1Mpanjaka 4
4
Ireo manamboninahitr’i Salômôna
1Nanjaka tamin’i Israely rehetra i Salômôna mpanjaka. 2Izao no lehibe, mpanao raharahany: i Azariasa, zanak’i Sadôka, no filohan’ny mpanao raharaha#4,2 Filohan’ny mpanao raharaha. Praiministra izany, na hoe koa mpisoron-dehibe; fa nanao ny raharahan’ny mpisoron-dehibe tokoa i Azariasa, nony maty i Abiatara sy i Sadôka.. 3I Elihôrefa sy i Ahià, zanak’i Sisà, no mpanoratra#4,3 Mpanoratra: Ny lazaina amin’izany, dia ireo olona izay miandraikitra ny fanoratana ny zavatra vaventy rehetra mitranga ao amin’ny fanjakana, ka nampirina ireny boky ireny ao amin’izay efitrano voaomana ho fitahirizam-boky. Ilay mandahatra ity bokin’ny Mpanjaka ity dia mba nizaha sy nandinika ireo taratasy ireo (1Mpa 11,41; 14,29). Ny fanjakana rehetra tany Atsinanana, dia samy nanana olona ho mpanoratra ny tantarany avokoa (jereo Esd 6,1).; i Jôsafata zanak’i Ahiloda, no mpitahiry boky; 4i Banaiasa zanak’i Jôiadasa no komandin’ny tafika; i Sadôka sy i Abiatara no mpisorona. 5I Azariasa zanak’i Natàna no lehiben’ny mpikarakara ny hanin-kohanina; i Zaboda zanak’i Natàna mpisorona no mpanolo-tsaina, manolotra ny mpanjaka; 6i Ahisara no lehiben’ny tao an-dapa; ary i Adônirama zanak’i Abdà no mpiadidy ny momba ny fanompoana.
Ireo mpikarakara hanin’i Salômôna
7Nanana mpikarakara hanina 12 lahy tamin’i Israely rehetra i Salômôna. Ireo no namonona izay nilain’ny mpanjaka sy ny ankohonany, amin’ny fivelomany, samy tsy maintsy namonona izany ho an’ny volana iray avy isan-taona. 8Izao no anaran’izy ireo: Ben-Hora, tamin’ny tendrombohitr’i Efraima; 9Ben-Dekara, tao Maksesa, tao Salebima, tao Betsamesa, tao Elôna any Betanàna; 10Ben-Heseda, tao Harobôta, azy avokoa i Sokao sy ny tany Efara rehetra; 11Ben-Abinadaba, ny havoan’i Dora rehetra no azy, ary Tafeta zanakavavin’i Salômôna no vadiny#4,11 I Tafeta zanakavavin’i Salômôna no vadiny: Tamin’izay anefa i Salômôna mbola tsy nanana zanaka vavy ampy taona hanambady. Fa lazaina eto mialoha izay zavatra hotanterahina atỳ aoriana.; 12Banà, zanak’i Ahiloda; azy avokoa i Tanàka sy i Magedao ary i Betsàna rehetra, akaikin’i Sartàna, eo ambanin’i Jezraela, hatrany Betsàna, ka hatrany Abelmehôla, hatrany ambadik’i Jekimaana; 13Ben-Gabera tao Ramôtan’i Galaada; izao no azy: Ny tanàna madinik’i Jaira, zanak’i Manase, any Galaada; ny tany Argoba, any Basàna, misy tanàna lehibe 60, mimanda sy misy hidy varahina; 14Ahinadaba zanak’i Adaô tao Manaima; 15Akimaasa tao Neftalì. Izy koa naka ho vady ny zanaka vavin’i Salômôna anankiray dia i Basemata; 16Baanà, zanak’i Hosì, tao Asera sy i Alota; 17Jôsafata zanak’i Faroe, tao Isakara; 18Semeià zanak’i Elà, tany Benjamina; 19Gabara zanak’i Orì, tamin’ny tany Galaada, amin’ny tany Sehôna, mpanjakan’ny Amôreana, sy Oga mpanjakan’i Basàna, fa iray ihany no mpikarakara tamin’izany tany izany. 20Maro toy ny fasika eny amoron-dranomasina i Jodà sy i Israely; ary nihinana sy nisotro sy nirobiroby.
Voafantina amin'izao fotoana izao:
1Mpanjaka 4: MBC
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.