Zakaria 14
14
Ady any am-parany; famirapiratan’i Jerosalema
1Indro misy andro ho avy ho an’i Iaveh ka ny babo aminao hozaraina eo afovoanao. 2Hangoniko eo anoloan’i Jerosalema ny firenena rehetra hiady, ary ny tanàna, ho afaka; ny trano horobaina, ny vehivavy hanaovana an-keriny; ary ny antsasaky ny tanàna ho lasan-ko babo; fa ny vahoaka sisa kosa, tsy hofongorana eo an-tanàna akory.
3Fa hivoaka i Iaveh hiady amin’ireo firenena ireo, toy ny fiadiny amin’ny andro fiadiana. 4Amin’izany andro izany, ny tongony hipetraka eo an-tendrombohitry ny Oliva, izay manandrify an’i Jerosalema amin’ny lafiny atsinanana, ka hitresaka eo afovoany miantsinanana sy miankandrefana ny tendrombohitry ny Oliva, ka hisy lohasaha lehibe, fa ny antsasaky ny tendrombohitra hitresaka mianavaratra, ary ny antsasany kosa hianatsimo; 5dia eo amin’ny lohasahan’ny tendrombohitro, no handosiranareo, fa hipaka hatrany Atsala#14,5 Atsala: Tanàna tsy fantatra loatra izay nisy azy. ny lohasahan’ny tendrombohitro: toy ny nandosiranareo ny horohoron-tany#14,5 Ny horohoron-tany: Jereo Am 1,1, tamin’ny andron’i Osiasa, mpanjakan’i Jodà, no handosiranareo. Ary ho avy i Iaveh Andriamanitro, ary ny olo-masina#14,5 Ny olo-masina: Ny Anjely (jereo Deter 33,2; Dan 7,10). rehetra hiaraka aminy.
6Amin’izany andro izany, dia hisy zavatra toy izao: ny mazava tsy hisy, fa ny hatsiaka sy ny ranomandry. 7Izany andro izany, dia ho safatsiroa ary fantatr’i Iaveh, ka tsy ho andro izy, tsy ho alina#14,7 Tsy ho andro tsy ho alina: Tsy hifandimby ny andro sy ny alina; ary amin’ny hariva dia hazava ny andro., ary amin’ny fotoan’ny hariva dia hisy ny mazava.
8Amin’izany andro izany, dia hisy zavatra toy izao: Hisy rano velona#14,8 Hisy rano velona: Manambara ny fiadanana izany., hivoaka avy ao Jerosalema, ny antsasany hankany amin’ny ranomasina atsinanana, ny antsasany hankany amin’ny ranomasina andrefana; dia ho toy izany na amin’ny fahavaratra na amin’ny ririnina. 9Ary i Iaveh ho tonga mpanjaka amin’ny tany rehetra; ary amin’izany andro izany, dia ho tokana ihany i Iaveh, ary ny Anarany ho tokana ihany. 10Hovana ho tany lemaka ny tany rehetra, hatrany Bagaà ka hatrany Remôna, eo atsimon’i Jerosalema.
Ary hasandratra sy hipetraka amin’ny toerany i Jerosalema, dia hatreo amin’ny vavahadin’i Benjamina ka hatreo amin’ny fitoeran’ny vavahadin’ny Zoro, ary hatreo amin’ny tilikambo Hananeely ka hatrany amin’ny famiazam-boaloboky ny mpanjaka. 11Ny olona, honina ao, ny anatema tsy hisy intsony; ary i Jerosalema handry feizay.
12Izao no fery hamelezan’i Iaveh ny firenena niady tamin’i Jerosalema: ny nofony hataony hihalò am-pitsanganana; ny masony hihalò ao anaty taola-masony; ary ny lelany hihalò ao am-bavany.
13Amin’izany andro izany dia hisy zavatra toy izao: Avy amin’i Iaveh no hisian’ny fikorontanana lehibe eo amin’izy ireo, ka samy hisambotra ny tanan’ny rahalahiny avy ny olona, sady hanainga tanana hamely ny namany avy. 14I Jodà koa hiady amin’i Jerosalema. Ary ho voaangona ny harena amin’ny firenena rehetra manodidina, dia volamena sy volafotsy, ary fitafiana be dia be.
15Ary ny fery hamely ny soavaly, ny mole, ny rameva, ny ampondra, mbamin’ny biby rehetra amin’ireny toby ireny, ho sahala amin’io fery io ihany.
16Izay rehetra sisa tavela amin’ny firenena niakatra namely an’i Jerosalema, hiakatra isan-taona avokoa, hiankohoka eo anatrehan’ny Mpanjaka, Iavehn’ny tafika, sy hankalaza ny fetin’ny Tabernakla#14,16 Hankalaza ny fetin’ny Tabernakla: Izay ahatsiarovana ny andro nitoerana tany an’efitra sy ny andro nidirana tao amin’ny tany nampanantenaina.. 17Izay fianakaviana tsy mba hiakatra any Jerosalema hiankohoka eo anatrehan’ny Mpanjaka, Iavehn’ny tafika, dia tsy mba hilatsahan’ny orana. 18Ary raha ny fianakavian’i Ejipta no tsy miakatra sy tsy tonga, dia tsy hilatsahan’ny ranonorana koa izy, sady hasian’ny fery hamelezan’i Iaveh an’izay tsy miakatra hankalaza ny fetin’ny Tabernakla#14,18 I Ejipta no tononina eto, dia noho izy fahavalon’ny vahoakan’Andriamanitra tranainy indrindra.. 19Izany no sazy hanjò an’i Ejipta sady sazy hanjò ny firenena rehetra, izay tsy miakatra hankalaza ny fetin’ny Tabernakla.
20Amin’izany andro izany, ny korintsandrintsan-tsoavaly, dia hisy hoe#14,20 Ny korintsandritsan-tsoavaly dia hisy hoe: Fahamasinana ho an’i Iaveh. Ny zavatra rehetra dia voatokana ho an’i Iaveh, no hevitr’izany teny izany.: Fahamasinana ho an’i Iaveh; ary ny vilany ao an-tranon’i Iaveh, ho toy ny kapoaka eo anoloan’ny ôtely. 21Ny vilany rehetra ao Jerosalema sy any Jodà koa, dia ho zava-boatokana ho an’i Iavehn’ny tafika avokoa. Ka izay hanao sorona rehetra, dia ho avy haka amin’ireny sy hahandro ny henany ao aminy avokoa; ary tsy hisy Kananeanina intsony, ao an-tranon’i Iavehn’ny tafika, amin’izany andro izany.
Voafantina amin'izao fotoana izao:
Zakaria 14: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.