Genesisy 21
21
Ny nahaterahan’Isaka, sy ny nandroahana an’i Hagara mianaka.
1ARY Jehovah namangy an’i Saraha araka ilay efa nolazainy, ary dia nataon’i Jehovah tamin’i Saraha araka ilay efa noteneniny. 2Dia nanan-anaka Saraha ka niteraka zazalahy tamin’i Abrahama, rehefa antitra izy, tamin’ny fotoana izay efa nolazain’Andriamanitra taminy. 3Ary ny anaran’ny zanany izay teraka, ilay naterak’i Saraha taminy, dia nataon’i Abrahama hoe Isaka.
4Dia noforan’i Abrahama Isaka zanany, rehefa teraka havaloana izy, araka izay efa nandidian’Andriamanitra azy. 5Ary efa zato taona Abrahama, raha niteraka an’Isaka zanany izy.
6Ary hoy Saraha: Efa nampihomehezin’Andriamanitra aho; izay rehetra mandre dia hiara-mihomehy amiko. 7Ary hoy koa izy: Nampoizin’iza akory moa no hilaza amin’i Abrahama fa hampinono zaza Saraha? kanjo efa niteraka zazalahy taminy aho, rehefa antitra izy. 8Ary rehefa lehibe ny zaza, dia notazana; ary Abrahama nanao fanasana lehibe tamin’ny andro nanotazana an’Isaka.
9Ary Saraha nahita fa nihomehy ny zanak’i Hagara Egyptiana, izay efa naterany tamin’i Abrahama. 10Dia hoy izy tamin’i Abrahama: Roahy io andevovavy io sy ny zanany; fa ny zanak’io andevovavy io tsy hiray lova amin’ny zanako, dia amin’Isaka. 11Fa ratsy teo imason’i Abrahama indrindra izany teny izany noho ny amin’ny zanany.
12Ary hoy Andriamanitra tamin’i Abrahama: Aoka tsy ho ratsy eo imasonao ny amin’ny zaza sy ny andevovavinao; fa izay rehetra lazain’i Saraha aminao, dia ekeo ny teniny, fa avy amin’Isaka no hantsoina izay taranaka ho anao. 13Nefa ny zanaky ny andevovavy kosa dia hataoko ho firenena, satria terakao ihany izy.
14Dia nifoha maraina koa Abrahama ka naka mofo sy siny hoditra iray feno rano, ary nomeny an’i Hagara ka napetrany teo an-tsorony, ary natolony azy koa ny zaza, dia nampandehaniny izy mianaka; ary lasa nandeha izy ka nirenireny tany an-efitr’i Beri-sheba. 15Ary rehefa lany ny rano tao amin’ny siny hoditra, dia nariany teo ampototry ny hazo kely anankiray ny zaza. 16Dia lasa izy ka nipetraka tery lavidavitra tandrifiny, tokony ho tra-tsipìka; fa hoy izy: Aza mba ho hitako anie izay hahafatesan’ny zaza. Ary nipetraka tandrifiny izy, dia nanandratra ny feony nitomany.
17Ary ren’Andriamanitra ny feon’ny zaza, dia niantso an’i Hagara Ilay Anjelin’Andriamanitra tany an-danitra ka nanao taminy hoe: Inona izato manjo anao, ry Hagara? aza matahotra, fa efa ren’Andriamanitra ny feon’ny zaza eo amin’ny itoerany. 18Mitsangàna, areno ny zaza, ka tantano; fa hataoko firenena lehibe izy. 19Dia nampahiratin’Andriamanitra ny mason’i Hagara, ka nahita lavaka fantsakana izy; ary lasa izy, dia nameno rano ny siny hoditra ka nampisotro rano ny zaza.
20Ary nomban’Andriamanitra ny zaza, dia nitombo izy; ary nonina tany an-efitra izy ka nony efa lehibe, dia tonga mpandefa tsipìka. 21Ary nonina tany an-efitra Parana izy-ka nakan’ny reniny vady avy tany amin’ny; tany Egypta izy.
Ny fanekena nataon’i Abrahama sy Abimeleka
22ARY tamin’izany andro izany Abimeleka sy Pikola, komandin’ny miaramilany, dia niteny tamin’i Abrahama ka nanao hoe: Omban’Andriamanitra hianao amin’izay rehetra ataonao; 23koa ankehitriny, ianiano amin’Andriamanitra aho fa tsy hamitaka ahy na ny zanako na ny taranako hianao; fa araka ny soa izay efa nataoko taminao no mba ataovy amiko sy amin’ny tany izay ivahinianao. 24Ary hoy Abrahama: Hianiana ihany aho.
25Ary Abrahama nananatra an’i Abimeleka noho ny lavaka fantsakana anankiray, izay efa nalain’ny mpanompon’i Abimeleka an-keriny. 26Dia hoy Abimeleka: Tsy fantatro izay nanao izany; fa hianao tsy mbola nanambara tamiko, ary izaho koa tsy mba nahare, raha tsy vao izao.
27Ary Abrahama naka ondry aman-osy sy omby, ka nomeny an’i Abimeleka; dia nanao fanekena izy roa lahy. 28Ary Abrahama nanokana ondrivavy kely fito navahana tamin’ny ondry. 29Ary hoy Abimeleka tamin’i Abrahama: Hatao inona ireo ondrivavy kely fito natokanao ireo? 30Ary hoy izy: Mba horaisinao avy amin’ny tànako ireo ondrivavy kely fito ireo ho vavolombelona amiko fa izaho nihady io lavaka fantsakana io. 31Izany no nanaovana io tany io hoe Beri-sheba;#21.31 Beri-sheba = Fantsakam-pianianana. satria teo no nianianan’izy roa lahy. 32Dia nanao fanekena tany Beri-sheba izy; ary dia niainga Abimeleka sy Pikola, komandin’ny miaramilany, ka niverina ho any amin’ny tanin’ny Filistina.
33Dia namboly hazo tamariska tany Beri-sheba Abrahama ka tao no niantsoany ny anaran’i Jehovah, dia Andriamanitra Mandrakizay. 34Ary Abrahama nivahiny elaela ihany tany amin’ny tanin’ny Filistina.
Voafantina amin'izao fotoana izao:
Genesisy 21: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.