Jeremia 23
23
Tenin’Andriamanitra momba ny Mesia.
Ilay mpanjakan’ny ho avy
(Jereo Ezek 34,1)
1Loza ho an’ny mpiandry manary sy manahaka
ny ondry eo amin’ny kijanako, - teny marin’i Iaveh! -
2Koa izao no lazain’i Iaveh, Andriamanitr’i Israely,
ny amin’ireo mpiandry miandry ny vahoakako:
Ny ondriko dia nahahakareo, naronjindronjinareo;
tsy niahy azy ireo ianareo.
Koa indro Aho kosa mba hiahy, hamelezako anareo,
ny haratsian’ny nataonareo, - teny marin’i Iaveh. -
3Ary Izaho dia hanangona izay sisa amin’ny ondriko,
avy eny amin’ny tany rehetra nandroahako azy,
dia haveriko ho eo amin’ny kijanany izy;
ka hitombo sy hihamaro.
4Ary hanangana mpiandry izay hiandry azy Aho#23,4 Hanangana mpiandry ... Aho. Raha alaina ara-bakiteny izany teny izany, dia i Zôrôbabela sy i Jesosa zanak’i Josedeka mbamin’ireo hafa koa izay nanjaka tamin’i Jodà, taorian’ny fahababoana, no lazaina eto; nefa raha alaina ho hevitra ambonimbony kokoa noho izany, dia manambara ny Apôstôlin’i Jesoa Kristy izay notendrena hitondra sy hiandry ny olo-marina izay nalana tamin’ny fanandevozan’ny demony.;
ka tsy hanan-tahotra na vadi-po intsony izy;
sady tsy hisy diso tsy eo#23,4 Tsy hisy diso tsy eo. I Jesoa Kristy, dia toa mahatsiaro izany teny izany ao amin’ny Evanjely (Jn 6,39; 17,12; 18,9)., na dia iray aza,
- teny marin’i Iaveh. -
5Indro avy ny andro, - teny marin’i Iaveh, -
hananganako ho an’i Davida solofo marina#23,5 Solofo marina: Fombam-pitenenan’ny mpaminany izany, ka tamin’ny voalohany, dia efa nataon’i Iz 4,2; fanindroany dia nolazain’i Jer 33,15; ary tatỳ aoriana koa, dia mbola notenenin’i Zak 3,8; 6,12, mba hanambaràna ny Mesia. Jereo Iz 11,1 dia ilay hoe «Misy rantsana hipoitra amin’ny fototr’i Jese, ary misy solofo haniry amin’ny faka.»;
hitondra ny hitsiny sy ny rariny amin’ny tany.
6Amin’ny androny, i Jodà hovonjena;
i Israely handry feizay;
ary izao no anarana hanononana azy:
Iaveh-fahamarinantsika#23,6 I Iaveh. Izany anarana izany dia anarana tsy mba fanome afa-tsy ilay Andriamanitra nahary tongotra aman-tanana ihany. Ary ny fototra ambarany eto, dia ny amin’ny Mesia, ny amin’i Jesoa Kristy, satria i Jesoa Kristy dia tena Andriamanitra Marina tokoa, Zanak’Andriamanitra sahala sady miray fomba amin’Andriamanitra Rainy, ary fototry ny fahamarinantsika..
7Noho izany, indro avy ny maraina, - teny marin’i Iaveh, -
izay tsy hanaovana intsony hoe: Velona i Iaveh,
izay nitondra ny zanak’i Israely niakatra
avy any amin’ny tany Ejipta;
8fa hoe: Velona i Iaveh,
izay nitondra sy nampody
ny firenena taranak’i Israely,
avy any amin’ny tany avaratra
sy ny tany rehetra nandroahako azy.
Dia honina eo amin’ny taniny izy ireo.
Boky kely milaza ny toetran’ireo mpaminany sandoka
9Ho an’ireo mpaminany#23,9 Ho an’ireo mpaminany: Mpaminany sandoka, ka marobe izy tamin’izay.:
Ny foko torotoro ato anatiko;
ny taolako rehetra mipararetra;
izaho hoatra ny olona mamo
hoatra ny olona leon-divay,
eo anatrehan’i Iaveh sy eo anatrehan’ny teniny masina.
