1Samoela 5
5
Ny nanjò ny Filistinina tamin’ny Fiaran’ny Fanekena
1Nony azon’ny Filistinina ny Fiaran’Andriamanitra dia nentiny avy tany Eben-Ezera ho any Azota#5,1 Azota (heb Asaoda): Io dia renivohitry ny Filistinina. Ankehitriny dia vohitra kely foana izy ireo (jereo Jôs 13,3).. 2Nalain’ny Filistinina ny Fiaran’Andriamanitra ka nampidiriny tao an-tranon’i Dagôna sy napetrany teo anilan’i Dagôna#5,2 Dagôna: Dia sampy nataon’ny Filistinina ho andriamaniny (jereo Mpits 16,3).. 3Nony ampitso, nifoha maraina ny Azôtianina, ka indro i Dagôna nitsingidina nihohoka tamin’ny tany, teo anoloan’ny Fiaran’i Iaveh. Dia nalainy i Dagôna ka napetrany teo amin’ny fitoerany indray. 4Ny ampitson’izay dia nifoha maraina koa izy ireo, ka indro i Dagôna fa nitsingidina nihohoka tamin’ny tany, teo anoloan’ny Fiaran’i Iaveh, ary ny lohan’i Dagôna sy ny tanany roa tapaka, ka teo an-tokonam-baravarana, 5fa ny tenabeny miendri-kazandrano no sisa. Izany no tsy anitsahan’ny mpisoron’i Dagôna mbamin’izay rehetra miditra ao an-tranon’i Dagôna any Azota, ny tokonam-baravaran’i Dagôna mandrak’androany.
6Ary niampatra namely ny Azôtianina#5,6 Azôtianina: Izany hoe mponina tao Azota. ny tanan’i Iaveh ka nampiferin’aina azy#5,6 Nampiferin’aina azy: Ny olona nasiany tamin’ny aretina ary ny tany koa nasiany tamin’ny loza samihafa.; fa namely azy tamin’ny vay, tao Azota sy tao amin’ny faritaniny.
7Nony nahita ny nahazo azy ny Azôtianina dia nanao hoe: «Aoka tsy hijanona atỳ amintsika ny Fiaran’ny Andriamanitr’i Israely, fa manampatra ny tanany amintsika sy amin’i Dagôna andriamanitsika izy». 8Dia naniraka olona izy ireo, niantso ny filohan’ny Filistinina rehetra hankeo aminy, ary nilaza hoe: «Hataontsika ahoana ity Fiaran’ny Andriamanitr’i Israely?» Ka hoy ny navalin’ireo: «Aoka hafindra any Geta ny Fiaran’ny Andriamanitr’i Israely»; ka nafindra tao ny Fiaran’ny Andriamanitr’i Israely. 9Kanjo vantany vao nafindra tany dia niampatra namely ny tanàna ny tanan’i Iaveh, ka tsiravina indrindra ny tao, fa namely ny olona tao an-tanàna izy hatramin’ny kely ka hatramin’ny lehibe ka nipoiran’ny vay izy ireo. 10Tamin’izany dia nalefany hankany Akarôna ny Fiaran’Andriamanitra, dia nibabababa ny Akarônita nanao hoe: «Nentiny tatỳ amintsika ny Fiaran’ny Andriamanitr’i Israely mba hahafaty antsika sy ny firenentsika.» 11Ka naniraka ny olona niantso ny filohan’ny Filistinina rehetra izy, ka hoy izy: «Alefaso ny Fiaran’ny Andriamanitr’i Israely, hiverina any amin’izay nitoerany indray, mba tsy hahafaty anay sy ny firenenay.» 12Fa nanerana ny tanàna ny horohoron’ny fahafatesana, ary namely azy mafy ny tanan’Andriamanitra. Ny olona sisa tsy maty dia nasian’ny vay, ka nanakatra ny lanitra ny fibabababam-pahoriana avy tao an-tanàna.
Voafantina amin'izao fotoana izao:
1Samoela 5: MBC
Asongadina
Hizara
Mampitaha
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.