लूका 17
17
पाप पपाइक्ब बोक्नीम, दे शेंशो
मत्ती १८:६-७; मत्ती १५:२१-२२; मर्कूस ९:४२
1काबु येसुमी आ शेंसीब आन कली “मुरपुकीमी पाप पपाइश्शा दाइल पाइक्चा गोइनीम। तन्न सुइमी अरु आन कली दाइल मपपदल, मारदे हना दाइल पपाइक्ब कली शुश मरिम्शो दुम्ब। मत्ती १८:६-७ 2मेको आ शुरमी यात क्युक्शा, समुन्द्रमी ख्रुम्शा साइक्चा अरु सजाइ क्येङा रिम्शो दुम्ब। 3इन कली का का पा शेंनन्नी। मिनु नेनीने। इ लोक्बमी पाप पाप्तु हना, मेको कली ‘मो मपचा’ दे अर्ती गेवो। इ अर्ती नेंशा माफ पुंइतु हना, माफ गेवो। मत्ती १८:१५ 4काबुम ७ खेयप पाप पशा, ७ खेयप माफ पुंइथ जाक्त हना यो, ७ खेयप माफ गेवो” दे शेंदीमी बाक्त। मत्ती १८:२१-२२
थमा सुइक्तीक बारपाइक्चा, दे पुंइशो
5मिनु शेंसीबपुकीमी येसु कली “प्रभु, आंइ थमा सुइक्तीक थुं बारपा गेकी” दे पुन्मे बाक्त। 6मिनु प्रभुमी “रायो गेडा खोइ ला थमा सुइक्तीनी हना, इन पने मचाप्चा ङा मारेइ मलीब। एको रवा कली ‘शाक्श सुन्दा दुल्शा समुन्द्रम याक्सो’ देंनीनु, एको रवा यो याक्सीब।
गेय पाइबम गाल्च ला ताइब, दे शेंशो
7नेनीने, मिनु मिम्तीने। इन गेय पाइब कामी ब्यफ वाक्शा, कि बी योव़शा, खिं लेश्शा जाक्मेनु, खमे ख्रेत्नीनी ङा? ममाइ। 8गेमी ‘लो, मी मुइश्शा, खमे क्येशा थुल्यी। मिनु गे यो जावो’ देंनीनी। 9गेय पाइबमी अरेशो गेय पवानु, आ ठेयब मुरुमी सेवासी गेबा ङा? 10गेपुकी गेय पाइब ननी। परमप्रभु यावेम इन कली आ गेय पाइब सेल्शा, गेय पपाइक्तु। मिनु एको गेय पशा ‘परमप्रभु यावे आ देंशो पाइतय। तन्न सेवासी गेने मपुंइसय। मारदे हना आ वोइश्शो मुर नय’ दे मिम्तीने” दे शेंदीमी बाक्त। १कोरिन्थी ९:१६
कोव़र पाइब आन कली सापाइश्शो
11मिनु यरूसलेम ङा लां खोइश्शा, गालील नु सामरीया रागी आन दाते ङा लां लमा बाक्त। लूका ९:५१; लूका १३:२२ 12मिनु काबु गाउं का जाक्दीम्मानु, १० जना कोव़र पशो मुरपुकीमी “येसु पीब” देंशो नेंशा, लां कोव़शा बाक्मा बाक्त। लेवी १३:४५-४६ 13मिनु मेकोपुकीमी “येसु, शेंब, आंइ कली शिशी पाइक्की” दे सेउ पा ब्रेम्मा बाक्त। 14मिनु येसुमी मेको आन कली तशा “गेपुकी, चढ़ेब आ ङोंइती लशा, इन साशो रां कोंइदीने” दे सोइक्तीमी बाक्त। मिनु लना लन लांमीन आन कोव़र सामा बाक्त। लूका ५:१४ 15कामी आ रां साशो तशा, फ्रा लेश्शा परमप्रभु यावे कली ठेयब सेला बाक्त। 16मिनु दोरशा पिशा, येसु आ ङोंइती बाप्शा खुम्की पा “प्रभु, गे आं कली रिम्शो पाइतीनी” दे सेउ पवा बाक्त। मेको सामरीया ङा मुर बाक्माक्त। 17मिनु येसुमी “१० जना आन कली सापदुमी ममाइ ङा? अरु ९ जना ते लाग्मे? 18मेको सामरीया ङा मुर ला परमप्रभु यावे कली ठेयब सेल्शा ‘गे रिम्शो पाइब बाक्नीनी’ देंथ जाक्मे?” देंमाक्त। 19मिनु “गे रिम्शो पाइब बाक्नीनी” देंथ जाक्ब कली “इ पिया पोक्को। आं कली थमा सुइक्तीवी। मोपतीके साते” देंशा सोइक्ता बाक्त। लूका ७:५०