10Fa feno fijangajangana ny tany#23,10 Feno fijangajangana ny tany. Ny fahalotoana no lazaina amin’io teny io, ary koa ny fanompoan-tsampy.;
noho ny fanozonana dia misaona ny tany;
maina ny kijana any an’efitra.
Ny idodododoan’ireo dia ny ratsy;
ny heriny dia ny tsy rariny.
11Hatramin’ny mpaminany ama-mpisorona aza no olona tsy voahasina,
ary hitako hatrao an-tranoko aza ny haratsiany#23,11 Ny haratsiany. Ny haratsiany dia ny nametrahany ny sampiny tao amin’ny Tempoly. Jereo toko 6,30; 9,15; 2Mpa 23.,
- teny marin’i Iaveh. -
12Koa ny lalan’izy ireo hanjary
fitoerana malama ao amin’ny maizina, ho azy ireo;
haronjina sy ho lavo eo izy;
satria hampidi-doza aminy Aho,
amin’ny taona hamangiako azy, - teny marin’i Iaveh.-
13Tamin’ireo mpaminanin’i Samaria Aho nahita fahadalana#23,13 Nahita fahadalana Aho. Ireo mpaminany sandoka naminany tamin’ny anaran’i Baala, ka tena fahadalana sy firebirebena foana no aposany.,
fa naminany tamin’ny anaran’i Baala izy ireo,
ka nampaniasia an’i Israely vahoakako.
14Tamin’ireo mpaminanin’i Jerosalema kosa anefa
nahita zava-mahatsiravina#23,14 Zava-maharatsiravina. Ireo mpaminany sandoka ao Jerosalema dia nihambo ho maminany amin’ny Anaran’i Iaveh; ka zava-dratsy indrindra izany, satria fanazimbana ny Anaran’i Iaveh. Aho,
fa izy ireo maka vadin’olona sy mandeha araka ny lainga,
mankahery ny tanan’ny ratsy fanahy,
mba tsy hisy miverina avy amin’ny haratsiany izy ireo.
Amiko izy rehetra, tonga tahaka an’i Sôdôma;
ary ny mponina ao Jerosalema tahaka an’i Gômôra.
15Noho izany, izao no lazain’i Iavehn’ny tafika,
ny amin’ny mpaminany:
Dia efa hampihinana zava-mangidy azy ireo Aho,
sy hampisotro rano voaisy poizina azy!
Satria avy amin’ny mpaminanin’i Jerosalema
no nivoahan’ny faharatsiana ho any amin’ny tany rehetra.
16Izao no lazain’i Iavehn’ny tafika:
«Aza mihaino ny tenin’ireo mpaminany
maminany aminareo,
mitarika anareo ho amin’ny zava-poana izy ireo;
ny fahitana avy ao am-pony no ambarany,
fa tsy izay aloaky ny vavan’i Iaveh.
17Izay manamavo Ahy ilazany hoe:
Izao no voalazan’i Iaveh: Hiadana ianareo,
ary izay rehetra manaraka ny haratsian’ny fony, ataony hoe:
Tsy hisy loza hanjò anareo.
18Fa zovy moa no nanatrika ny fisainan’i Iaveh#23,18 Zovy moa no nanatrika ny fisainan’i Iaveh? Tsy iza tsy iza, fa ny mpaminany marina ihany.,
ka nahita sy nandre ny teniny?
Iza no efa nanongilan-tsofina nihaino ny teniny, ka nandre izany?»
19Indro ny tafio-drivotr’i Iaveh; ny fahatezerana efa hipoaka;
mitambolibolina ny tadiony
ka mihantona amin’ny lohan’ny tsy tia fivavahana.
20Tsy hihemotra ny hatezeran’i Iaveh
raha tsy efa vitany sy tanterany ny hevitry ny fony.
Ho fantatrareo mazava izany, amin’ny andro farany.
21Izaho tsy naniraka ireo mpaminany;
nefa nihazakazaka izy!
Izaho tsy niteny taminy, nefa naminany izy!
22Raha nanatrika ny fisainako izy,
dia ny teniko ho nambarany tamin’ny vahoakako;
ka ho namerina azy hiala#23,22 Ho namerina azy hiala. Ny maha-tsinontsinona ny tenin’ny mpaminany sandoka, dia hita miharihary, fa tsy mahavokatra fiovan-toe-panahy tsara amin’ny olona. amin’ny lalan-dratsiny izy,
sy amin’ny faharatsian’ny ataony.
