Izaia 62
62
Tononkalo faharoa fiderana an’i Jerosalema tafatsangana indray
1Noho ny amin’i Siôna tsy hangina aho,
ary noho ny amin’i Jerosalema, tsy hiala sasatra aho,
mandra-piposaky ny fahamarinany,
hoatra ny hazavan’ny maraina;
sy mandra-pamirapiratry ny famonjeny#62,1 Fahamarinany, famonjeny: I Jesoa Kristy ihany no lazaina amin’izany.,
hoatra ny fanilo.
2Hahita ny fahamarinanao ny firenena,
hahita ny voninahitrao ny mpanjaka rehetra,
ka hantsoina amin’ny anaram-baovao#62,2 Anaram-baovao. Ny ampanantenain’Andriamanitra an’i Jerosalema amin’izany teny izany, dia ny anarana izay homen’Andriamanitra ny Egliziny, izay hantsoina hoe: Eglizin’i Jesoa Kristy, Eglizy Kristianina. ianao,
izay hofidin’ny vavan’i Iaveh.
3Ho satroboninahitra eo an-tanan’i Iaveh ianao,
sy ho hamàman’andriana, eo an-tanan’ny Andriamanitsika.
4Tsy hisy intsony hanao anao hoe «i Nafoy»;
ary tsy hisy intsony hiantso ny taninao hoe «i Faharinganana.»
Fa ny hiantsoana anao dia hoe «I Ankasitrahiko»;
ary ny taninao «i Vady ampakarina».
Satria i Iaveh hankasitraka anao;
ary ny taninao hahazo vady.
5Tahaka ny ampakaran’ny zatovo ny virjiny ho vadiny,
no hampakaran’ny zanakao anao;
ary tahaka ny hamalifalian’ny ampakarina ny mpampakatra,
no hamalifalianao ny Andriamanitrao.
6Eo ambonin’ny mandanao, ry Jerosalema,
no efa nametrahako mpiambina;
ka tsy hangina intsony ireny,
na andro na alina#62,6 Na andro na alina. Izany dia oha-teny enti-milaza fa amin’ny andro isian’ny ady, dia apetraka manodidina sy amin’ny fitoerana avo ny mpiambina, mba hitsikilo ny fihetsehan’ny fahavalo. - Ary ndrao matory izy ireo, dia nodidiana mba hifampiantsoantso matetika, ka mifamaly toy izany andro aman’alina. Teto amintsika ny mpiambina dia miantsoantso matetika hoe: Zovy! zovy! Izany mpiambina izany, araka ny hevitry ny sasany, dia ny mpaminany; ny sasany kosa milaza fa ny Israelita tia vavaka, ary ny sasany indray mihevitra fa Anjely tsy hita maso izay miambina ny tanàna..
7O ry zareo mpampahatsiaro an’i Iaveh ô,
aza mitsahatra ianareo;
ary aza avelanareo hitsahatra Izy,
mandra-panangany an’i Jerosalema indray,
sy mandra-panaony azy ho fideran’ny tany.
8I Iaveh efa nianiana tamin’ny tanany ankavanana
sy tamin’ny sandriny mahery hoe:
«Ny varinao tsy homeko
hohanin’ny fahavalonao intsony,
ary tsy hosotroin’ny zanaky ny hafa firenena intsony ny divainao,
vokatry ny fisasaranao.
9Fa izay mijinja ny vary ihany no hihinana azy,
ka hidera an’i Iaveh;
ary izay hioty ny voam-boaloboka ihany no hisotro azy,
eo amin’ny kianjan’ny fitoerako masina».
10Mivoaha, mivoaha amin’ny vavahady ianareo,
areno ny lalan’ny vahoaka.
Savao, savao ny arabe, esory ny vato eo aminy;
manangàna saina eo ambonin’ny vahoaka.
11Izao no nambaran’i Iaveh,
hatrany amin’ny faran’ny tany:
«Lazao amin’ny zanaka vavin’i Siôna hoe:
Indro, avy ny Mpamonjy anao;
ny valisoa homeny efa eny aminy;
ary ny tamby hatolony efa eo anoloany.
12Izy ireo hantsoina hoe: ‹Firenena masina,›
‹Ny navotan’i Iaveh›;
ary ianao kosa hantsoina hoe: ‹Ilay irina›,
‹Tanàna tsy foy› ».
Voafantina amin'izao fotoana izao:
Izaia 62: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.