Joany 16
16
1Izaho no nilaza izany taminareo dia ny mba tsy hahatafintohina anareo. 2Fa horoahiny amin’ny sinagoga ianareo ary ho avy aza ny andro hiheveran’izay rehetra hamono anareo ho manao fanompoana an’Andriamanitra. 3Izy no hanao izany aminareo, dia satria tsy misy fantany na ny Ray na Izaho. 4Ary Izaho no nilaza izany taminareo kosa, dia mba hahatsiarovanareo, rehefa tonga ny fotoana, fa efa voalazako taminareo izany.
Ny hiavian’ny Mpanafaka alahelo
5Tsy mbola nolazaiko taminareo izany tamin’ny voalohany, satria mbola teto aminareo Aho; fa ankehitriny handeha ho any amin’Ilay naniraka Ahy Aho, ka tsy misy aminareo manontany hoe: Ho aiza Ianao? 6Fa noho Izaho nilaza izany taminareo, dia feno alahelo ny fonareo. 7Milaza ny marina aminareo anefa Aho fa mahasoa anareo ny handehanako; satria raha tsy mandeha Aho, dia tsy ho avy aminareo ny Mpanafaka alahelo; fa raha mandeha Aho, dia haniraka Azy ho atỳ aminareo. 8Ary rehefa tonga Izy, dia handresy lahatra an’izao tontolo izao ny amin’ny fahotana, sy ny amin’ny fahamarinana, ary ny amin’ny fitsarana: 9ny amin’ny fahotana, satria tsy mino Ahy izy ireo; 10ny amin’ny fahamarinana#16,10 Ny amin’ny fahamarinan’i Kristy izany, fa haseho ho marina Izy amin’ny fitsanganany ho velona avy any amin’ny maty sy ny fiakarany any an-danitra., satria mankany amin’ny Ray Aho, ka tsy ho hitanareo intsony; 11ary ny amin’ny fitsarana#16,11 Ny amin’ny fitsarana. Hasehon’ny Fanahy Masina fa efa voatsara, voaheloka, voaroaka ny demony (Kôl 2,13-15; Heb. 2,14)., satria voatsara sahady ny mpanapaka izao tontolo izao.
12Mbola manan-javatra betsaka holazaina aminareo Aho, nefa tsy zakanareo ankehitriny; 13fa rehefa tonga ny Fanahin’ny fahamarinana, dia Izy no hitari-dalana anareo amin’ny marina rehetra, satria tsy hiteny ho Azy Izy, fa izay rehetra ho reny no holazainy, ary ny zavatra ho avy no hambarany aminareo. 14Hanome voninahitra Ahy Izy satria handray ny avy amiko ka hanambara izany aminareo. 15Ahy izay rehetra ananan’ny Raiko, ka izany no nanaovako hoe: Handray ny avy amiko Izy ka hanambara izany aminareo.
Fanambaràn’i Jesoa ny hiverenany haingana
16Rehefa afaka kelikely, dia tsy hahita Ahy intsony ianareo; ary rehefa afaka kelikely indray, dia hahita Ahy ianareo, satria mankany amin’ny Ray Aho.
17Tamin’izay ny mpianany sasany dia nifampilaza hoe: «Ahoana no ilazany amintsika hoe: Rehefa afaka kelikely, dia tsy hahita Ahy intsony ianareo; ary rehefa afaka kelikely indray, dia hahita Ahy ianareo, satria mankany amin’ny Ray Aho?» 18Dia hoy izy ireo: «Inona izany lazainy hoe: Rehefa afaka kelikely? Tsy fantatsika izay lazainy.» 19Ary fantatr’i Jesoa fa te hanontany Azy izy ireo, ka hoy Izy taminy: Ianareo mifanontany ny amin’ny teniko hoe: Rehefa afaka kelikely, dia tsy hahita Ahy intsony ianareo; ary rehefa afaka kelikely indray, dia hahita Ahy ianareo. 20Lazaiko marina aminareo fa hitomany sy higogogogo ianareo, ary hifaly izao tontolo izao; halahelo ianareo, fa hody hafaliana ny alahelonareo. 21Ory ny vehivavy raha miteraka satria tonga ny fotoany; nefa tsy tsaroany intsony izay fahoriany rehefa teraka izy, noho ny hafaliany fa hoe misy olona teraka amin’izao tontolo izao. 22Manana alahelo koa ianareo ankehitriny, nefa ho hitako indray ianareo, ka ho faly ny fonareo, ary tsy hisy olona hanesotra ny hafalianareo. 23Amin’izany andro izany#16,23 Amin’izany andro izany, rehefa mahita Azy mitsangana avy any amin’ny maty (and faha-16) izy ireo, dia tsy hanontany intsony ireo zavatra anontaniany izao, satria hahita Azy izy amin’izay. dia tsy hanontany Ahy na inona na inona intsony ianareo. Lazaiko marina dia marina aminareo fa na inona na inona hangatahinareo amin’ny Ray, dia homeny anareo amin’ny Anarako. 24Mandraka ankehitriny#16,24 Mandraka ankehitriny, tamin’ny Tompo mbola niaraka taminy hita maso, dia tsy nangataka tamin’ny Anarany ny Apôstôly, tsy nanao Azy ho mpanalalana iankinany; fa rehefa lasa Izy vao hangataka toy izany izy ireo. dia mbola tsy nangataka na inona na inona tamin’ny Anarako ianareo; mangataha àry, dia hahazo ianareo, ka ho tanteraka ny fifalianareo.
25Fanoharana no nilazako izany taminareo; fa avy ny andro tsy hanaovako fanoharana aminareo intsony, fa hambarako aminareo miharihary ny amin’ny Ray. 26Amin’izany andro izany dia hangataka amin’ny Anarako ianareo, ary Izaho tsy milaza aminareo fa hangataka ho anareo amin’ny Ray Aho, 27satria ny Ray tia anareo koa noho ny nitiavanareo Ahy sy ny ninoanareo fa avy amin’Andriamanitra Aho. 28Avy amin’ny Ray no tonga amin’izao tontolo izao Aho; ary hilaozako indray izao tontolo izao ka hankany amin’ny Ray Aho. 29Dia hoy ny mpianany taminy: «Indro milaza tsotra Ianao ankehitriny, fa tsy manao fanoharana akory. 30Fantatray amin’izao fa mahalala ny zavatra rehetra Ianao, ka tsy mila hanontanian’olona: izany no inoanay fa avy amin’Andriamanitra Ianao. 31I Jesoa namaly azy hoe: Mino ange ianareo ankehitriny? 32Indro avy ny andro, na efa tonga sahady aza, izay hielezanareo samy ho any amin’izay halehany avy, sy handaozanareo Ahy ho irery; nefa tsy irery Aho tsy akory, fa ato amiko ny Ray. 33Izaho no nilaza izany taminareo, dia mba hanananareo fiadanana amiko. Hozoim-pahoriana ianareo eto amin’izao tontolo izao; fa matokia, efa nandresy an’izao tontolo izao Aho.
Voafantina amin'izao fotoana izao:
Joany 16: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.