Izaia 37
37
Filana hevitra amin’i Izaia mpaminany
(Jereo 2Mpa 19,1-7)
1Nony nandre izany teny izany i Ezekiasa, dia notriariny ny fitafiany, notafiny ny lasàka, lasa izy nankao an-tranon’i Iaveh. 2Ary nirahiny i Eliasima, lehiben’ny ao an-dapa, sy i Sobnà mpanoratra, ary ny lohandohan’ny mpisorona, samy voatafy lasàka, ho any amin’i Izaia zanak’i Amôsa, mpaminany, 3ka nanao taminy hoe: «Izao no lazain’i Ezekiasa: Androm-pahoriana amam-pamaizana sy fahafaham-baraka izao andro izao, fa ny zaza vonon-kivoaka avy ao am-bohoka nefa ny hery hiterahana azy, tsy misy. 4Angamba ho ren’i Iaveh Andriamanitrao, ny tenin’ny lehiben’ny mpandroso divay nirahin’ny mpanjakan’i Asiria, tompony, hanevateva an’Andriamanitra velona, ka hosaziny noho ny teny efa ren’i Iaveh Andriamanitrao. Koa manaova fivavahana ho an’izay sisa mbola tavela.»
5Lasa nankany amin’i Izaia ireo mpanompon’i Ezekiasa, 6dia hoy i Izaia tamin’izy ireo: «Izao no holazainareo amin’ny tomponareo: Toy izao no tenin’i Iaveh: Aza matahotra ny teny efa renao, izay naniratsiran’ny mpanompon’ny mpanjakan’i Asiria Ahy. 7Fa indro Aho, manisy fanahy ao anatiny, hany ka noho ny vaovao#37,7 Ka noho ny vaovao: Izany vaovao izany, dia ny fanafihan’i Tarakà (and faha-9); fa indrindra ny faharesen’ny miaramila asirianina tao akaikin’i Jerosalema (and faha-26). hampandrenesina azy dia hiverina ho any amin’ny taniny izy, dia hataoko lavon-tsabatra any amin’ny taniny.»
Ny niverenan’ny lehiben’ny mpandroso divay
(Jereo 2Mpa 19,8-9)
8Dia niverina ny lehiben’ny mpandroso divay ka nahita ny mpanjakan’i Asiria, nanao fahirano an’i Lobnà; efa reny ny nialan’ny tompony tany Lakisa. 9Ary nandre vaovao ny mpanjakan’i Asiria ny amin’i Tharakà#37,9 Tarakà: Izy no mpanjakan’i Ejipta manontolo (na amin’ny tany sasany), tamin’izay, ary izy no Faraôna nalaza indrindra tamin’ny fanjakan’ny Etiôpianina., mpanjakan’i Etiôpia, fa hoy ny olona taminy: «Efa niainga izy io hanafika anao.»
Tantaraina fanindroany ny fanafihan’i Senakeriba
(Jereo 2Mpa 19,9-19)
Nony vao nandre izany izy, dia nandefa iraka ho any amin’i Ezekiasa, hanao hoe: 10«Izao no holazainareo amin’i Ezekiasa mpanjakan’i Jodà ataovy hoe: Aza mety hofitahin’ny Andriamanitrao, izay itokianao ianao, ataony hoe: ‹Tsy hatolotra eo an-tanan’ny mpanjakan’i Asiria i Jerosalema.› 11Indro efa renao ny nafitsoky ny mpanjakan’i Asiria, ny tany rehetra, fa nataony anatema izany!... Ka ianao ve dia ho voavonjy? 12Moa nahavonjy azy va ireo andriamanitry ny firenena noravan’ny razako dia i Gôzàna, i Harama, i Resefa, ary ny taranak’i Edena, izay any Telasara? 13Aiza avy ny mpanjakan’i Emata, ny mpanjakan’i Arfada, ary ny mpanjakan’ny tanàna Sefarvaima, ny an’i Anà, ny an’i Avà?»
