Izaia 66
66
Tenin’Andriamanitra
1Izao no lazain’i Iaveh:
Ny lanitra no seza fiandrianako;
ary ny tany no fitoeran-tongotro.
Ka trano inona no hataonareo ho Ahy,
ary fitoerana manao ahoana no ho fitsaharako?
2Izao rehetra izao nataon’ny tanako avokoa;
ka izany no nahatonga azy ho misy;
- teny marin’i Iaveh.-
Izao no olona tsinjoviko#66,2 Izao no olona tsinjoviko: Ny olona ankasitrahiko dia izay manetry tena sy manaiky ary tia namana., dia izay manetry tena
sy torotoro fo, ary mangovitra amin’ny teniko.
Tsy azo afangaro ny fivavahana
3Fa izay mamono omby#66,3 Izay mamono omby, sns. Ny fanatitry ny Jody izay atao fomba fotsiny, dia tsy ankasitrahin’Andriamanitra. I Izaia dia mampitaha izany amin’ny vonoana olona sy ny fanatitra voararan’ny lalàna. Heverin’izy ireo, fa rehefa manatitra sorona ho an’Andriamanitra, dia hakimpin’Andriamanitra ny masony, tsy hijery ny fanompoan-tsampiny izay ataony. I Izaia dia efa nanao izany faniniana izany ao amin’ny toko 1,11 sy ny manaraka., hoatra ny mamono olona;
izay manao sorona ondry, hoatra ny manakenda alika;
izay manolotra fanatitra, hoatra ny manatitra ran-kisoa;
izay mandoro emboka, hoatra ny misaotra ny sampy.
Tahaka ny ifidianany ny lalany,
sy ankasitrahan’ny fanahiny ny fahavetavetany,
4toy izany koa aho hifidy ny fampahoriana azy
sy hampianjera amin’izy ireo ny zavatra atahorany,
satria miantso Aho, fa tsy nisy namaly;
niteny Aho, fa tsy nohenoin’izy ireo;
izay ratsy eo imasoko no nataony;
ary izay tsy sitrako no nofidiny.
Tononkalo Apôkalipsa
5Mihainoa ny tenin’i Iaveh,
ianareo izay mangovitra amin’ny teniny:
Niteny ireo rahalahinareo izay mankahala anareo,
sady nandroaka anareo noho ny amin’ny Anarako, nanao hoe:
«Aoka hasehon’i Iaveh ny voninahiny,
mba hahitanay ny fifalianareo!»
Kanefa izy ireo no ho menatra.
6Injany misy kotroka sy hahohaho avy any amin’ny tanàna,
ary horakoraka avy ao an-tempoly!
dia ny feon’i Iaveh,
mandoa ny karaman’ireo fahavalony izany.
7Mbola tsy nihetsi-jaza izy#66,7 Mbola tsy mihetsi-jaza izy: Ny hoe izy dia manambara an’i Siôna., dia efa niteraka;
mbola tsy nanaintaina akory, dia efa velon-jazalahy#66,7 Zazalahy: Izany zazalahy nivoaka haingana tao an-kibon’i Siôna izany, dia ny Kristianina izay hivoaka haingana avy ao amin’ny sinagoga, feno tanjaka sy herim-pon-dehilahy fa toy izany daholo izy rehetra, fa indrindra ny Apôstôly sy ny Martirin’ny Eglizin’i Jesoa Kristy.!
8Zovy no mba efa nandre izay toy izany,
zovy no mba efa nahita izay tahaka izany.
Misy tany iray teraka indray andro va?
na firenena iray natao indray niteraka?
no vao nihetsi-jaza i Siôna
dia niteraka ireo zanany?
9Hanokatra ny fiterahana va Aho, ka tsy hampiteraka?
hoy i Iaveh;
sa Izaho izay mampiteraka indray no hisakana tsy hiteraka?
hoy ny Andriamanitrao
10Miaraha mifaly amin’i Jerosalema ianareo,
ary miravoravoa noho ny aminy, ianareo rehetra tia azy.
Ary aoka hiara-mientan-kafaliana aminy avokoa,
ianareo nitomany azy;
11mba hinonoanareo sy hivokisanareo,
amin’ny nonon’ny fampiononany;
ary mba hankafizanareo amim-pahafinaretana,
ny hafenoan’ny voninahiny.
12Satria izao no lazain’i Iaveh:
Indro hataoko misononoka eo aminy, ny fiadanana hoatra ny ony,
sy ny voninahitry ny firenena, hoatra ny renirano tondraka;
ka ianareo dia hampinonoina, hotrotroina,
ary hosafosafoina eo am-pofoana.
