Izaia 34
34
Ny niafaran’i Edôma
(Jereo Iz 63,1-6; Jer 49,7-22)
1Manatòna hihaino, ianareo firenena,
mampandria sofina, ianareo vahoaka!
Aoka hihaino avokoa ny tany mbamin’izay rehetra ao aminy;
izao tontolo izao mbamin’ny vokatra rehetra avy aminy.
2Fa mihatra amin’ny firenena rehetra ny haviniran’i Iaveh,
ary amin’ny miaramilany rehetra ny hatezerany;
nataony anatema, natolony hovonoina ireny.
3Ny maty amin’izy ireo hariana,
ny fatiny hitera-pofona maimbo,
ary hiempo azon’ny rany ny tendrombohitra#34,3 Hiempo azon’ny rany ny tendrombohitra. Izany hoe, ny tontalin’ny ra latsaka, dia ho sahala amin’ny rano tondraka mampikoa tendrombohitra. Izany dia filazana ny zavatra tafahoatra loatra..
4Ny tafiky ny lanitra rehetra#34,4 Ny tafiky ny lanitra rehetra, sns. Izany dia mba hanambara fa ny masoandro amam-bolana, sns. dia hiaraka hikorontana koa. ho zary vovoka;
ny lanitra hahorona hoatra ny taratasy#34,4 Hahorona hoatry ny taratasy: Ny boky fahiny dia natao tamin’ny hodi-kazo ka azo ahorona sahala amin’ny tsihy hisatra. Izay voalaza amin’ity andininy ity sy ny andininy manaraka dia manondro ny fara andron’izao tontolo izao koa. Ampitahao amin’i Mt 24,29; 2Pier 3,12; Apôk 6,12-14.;
ary ny tafiny rehetra hiraraka
hoatra ny firaraky ny ravim-boaloboka,
hoatra ny firaraky ny ravina malazo amin’ny aviavy.
5Fa efa mamon-dra teny amin’ny lanitra ny sabatro,
ka indro izy midina ho any Edôma,
ho any amin’ny firenena nataoko anatema hitsarana azy.
6Ny sabatr’i Iaveh dia feno ra,
mihosi-menaka,
sy ran-janak’ondry aman’osilahy,
ary sabora fonom-boan’ondralahy.
Fa manao sorona ao Bôsrà, i Iaveh,
sy famonoam-be ao amin’ny tanin’i Edôma#34,6 Bôsrà: anisan’ny tanàna malaza any Idomea. Tanin’i Edôma, anisan’ny fahavalon’i Israely.
7Miaraka aripaka amin’izany koa ny ombimanga,
sy ny omby miaraka amin’ny ombalahy.
Vonto ra ny taniny,
mandriaka ny menaka ao amin’ny vovok’izy ireo.
8Fa andro famalian’i Iaveh izany,
ary taona famaliana#34,8 Taona famaliana: izany hoe amin’ny taona izay hanomezan’ny Tompo rariny an’i Siôna, ka hamerenany aminy izay nalain’ny fahavalony taminy. ny nataony tamin’i Siôna.
9Hanjary dity ny reniranony,
ho solifara ny vovo-taniny,
ary ho tonga dity mahamay ny taniny,
10ka ny firehiny tsy hovonoina na andro na alina,
ary ny setrony, hisavoana mandrakizay.
Ho foana amin’ny taona mifandimby izy io,
tsy hisy olona handeha hamaky azy mandrakizay doria.
11Ny pelikano aman-tsokina no hivolon-tompony ao;
ny vorondolo sy ny goaika no honina ao;
ary hoenjehina eo aminy
ny famolain’ny fikorontanana
sy ny levin’ny fanafoanana.
12Tsy hisy intsony ny lehibe hanangana mpanjaka;
ary hofoanana avokoa ny mpanapaka ao.
13Tsilo no haniry ao an-dapany;
ary voaroy amam-beroberokamboa no ho eo an-tranony mimanda,
ka ho fieren’amboadia
sy ho valan’ostritsa foana izy.
14Ny kary aman’amboadia, ho tafahaona ao;
ary ny sitara hifampiantsoantso ao.
Ny lolovokatra mpiseho alina hiorim-ponenana ao koa,
sy hahazo fitoerana fitsaharany.
15Ao ny bibilava no hanao ny akaniny sy hanatody
sy hikotrika azy hanangona ny zanany eo ambanin’ny alokalony.
Hiangona ao avokoa ny papango.
16Izahao ao amin’ny bokin’i Iaveh ka vakio:
Tsy misy tsy ao ireo na dia iray aza#34,16 Tsy misy tsy ao na iray aza: dia izay nambarako. Rehefa azon’ny mpaminany antoka ny fahamarinan’ny faminaniany, dia mazàna ataony amin’izay, ka rehefa voalazany amin’ny vahoaka, dia tanany an-tsoratra, mba hoentina hanamarinana rehefa hatrizay mihatra tokoa ny fahamarinan’izay nambarany. Jereo Iz 30,8.,
na ity na itsy tsy misy tsy tonga ao.
Fa ny vavan’i Iaveh no efa nandidy izany,
ary ny fofon’ainy no nanangona azy.
17Tenany no nanao loka ho an’ireo,
ary tanany no nizara ny tany ho azy ireo amin’ny famolaina;
ka hanana izany mandrakizay ireo;
ary honina ao amin’ny taona mifandimby.
Voafantina amin'izao fotoana izao:
Izaia 34: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.