परमप्रभु आ राज्य आ पर्बम शेंशो
मत्ती २४:-; मर्कूस १३:-
20मिनु फरिसीपुकीमी येसु कली “परमप्रभु यावे आ राज्य जाक्चशो गेना तांइसीबा, दोपा तांइसीबा?” दे हिल्लो पामे बाक्त। मिनु येसुमी “परमप्रभु यावे आ राज्य मिक्चीम तचा ङा पा मतपांइसीब। यूहन्ना १८:३६ 21एक जाक्त, मेरेक जाक्त, दे मदेंनीम। नेनीन, परमप्रभु यावे आ राज्य जाक्ने थुम्शा, गेपुकी नु बाक्त” दे शेंदीमी बाक्त।
22मिनु आ शेंसीब आन कली नोले दुम्ब लोव़ पा “दोपा मुल रागीम जरमेशो नु काथा बाक्चा तनी, मोपा नोले चिनु काथा बाक्चा दाक्नीनी। तन्न काथा बाक्चा मताइनीनी। 23मिनु मुरपुकीमी ‘परमप्रभु यावे आ सोइश्शो हुकुम पाइब एक जाक्त, मेरेक जाक्त, इरी जाक्त, उयु जाक्त, कोव़थ लय’ देंमानु, मेको थमा मसुइक्थु, मेको आन नोले मखोतीन। लूका २१:८ 24रागीम जरमेशोमी चिन्ड कोंइशा तपांइसेनु, चिला पवानु, चिलाम नां दाप्तीक रे नां पेरतीक सम्म थिशो तांइसीशो बाक्ब। 25मोपा तपांइसीचा क्येङा ङोंइती शुश श्येत जचा माल्ब। मारदे हना एको पाला ङा मुरपुकीमी आं कली मब्रथु, आं लोव़ मनेंनीम, थमा मसुइक्नीम। लूका ९:२२ 26रागीम जरमेशो जाक्मेनु, मुरपुकीमी नोआह आ पालामी पशो खोदेंशो पाइनीम। 27नोआह ठेयब डोंगाम मओव़म सम्म मुरपुकी जशा तूशा, ग्युंबे पशा, ग्युंबे पांइसीशा बाक्मा बाक्त। मिनु रेउ यिशा मुर नेल्ल बेक्मा बाक्त। 28लोत आ पालामी यो मोदेंशो दुम्माक्त। मुरपुकीमी जचा फेक्चा, ग्याप्चा लेयचा, ख्रुम्शा मीमेनु रिक्चा नु मार मार सेल्चा मिम्तमे बाक्त। उत्पत्ती १९:१५,२४-२५ 29काबु चहिं लोत सोदोम प्रोंइशा प्रोक्मेनु, परमप्रभु यावेमी सरीङ रे मी नु बारुक तोक्पदा बाक्त। मिनु सोदोम सहरम बाक्ब नेल्ल बेक्मा बाक्त। 30रागीम जरमेशो जाक्शा तपांइसेनु, नोआह नु लोत आस पालाम दुम्शो खोदेंशो दुम्ब। 31में नाक्ती बारदलीम बाक्बमी खिं गाम मार मार बाक्मा, मेको ब्रदीचा ममालीन। रूमी गेय पाइब खिं मलेतीन। 32लोत आ मीश दोपा बेक्मे, मेको मिम्तीने। उत्पत्ती १९:२६ 33आ गिंम प्रोंइचा माल्ब के आ गिंम योल्ब। आ गिंम सोइक्बमी आ गिंम प्रोंइब। लूका ९:२४ 34मिनु मुर निक्शी ब्राख्ये कामी इप्शो बाक्नीस। का लाइक्चा पुंइसीब, का प्रोंइशा वोइक्चा पुंइसीब। 35मीश मुर निक्शी यात हिल्शा बाक्नीस। का लाइक्चा पुंइसीब, का प्रोंइशा वोइक्चा पुंइसीब। 36वोंइश मुर निक्शी रूम गेय पा बाक्नीस। का लाइक्चा पुंइसीब, का प्रोंइशा वोइक्चा पुंइसीब, दे इन कली देंनुङ” दे शेंदीमी बाक्त। मत्ती २४:४० 37मिनु आ शेंसीबपुकीमी “प्रभु, इन देंशो तेकेर दुम्बा?” दे हिल्लो पामेनु “तेकेर सिनु बाक्मे, मेकेरन गिद हिरसीनीम” देंमाक्त।
Voafantina amin'izao fotoana izao:
लूका 17: susz
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2011, Wycliffe Bible Translators, Inc. All rights reserved.