13Hoatra ny olona alan-dreniny alahelo,
no hanalako alahelo anareo,
ka dia ho afaka alahelo ao Jerosalema ianareo.
14Hahita izany ianareo, ka ho faly ny fonareo,
ary hahazo aina indray hoatra ny ahi-maitso ny taolanareo.
Hataon’ny tanan’i Iaveh izay hahalalan’ny mpanompony azy,
sy hahalalan’ny fahavalony kosa ny fahatezerany.
15Satria indro i Iaveh tamy ao amin’ny afo;
ary ny kalesiny dia sahala amin’ny tadio,
hamoaka ny fahatezerany amim-pitenenana,
sy ny fandrahonany amin’ny afo midedadeda.
16Fa amin’ny afo no anaovan’i Iaveh ny fitsarana,
ary ny sabany no ampiharany azy amin’ny nofo rehetra;
ary maro no ho voagorobak’i Iaveh.
Fanoherana ny fivavahana amin’ny sampy
17Izay manokan-tena sy mandio tena ho ao an-tanimboly,
eo ivohon’ilay iray efa mijoro eo afovoany,
izay mihinana hena kisoa
sy ny zava-betaveta mbamin’ny totozy,
dia hiara-devona avokoa, - teny marin’i Iaveh.-
18Fa Izaho mahalala ny asany aman-kevitr’izy ireo!
Lahateny momba ny farandro
Tonga ny fotoana hamoriana
ny firenena rehetra mbamin’ny samy hafa fiteny rehetra.
Ho avy izy ireo ka hahita ny voninahitro,
19ary hanao fahagagana eo amin’izy ireo Aho.
Ary ny afa-nandositra taminy dia hanirahako ho any amin’ny firenena,
any Tarsisa, Fola, Loda mpandefa zana-tsipìka,
Tobala sy Javàna, ary any amin’ireo nosy lavitra,
tsy mbola nandre ny lazako akory,
na nahita ny voninahitro;
dia hitory ny voninahitro any amin’ny firenena ireo.
20Ny rahalahinao rehetra dia naverin’izy ireo,
avy amin’ny firenena rehetra,
ho fanatitra ho an’i Iaveh;
haveriny mitaingin-tsoavaly, ambony kalesy, am-pilanjana,
mitaingina mole aman-drameva,
ho ao amin’ny tendrombohitro masina,
ho any Jerosalema, hoy i Iaveh,
toy ny itondran’ny zanak’i Israely ny fanatitra
ao anaty lovia, any an-tranon’i Iaveh.
21Ary misy halaiko aza amin’izy ireo,
ho mpisorona#66,21 Misy halaiko... ho mpisorona: Izany hoe: Tamin’ny lalàna teo aloha, dia ny fianakavian’i Levi ihany no azo nakana olona ho mpanao raharaham-pivavahana. Izao kosa araka ny lalàna vaovao, voalazan’io faminanian’i Izaia io, dia tsy mifidy fianakavian’olona. Ny Tompo hifidy ny mpisorony sy ny levitany amin’ny firenena rehetra, tsy asiany tombo sy ala, fa na dia izay vao zazavao amin’ny finoana aza, raha misy mendrika dia hoantsoiny. - Ny faminaniana izay manambara zavatra hita mibaribary tahaka itony, dia tsy ho azon’ny Jody lavina velively. sy Levita, hoy i Iaveh.
22Fa tahaka ny lanitra vaovao,
sy ny tany vaovao efa hoarîko,
haharitra eo anatrehako, - teny marin’i Iaveh,-
no haharetan’ny taranakareo sy ny anaranareo.
23Isaky ny voalohan’ny volana isaky ny voalohan’ny volana,
sy isan-tsabata isan-tsabata,
ho avy hiankohoka eo anatrehako ny nofo rehetra,
hoy i Iaveh.
24Ary rehefa nivoaka izy ireo,
dia hahita ny fatin’ireo olona niodina tamiko;
fa ny kankan’ireny#66,24 Ny kankan’ireny: I Jesoa Kristy dia manazava izany teny izany amin’ny filazana ny fahoriana mangidy any amin’ny afobe, izay anaikeran’ny nenina ny fon’ny olom-bery tahaka ny kankana ao anaty, izay hikiky tsy mety maty sy ny afo mampijaly tsy ho faty na oviana na oviana. tsy ho faty
ny afony tsy hovonoina,
ary izy dia ho zava-maharikoriko amin’ny nofo rehetra.
Voafantina amin'izao fotoana izao:
Izaia 66: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.