Ekleziastika 42
42
1Aoka ho menatra ny manambara ny zavatra renao ianao,
sy milaza ny zavatra miafina.
Dia hanan-karena marina ianao amin’izay,
ary hahazo sitraka eo anatrehan’ny olona rehetra.
2Aza menatra amin’ireto zavatra ireto,
ary aza resin-kenatra olona, ka manao fahotana:
Aza menatra ny lalàn’ny Avo Indrindra#42,2 Aza menatra ny lalàn’ny Avo Indrindra. Izany hoe, aza menatra ny hanipaka ny fitsarana izay mitady hamela maina ny mpanota. sy ny fanekeny,
ny teny fanamarinana ny mpankahala fivavahana,
3ny miresaka amin’ny namana sy ny mpandalo,
ny manome soa kely ny sakaizanao,
4ny mampiasa mizana marina sy vato marina,
ny hahazo be na kely,
5ny tsy mifidifidy olona amin’ny varotra sy amin’ny mpivarotra,
ny mamay mafy ny zanakao,
ny mikapoka hatramin’ny manao loa-dra, ny mpanompo ratsy fanahy.
6Amin’ny vehivavy ratsy fanahy, mety ny fitomboka,
ary rehefa misy ny tana-maro, hidio am-panalahidy ny zavatra.
7Isao sy lanjao izay atolotrao ny olonao;
ary ataovy an-tsoratra izay omenao sy izay raisinao.
8Aza menatra ny mananatra ny adala sy ny ketrina,
mbamin’ny anti-panahy mifanditra amin’ny zatovo.
Dia ho tena vita fianarana tokoa ianao amin’izany,
sady hankatoavin’ny olona rehetra.
Mampitebiteby ray ny zanaka vavy
9Ahiahy takona mahazo ny rainy ny zazavavy,
ary tsy ahitany torimaso ny fiahiany azy;
raha mipetraka ho mpitovo izy sao hihoatra ny taonan’ny fahatanorany,
raha tafakambana amin’ny vadiny, sao halan-dralehilahy;
10mbola virjiny izy, mety ho voakojikojy,
ka hanana anaka ao an-tranon-drainy;
manam-bady indray sao hivadika amin’ny lalàm-panambadiana;
miara-mipetraka aminy izy sao hitoetra ho momba.
11Amin’ny zazavavy maditra manaova fitandremana mafy,
fandrao ianao ataony fihomehezan’ny fahavalonao,
fanoharan’ny ao an-tanàna, ambetin-dresaky ny vahoaka,
ary alany baraka eo afovoan’ny vahoaka rehetra.
Ny vehivavy
12Aza ataonao zavatra loatra rehefa mety ho olona tsara tarehy,
ary aza mipetraka eo amin’ny vehivavy;
13fa ny fitafiana no ivoahan’ny kalalao,
ary ny vehivavy kosa, ny haratsiam-behivavy.
14Aleo lehilahy#42,14 Aleo lehilahy. Aleo mijaly amin’ny tsy fahamarinana ataon’ny lehilahy, toy izay mandray ny kojikojin’ny vehivavy, izay mety ho vidin-tsarotra mihitsy. ratsy fanahy toy izay vehivavy mpanejokejo,
fa mahasafo-kenatra sy mahafa-baraka ny vehivavy.
2. NY VONINAHITR’ANDRIAMANITRA
1. EO AMIN’NY ZAVA-BOAARY
15Hotsahiviko izao ny asan’ny Tompo,
ary hotoriko izay hitako.
Ny tenin’ny Tompo#42,15 Ny tenin’ny Tompo. Ny hevitr’izany teny izany, araka ny filazan’i Bossuet dia hoe: Ao amin’ny Soratra Masina no itantarana sy itahirizana ny zavatra rehetra. no nahavitana ny asany rehetra.
16Ny masoandro izay manazava azy ireo dia mibanjina azy rehetra,
asan’ny Tompo, feno ny voninahiny izy.
17Ny olo-masiny#42,17 Ny olo-masina. Angamba ny lazaina amin’izany dia ny mpaminany sy ireo mpanoratra sasany izay tena notsilovin’Andriamanitra ny sainy. dia tsy nataon’ny Tompo mahavatra
ny mitory ny zava-mahagaga rehetra vitany,
izay naorin’ny Tompo Tsitoha mafy,
mba ho mafy orina izao tontolo izao amin’ny voninahiny.
18Tsapainy ny halalin’ny ranomasina sy ny fon’ny olombelona;
ary fantany ny heviny saro-pantarina indrindra.
Fa manana ny fahalalana rehetra ny Tompo;
ary hitany ny famantaram-potoana.
19Manambara ny lasa sy ny ho avy Izy,
ary mampiharihary ny dian’ny zava-miafina.
20Tsy misy hevitra miafina aminy,
tsy misy teny takona azy.
21Noravahany ny asa lehiben’ny fahendreny:
talohan’ny taona rehetra Izy, ary haharitra mandrakizay;
tsy nampiana na inona na inona ny tenany,
tsy nanesorana na inona na inona,
ary tsy nila mpanolo-tsaina na iza na iza Izy.
22Endrey, ny hatsaran-tarehin’ny asany rehetra!
ary ilay banjinin’ny olona amin’ireny anefa dia kilalaon’afo fotsiny.
23Velona daholo ny zavatra rehetra ary maharitra mandrakizay,
ho amin’izay rehetra ilana azy;
ary manaiky ny Mpahary ny zavatra rehetra.
24Mikambana tsiroaroa#42,24 Mikambana tsiroaroa. Jereo ao amin’ny toko 33,9 sy ny manaraka, ny hevitr’izany teny izany. avy izy,
ny iray tandrifin’ny iray,
ary tsy nisy nataony mankamin’ny faharavana#42,24 Tsy nisy nataony mankamin’ny faharavana: fa izany tsy fitoviana sy izany fifanoherana amin’ny zava-boaary izany, vao mainka mahatonga filaminana sy fifanarahana mahagaga, izay manaporofo ny fahefana sy ny fahendren’Andriamanitra..
25Fa ny anankiray dia antoky ny fahasambaran’ny anankiray:
iza no mety ho afa-po amin’ny fijerena ny voninahitry ny Tompo?
Voafantina amin'izao fotoana izao:
Ekleziastika 42: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.