Isaia 14
14
1Fa Jehovah hamindra fo amin’i Jakoba,
Ary mbola hifidy ny Isiraely indray
Ka hamponina azy ao amin’ny taniny;
Ary ny vahiny hikambana aminy,
Ary ny taranak’i Jakoba ho namany.
2Dia haka azy ny firenena ka hanatitra azy hody;
Ary ny taranak’Isiraely hanana azy ho ankizilahiny sy ankizivaviny ao amin’ny tanin’i Jehovah;
Dia ho tonga mpamabo izay namabo azy izy
Ary hampanompo izay nampahory azy.
Hira fifaliana hataon’ny Isiraely noho ny nanetrena ny mpanjakan’i Babylona.
3ARY amin’ny andro hanomezan’i Jehovah fitsaharana anao ho afaka amin’ny fahorianao sy ny fitebitebin’ny fonao ary ny fanompoana mafy izay nampanompoana anao, 4dia hataonao izao oha-teny ny amin’ny mpanjakan’i Babylona izao:
Hià! mitsahatra ilay mpampahory!
Eny, tsy ao intsony ilay tanàna volamena!#14.4 Na: mampandoa hetra.
5Jehovah efa nanapatapaka ny tehin’ny ratsy fanahy,
Dia ny tehina fanapahan’ny mpanapaka,
6Izay namely firenena tamin’ny fahatezerana,
Tamin’ny famelezana tsy nanam-pitsaharana,
Sady nampanompo firenena tamin’ny fahatezerana,
Tamin’ny fanenjehana tsy misy antra.
7Miadana ka mandry fahizay ny tany rehetra;
Velominy ao ny hoby,–
8Eny, ny hazo kypreso sy ny sedera any Libanona hifaly anao hoe:
Hatrizay niambohoanao izay dia tsy nisy mpikapa niakatra tatỳ aminay.
9Taitra ny fiainan-tsi-hita#14.9 Heb. Sheola. any ambany noho ny aminao mba hitsena anao amin’ny fihavianao;
Mamoha ny matoatoa hitsena anao izy,
Dia ireny bibilahy#14.9 Heb. osilahy. rehetra tambonin’ny tany;
Aingainy hiala amin’ny seza fiandrianany
Ny mpanjakan’ny firenena rehetra.
10Izy rehetra samy hiteny aminao hoe:
Hay! hianao koa mba efa osa tahaka anay!
Efa tonga tahaka anay hianao!
11Efa navarina ho etỳ amin’ny fiainan-tsi-hita#14.11 Heb. Sheola. ny tabihanao
Mbamin’ny feon’ny valihanao;
Kankana no ilafihanao,
Ary olitra no mandrakotra anao.
12Endrey! latsaka avy tany an-danitra hianao,
Ry ilay fitarik’andro, zanaky ny maraina;
Voakapa hianjera amin’ny tany hianao,
Ry ilay mpandripaka firenena.
13Ary hianao efa nanao anakampo hoe: Any an-danitra no hiakarako,
Ary ambonin’ny kintan’Andriamanitra no hanandratako ny seza fiandrianako;
Dia hipetraka eo an-tendrombohitra fivoriana
Any am-parany avaratra aho;
14Hiakatra ho any ambonin’ny havoan’ny rahona aho
Ka ho tahaka ny Avo Indrindra;
15Kanjo hampidinina hatrany amin’ny fiainan-tsi-hita#14.15 Heb. Sheola.
Ho any am-para-vodi-lavaka hianao.
16Izay mahita anao hibanjina anao sy hihevitra anao hoe:
Moa io va ilay lehilahy nampihorohoro ny tany
Sy nampihozongozona ny fanjakana
17Ary nanao izao tontolo izao ho efitra
Sy nandrava ny tanànany
Ary tsy nandefa ny mpifatotra hody?
18Ny mpanjaka rehetra amin’ny firenena
Samy mandry amin’ny voninahitra avokoa,
Ary samy ao am-pasany#14.18 Heb. tranony. avy;
19Fa hianao kosa dia nariana niala lavitra ny fasanao,
Tahaka ny solofon-kazo ratsy izay ariana,
Sady voatsindrin’ny fatin’ny voavono hianao,
Dia ireo voatrabaky ny sabatra,
Ka midina ho ao amin’ny vato ao an-davaka,–
Tahaka ny faty hitsakitsahin’ny tongotra.
20Tsy halevina tahaka ireny hianao,
Satria efa nanimba ny taninao sady efa namono ny olonao;
Tsy hotononina mandrakizay ny taranaky ny mpanao ratsy!
21Manamboara famonoana hamelezana ny zanany noho ny heloky ny razany;
Tsy hitsangana hanana ny tany izy,
Na hanorina tanàna eran’izao tontolo izao.
22Fa hitsangana hamely azy Aho,
Hoy Jehovah, Tompon’ny maro,
Ary hofoanako ny anaran’i Babylona sy izay sisa ao
Mbamin’ny zanany sy ny taranany, hoy Jehovah.
23Ary hataoko fonenan’ny sokina
Sy fihandronan’ny rano izy,
Ary hofafako kifafa fandringanana izy,
Hoy Jehovah, Tompon’ny maro.
24Jehovah, Tompon’ny maro, efa nianiana hoe:
Araka izay noheveriko no hatao aminy,
Ary araka izay nokasaiko no hotovina aminy.
25Dia ny hanorotoro ny Asyriana ao amin’ny taniko,
Ary ny hanitsakitsaka azy eny an-tendrombohitro;
Ny zioga fitondrany dia hiala amin’ireo,
Ary ny entany ho afaka amin’ny sorony.
26Izany no fikasana ny amin’ny tany rehetra,
Ary izany no tànana ahinjitra amin’ny firenena rehetra.
27Fa Jehovah, Tompon’ny maro, no efa nikasa, ka iza indray no hahafoana izany?
Ary ny tànany dia voahinjitra, ka iza no hampihemotra izany?
Faminaniana ny loza hanjo an’i Filistia.
28TAMIN’ny taona nahafatesan’i Ahaza mpanjaka no nisy izao faminaniana ny loza hanjo izao:
29Aza mifaly, ry Filistia rehetra,
Saingy tapaka ny tsorakazo namely anao;
Fa avy ao an-kibon’#14.29 Heb. fakan’. ny bibilava no hihavian’ny menarana,
Ary ny aterany ho tonga menaran’afo#14.29 Heb. sarafa. manidina.
30Ny faraidina indrindra#14.30 Heb. matoan’ny mahantra. hihinana,
Ary ny mahantra handry fahizay;
Fa hataoko maty mosary kosa izay tsy ringana aminao,#14.30 Heb. ny fakanao.
Eny, izay sisa aminao ho matiny.
31Midradradradrà, ry vavahady, ary mitaraina, ry tanàna;
Aoka ho ketraka avokoa hianao, ry Filistia!
Fa misy setroka mitranga avy any avaratra,
Ary tsy misy miala amin’ny laharany akory ny miaramilany.
32Ary inona moa no valiny ho entin’ny iraky ny jentilisa?
Izao: Jehovah efa nanorina an’i Ziona,
Ary ao no hialofan’izay olony ory.
Voafantina amin'izao fotoana izao:
Isaia 14: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.