14Noraisin’i Ezekiasa avy eny an-tanan’ireo iraka ny taratasy, ka novakiny; dia niakatra ho ao an-tranon’i Iaveh izy sady namelatra izany teo anatrehan’i Iaveh. 15Ary nivavaka teo anatrehan’i Iaveh i Ezekiasa nanao hoe: 16«Ry Iavehn’ny tafika, Andriamanitr’i Israely ô, izay mipetraka amin’ny Kerobima, Ianao irery no Andriamanitry ny fanjakana rehetra ambonin’ny tany, Ianao no namorona ny lanitra sy ny tany. 17Atongilano ny sofinao, Iaveh, ka mihainoa! Ahirato ny masonao, Iaveh, ka mijere! Henoy avokoa ny tenin’i Senakeriba izay nalefany, hanevatevana an’ilay Andriamanitra velona. 18Marina tokoa, ry Iaveh ô, fa i Senakeriba dia nandrava ny firenena rehetra mbamin’ny taniny, 19ary nanipy ny andriamanitr’ireny tao anaty afo, satria tsy andriamanitra ireny, fa asan-tanan’olombelona, vato aman-kazo, ka dia voaravany. 20Ankehitriny, Iaveh Andriamanitray ô, vonjeo amin’ny tanan’i Senakeriba izahay; ary aoka ho fantatry ny fanjakana rehetra ambonin’ny tany, fa Ianao irery no Iaveh.»
Tenin’i Izaia mpaminany
(Jereo 2Mpa 19,20-28)
21Dia naniraka ho any amin’i Ezekiasa i Izaia zanak’i Amôsa, hilaza hoe: «Izao no lazain’i Iaveh, Andriamanitr’i Israely: Efa reko ny vavaka nataonao tamiko, ny amin’i Senakeriba, mpanjakan’i Asiria; 22ka izao no teny nolazain’i Iaveh ny aminy:
Maneso anao, mihomehy anao
ilay virjiny zanaka vavin’i Siôna;
manifikifi-doha eo aorianao,
ny zanaka vavin’i Jerosalema!
23Iza no notsiratsirainao sy nompanao?
Hamely an’izay no nanandratanao feo,
sy niandranandrànanao maso? -
24Hamely an’ilay Masin’i Israely.
Ny mpanomponao no efa naniratsiranao ny Tompo,
ary ianao efa nanao hoe: ‹Amin’ny hamaroan’ny kalesiko
no efa niakarako teny antampon-tendrombohitra,
teny amin’ny fara sisin’i Libàna;
hokapaiko ny avo indrindra amin’ny sipresa ao aminy,
ny tsara indrindra amin’ny sipresa ao aminy,
dia hahatakatra ny tendrony avo indrindra aho,
mbamin’ny alany, hoatra ny saha misy hazo mamoa.
25Nihady aho, dia manan-drano hosotroina#37,25 Nihady aho dia nanan-drano hosotroina: Izany hoe: ataoko daholo izay rehetra tiako hatao, ka tanteraka.;
homainiko amin’ny faladian-tongotro
ny onin’i Ejipta rehetra.›
26Tsy mba renao va fa efa hatramin’ny ela dia nanao izany aho,
ary efa noforoniko hatramin’ny andro taloha?
Ankehitriny ataoko izay hahatanterahan’izany.
hampanjarianao korontan-javatra miavosa
ny tanàna mimanda.
27Tsy manan-kery ny mponina
fa raiki-tahotra sy mivadi-po;
izy ireo manahaka ny ahitra eny an-tsaha
aman-java-maitso milenodenoka,
tahaka ny ahitra ambony tafon-trano,
tahaka ny vary mandavenona, maina alohan’ny fahamasahany.
28Fantatro anefa ianao na mipetraka ianao
na mivoaka ianao, na miditra ianao;
fantatro ny hatezeranao amiko.
