Jôba 36
36
Ny tena hevitry ny fijalian’i Jôba.
1Mbola niteny indray koa i Eliò ka nanao hoe:
2«Mahareta kely ihany, dia ampianariko ianao,
fa mbola manan-kolazaina, hanamarina ny an’Andriamanitra aho.
3Haka ny porofoko avy any amin’ny fotony aho,
dia haneho ny fahamarinan’ny Mpahary ahy.
4Matokia, fa tsy misy fitaka ny teny alahatro;
olona marina amin’ny heviny no eto anoloanao.
5Indro fa mahery Andriamanitra nefa tsy mba mamingavinga olona,
mahery Izy amin’ny herin’ny fahalalany.
6Tsy avelany ho velona ny ratsy fanahy,
ary manome rariny ho an’ny olona ory Izy.
7Tsy mampiala ny masony amin’ny olona marina Izy,
sady mametraka ireny amin’ny seza fiandrianana miaraka amin’ny mpanjaka,
ataony tafaorina ho mandrakizay, ka dia tafasandratra izy ireo.
8Raha avy izay hifatorany aman-gadra,
sy hisingorany amin’ny tadim-pahoriana:
9ambarany azy ireo izay nataony,
dia ny fahotany vokatry ny fiavonavonany.
10Sokafany hihaino fananarana ny sofiny,
dia amporisihiny izy hiala amin’ny ratsy.
11Ka raha mihaino sy manaiky izy,
dia amin’ny fiadanana no hanaperany ny androny,
ary amin’ny fahafinaretana, ny taonany.
12Fa raha tsy mihaino kosa izy, dia ho levon’ny sabatra,
ho faty amin’ny hajamban-tsaina.
13Ny fo tsy mivavaka, dia entim-pahatezerana,
ka tsy mba mitaraina amin’Andriamanitra raha ataony latsaka amin’ny gadra izy ireo.
14Izany no mahafaty tanora an’ireny;
sy mahalazo ny ainy toy ny an’ny olom-betaveta.
15Fa ny ory kosa vonjen’Andriamanitra amin’ny fahoriany,
ary ny fijaliany no ampianarany azy.
16Ka hotsoahany amin’ny fahaporetana koa ianao,
hapetrany eo amin’ny malalaka, amin’ny fahafahana tanteraka,
ary ho voavoatra ny latabatrao sy handrosoana izay hanim-py indrindra.
17Fa raha fenoinao kosa ny famaran’ny tsy tia fivavahana#36,17 Raha fenoinao ny famaran’ny tsy tia fivavahana: Izany hoe: Raha manao fahotana betsaka sy lehibe ka hitovy amin’ny an’ny ratsy fanahy ny isan’ny fahotanao sy ny haratsiany, dia tsy ho azon’Andriamanitra leferina intsony, ka tsy maintsy ahatrany aminao ny sazy mendrika izany.
dia hivesatra ny fanamelohana aman-tsazin’izany ianao.
18Ka matahora fandrao tezitra Andriamanitra ka vesarany famaizana ianao;
ary sao voafitaky ny fanatitrao sarobidy ianao.
19Moa manafaka anao amin’ny fahoriana va ny fitarainanao,
ary na dia izay rehetra mety ho tratry ny herinao aza?
20Aza maniry ny hiavian’ny alina#36,20 Aza maniry ny hiavian’ny alina: angamba hanao ratsy no hevitr’izany?;
izay aharinganan’ny firenena eo amin’ny fitoerany.
21Mitandrema mba tsy hitodika hanatona ny tsy fahamarinana,
fa aleonao izany toy izay ny fahoriana.
Antsa fiderana ny Fahendrena mahefa
(Jereo Ekl 42,15–43,33)
22Jereo ange: lalina loatra ny fahefan’Andriamanitra!
Tompo iza moa no mitovy aminy?
23Zovy no mba nanorina lalana tsy maintsy halehany?
Zovy no afa-milaza aminy hoe: ‹Diso ny nataonao?›
24Koa ny mankalaza ny asany aloha no aoka hoheverinao,
fa ambentin-kiran’ny olona ny fankalazana an’izany.
25Fa ny olona rehetra gaga amin’izany,
ny olombelona mitazana izany avy lavitra#36,25 Ny olombelona mitazana izany: Ny olona mibanjina sy mandinika ny asa mahagaga vitan’Andriamanitra. Avy lavitra: Tsy afaka hahita akaiky na hahatakatra mazava izany asa izany, fa mahita sy mahalala azy manjavozavo fotsiny ihany..
26Lehibe Andriamanitra; mihoatra ny fahalalana rehetra,
tsy takatry ny saina ny isan’ny taonany.
27Manintona ny piti-drano madinika Izy,
dia miraraka ho ranonorana ireny, entin’ny havesarany.
28Avelan’ny rahona hilatsaka izy
sy hirotsaka amin’ny be sy ny maro.
29Iza no mahafantatra ny fivelatry ny rahona,
mbamin’ny fikotrokotroky ny lain’ny Tsitoha#36,29 Ny fikotrokotroky ny lain’ny Tsitoha: Noheverin’izy ireo, fa Andriamanitra dia mitoetra ao amin’ny lay vita amin’ny rahona izay manodidina Azy, sy izay nandefasany ny varatra mikotrokotroka.?
30Mbetika izy mamelatra ny fahazavany manodidina azy,
mbetika miery toy ny any ambanin’ny ranomasina.
31Toy izany no amoahany ny fitsaràny amin’ny firenena,
sy anomezany hanina ankabetsahana koa.
32Ataony eo an-tanany ny fahazavana,
dia tondroiny aminy ny zavatra tsy maintsy iantefany.
33Ka ny fikotrokotrony mampahalala azy mialoha,
manambara ny hiaviany ny fahatairan’ny biby fiompy.
Voafantina amin'izao fotoana izao:
Jôba 36: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.