaon nomoa long doa blong bikfala wolston long taon ya, wea hem nao hemi barava ples long kastom blong olketa fo tokabaotem olketa bisnis olsem. An long taem ya, Efron tu hemi sidaon wetem olketa. Nao long ae blong olketa, hemi tok olsem, 11“Bos, toktok blong mi hemi olsem. Mi hapi tumas fo givim olketa graon long ples ya go long yu, wetem kev wea hemi stap insaet long ston ya. Long ae blong olketa pipol ya long ples blong mi, mi hapi tumas fo givim go nomoa long yu distaem, mekem yu save berem waef blong yu long hem.”
12Nao long ae blong olketa, Ebraham hemi baodaon moa, 13an hemi tok olsem long man ya, “Plis yu lisin kam moa long toktok blong mi. Mi laek fo peimaot ful praes blong pisgraon ya. Plis yu tekem seleni ya, mekem mi save go berem waef blong mi long graon ya.” 14Nao Efron hemi tok olsem, 15“Bos, praes blong graon ya hemi 400 silva seleni#23:15 “silva seleni” Disfala silva seleni ya olketa kolem “sekel”. Hevi blong wanfala sekel hemi lelebet winim 11 gram. nomoa. Bat hemi samting nating nomoa ya long yumitufala. Yu gohed, an berem waef blong yu long hem.”
16Ebraham hemi agri fo peim praes ya wea man ya hemi talemaot long ae blong olketa pipol blong ples ya. Nao long ae blong olketa pipol ya, hemi skelem olketa silva seleni blong hem fo kasem barava praes ya, olsem wea olketa bisnisman save duim olowe long taem ya.
17Dastawe nao, Ebraham hemi tekova long pisgraon ya long ples ya olketa kolem Makpela, wea hemi stap long ist saet blong Mamre. Fastaem graon ya hemi blong Efron, bat hemi kamap graon blong Ebraham nao. Pisgraon ya hemi las pisgraon blong Efron long ples ya, wetem kev ya, an olketa tri wea olketa stap long hem. Tufala stretem olketa samting ya 18an olketa laen blong Het wea olketa stap long miting ya olketa savegud dat long taem ya, graon ya hemi kamap graon blong Ebraham nao. 19Nao bihaen, Ebraham hemi go an berem waef blong hem Sera long kev ya long Makpela wea hemi stap kolsap long Mamre, long Kenan. 20So long wei ya, graon ya wea fastaem hemi blong olketa laen blong Het, wetem kev ya wea i stap long hem, hemi kamap graon blong Ebraham. Bihaen hemi gohed fo yusim kev ya fo berem olketa long famili blong hem wea olketa dae.
Voafantina amin'izao fotoana izao:
Jenesis 23: SIPB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Pijin Catholic Bible © Bible Society of the South Pacific, 2008.