29Noho ianao misafoaka amiko,
sy noho ny fireharehanao efa tafakatra mby ao an-tsofiko,
izaho kosa hametraka ny masom-biko#37,29 Hametraka ny masom-biko, sns. Fanaon’ny Asirianina ny mitondra ny olom-babony amin’ny kofehy mifatotra amin’ny masom-by na fangaro vy, natao mahazo ny molony ambany na ambony mankamin’ny orony. Ny teny manaraka dia mihatra amin’i Ezekiasa mpanjaka. amin’ny oronao
sy ny lamboridiko eo amin’ny vavanao,
ka hamerina anao amin’ny lalana niavianao».
Famantarana nomena an’i Ezekiasa
(Jereo 2Mpa 19,20-31)
30Ary izao no ho famantarana#37,30 Ary izao no famantarana, sns. Ny fanahin’i Senakeriba tany Siria dia naharitra herintaona. Tonga tany Palestina ny Asirianina tamin’ny fararano, ka nandevona na nanongotra ny voly rehetra; ka nandritra izany taona voalohany izany, dia tsy nahita hanin-kohanina ny mponina, afa-tsy ny vary raraka, izay sendra tafajanona tamin’ny tany. Koa noho izany tsy nisy voa azo nafafy tamin’ny lohataona: ka tamin’ny taona faharoa dia izay naniry ho azy no nohaniny. Dia izay vao azon’izy ireo natao malalaka tsara ny mamboly ny taniny. ho anao: Amin’ity taona ity, ny vokatra avy amin’ny vary raraka an-tany no hohanina; amin’ny taona faharoa ny maniry ho azy no hohanina; fa amin’ny taona fahatelo kosa hamafy sy hijinja ianareo; hamboly tanimboaloboka sy hihinana ny vokany ianareo. 31Izay voavonjy tamin’ny taranak’i Jodà, izay sisa tavela mbola handatsaka faka any ambany, ary hamoa voa any ambony. 32Fa hisy sisa hivoaka avy amin’i Jerosalema, ary hisy afaka avy ao an-tendrombohitra Siôna. Izany no hoefain’ny firehetam-pon’i Iavehn’ny tafika.
Tenin’Andriamanitra momba an’i Asora
(Jereo 2Mpa 19,32-34)
33Noho izany izao no lazain’i Iaveh, ny amin’ny mpanjakan’i Asiria:
«Tsy hiditra amin’izany tanàna izany izy,
na handefa zana-tsipìka ao aminy,
na hanangana ampinga eo anoloany,
na hanandratra tovon-tany hamelezana azy.
34Hiverina amin’ny lalana niaviany izy,
fa tsy ho tafiditra amin’ity tanàna ity.
Teny ton’i Iaveh.
35Hiaro ity tanàna ity Aho mba hamonjy azy,
noho ny amin’ny Tenako, sy noho ny amin’i Davida mpanompoko».
Sazin’i Senakeriba
(Jereo 2Mpa 19,35-37)
36Dia nivoaka ny Anjelin’i Iaveh#37,36 Dia nivoaka ny Anjelin’i Iaveh, sns. Angamba pesta no nentiny nandringana ireo vahoaka asirianina be dia be ireo., ka namely olona 185.000 teo an-tobin’ny Asirianina, ary nony vao nifoha ny olona tamin’ny maraina dia indreo maty avokoa ireo. 37Ary i Senakeriba mpanjakan’i Asiria, nony avy nandrava ny tobiny, dia lasa nody, 38ka nitoetra tany Niniva. Fa raha ilay niankohoka tao an-tranon’i Nesrôka, andriamaniny iny izy, dia nokapain’i Adrameleka sy i Sarasara, zanany lahy, tamin’ny sabatra, ka nandositra tany amin’ny tanin’ny Ararata izy ireo, dia i Asaradôna, zanany lahy, no nanjaka nandimby azy.
Voafantina amin'izao fotoana izao:
Izaia 37: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.