23Moa Andriamanitry ny akaiky ihany va Aho,
teny marin’i Iaveh, -
fa tsy mba Andriamanitra amin’ny lavitra koa?
24Misy olona mahay miery amin’ny fierena va,
ka tsy ho hitako? - teny marin’i Iaveh-
Ny lanitra sy ny tany,
moa tsy manerana azy va Aho? - teny marin’i Iaveh.-
25Reko ny lazain’ireo mpaminany ireo,
izay maminany lainga amin’ny Anarako,
manao hoe: «Nanonofy aho; nanonofy aho!»
26Mandra-pahoviana?... Moa kendren’ireo mpaminany ireo,
izay maminany lainga,
ireo mpaminany ny fitaky ny fony ireo,
27moa ampoiziny va ny tsy hahatadidiavan’ny vahoakako Ahy,
noho ny nofy ifampilazan’izy samy izy avy,
toy ny nanadinoan’ny razany ny Anarako,
nosoloiny an’i Baala?
28Aoka ny mpaminany nanonofy
hilaza izany nofy izany;
ary izay manana ny teniko,
hilaza marina ny teniko.
Fa inona izay mololo raha miolotra amin’ny vary?
- teny marin’i Iaveh. -
29Moa ny teniko va, tsy tahaka ny afo,
- teny marin’i Iaveh, -
sy tahaka ny kanonta manorotoro ny vatolampy?
30Koa hiaviako ireo mpaminany ireo,
izay mifangalatra ny teniko samy ho azy avy.
31Indro hiaviako ireo mpaminany ireo,
- teny marin’i Iaveh, -
izay mampipelipelika ny lelany manao hoe:
«Teny marin’i Iaveh!»
32Indro hiaviako ireo izay maminany nofy lainga,
- teny marin’i Iaveh, -
izay milaza izany, mampaniasia ny vahoakako,
amin’ny laingany sy ny antsanga tsy aman’orana ataony.
Tsy naniraka azy, na nandidy na inona na inona azy akory Aho.
Koa tsy mahasoa ity firenena ity akory izy,
- teny marin’i Iaveh. -
33Raha ity firenena ity, na ny mpaminany, na ny mpisorona,
no manontany anao manao hoe:
«Inona izao no mavesatra ho an’i Iaveh?»
dia valio hoe: «Ianareo no izany mavesatra izany,
ary hariako ianareo.» - teny marin’i Iaveh. -
34Ary izay mpaminany, na mpisorona, na sarambaben’olona,
hanao hoe: «Mavesatra ho an’i Iaveh,»
dia hovangiako io olona io mbamin’ny ankohonany.
35Izao no ifampilazanareo aminareo isany,
sy amin’ny havanareo avy:
«Ahoana no navalin’i Iaveh?» ary: «Ahoana, hoy i Iaveh?»
36fa tsy haverinao intsony kosa ny hoe:
«Mavesatra ho an’i Iaveh!»
Fa ny tenin’ny olona ihany no havesatra aminy avy;
satria ianareo mamadika ny tenin’Andriamanitra velona,
dia i Iavehn’ny tafika, Andriamanitsika.
37Izao no holazainareo amin’ny mpaminany:
«Ahoana no navalin’i Iaveh taminao? Ahoana hoy i Iaveh?»
38Fa raha ataonao hoe: «Mavesatra ho an’i Iaveh,»
dia izao kosa no lazain’i Iaveh:
«Noho ianareo nilaza ny teny hoe:
Mavesatra ho an’i Iaveh,
rehefa naniraka tany aminareo anefa Aho hilaza aminareo hoe:
Aza manao hoe: Entan’i Iaveh intsony;
39noho izany, Izaho kosa dia tena hanadino anareo mihitsy,
sy hanary anareo tsy ho eo anatrehan’ny Tavako,
dia ianareo mbamin’ny tanàna nomeko
anareo sy ny razanareo;
40ary ataoko tonga aminareo ny fahafaham-baraka mandrakizay,
ny henatra mandrakizay,
izay tsy hohadinoina na oviana na oviana.»
Voafantina amin'izao fotoana izao:
Jeremia 23: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.