Isaia 33
33
Ny hampijaliana an’i Asyria, sy ny soa ho hitan’i Ziona kosa.
1LOZANAO, ry ilay mandroba, nefa tsy norobaina hianao!
Ary mamitaka, nefa tsy nofitahina hianao!
Rehefa mitsahatra ny mandrava hianao, dia vao horavana kosa;
Ary rehefa mitsahatra ny mamitaka hianao, dia vao hofitahina kosa.
2Jehovah ô, mamindrà fo aminay;
Hianao no antenainay;
Aoka ho sandrinay#33.2 Heb. sandriny. isa-maraina Hianao
Sy ho famonjena anay amin’ny andro fahoriana.
3Ny feon’ny fitabatabana no mampandositra ny firenena;
Raha misandratra Hianao, dia mipariaka ny jentilisa.
4Ary ireny handevona ny babonareo tahaka ny fandevon’ny valala,
Tahaka ny fifanaretsaky ny kalalao no fifanaretsany eo aminy.
5Manerinerina Jehovah,
Fa mitoetra any amin’ny avo Izy;
Nofenoiny rariny sy fahamarinana Ziona.
6Ary hisy andro tsy manam-piovana ho anao,
Eny, haren’ny famonjena sy ny fahendrena ary ny fahalalana;
Ny fahatahorana an’i Jehovah no rakitrao.#33.6 Heb. rakiny.
7Indreo, ny lehilahy maheriny mitaraina eny ivelany;
Ny iraka nitady fihavanana dia mitomany mafy.
8Maty ny làlambe;
Tsy misy ny mpandeha;
Nofoanany ny fanekena;
Nalany baraka ny tanàna;
Tsy nanaja olona izy.
9Misaona ny tany ka milofika;
Menatra Libanona ka malazo;
Efa tonga tahaka ny tani-hay Sarôna,
Ary manintsana Basana sy Karmela.
10Ankehitriny dia hitsangana Aho, hoy Jehovah;
Ankehitriny dia ho any amin’ny avo Aho;
Ankehitriny dia hisandratra Aho.
11Torontoronina bozaka hianareo ka miteraka vodivary;
Ny fofonainareo dia tahaka ny afo handevona anareo.
12Ary ny firenena ho tahaka ny fandoroan-tsokay,
Eny, ho tahaka ny tsilo notombohina izay mirehitra amin’ny afo izy.
13Mihainoa ny amin’izay efa nataoko, hianareo izay lavitra,
Ary aoka hahafantatra ny heriko hianareo izay akaiky.
14Raiki-tahotra ny mpanota ao Ziona;
Horohoro no nahazo ny mpihatsaravelatsihy.#33.14 Na: ratsy fanahy.
Iza amintsika no hahatoetra amin’ny afo mandevona?
Iza amintsika moa no hahatoetra amin’ny lelafo mandrakizay?
15Izay mandeha amin’ny fahamarinana
Sady miteny zava-mahitsy,
Izay tsy mety mandray harena amin’ny fanaovana an-keriny
Fa manifikifika ny tànany mba tsy handray kolikoly,
Izay manentsin-tadìny mba tsy handrenesany ny amin’ny fandatsahan-dra
Sady manakimpy ny masony mba tsy hahita ny ratsy;
16Izy no honina ao amin’ny avo;
Ny fitoerana avony dia ny fiarovana any amin’ny harambato;
Izay hohaniny dia homena azy,
Ary ny rano hosotroiny tsy ho diso.
17Ny masonao hahita ny mpanjaka amin’ny hatsaran-tarehiny
Sady hahatsinjo tany malalaka dia malalaka.
18Hotsaroan’ny fonao ilay nahatahotra:
Aiza ny mpanoratra?
Aiza ny mpandanja?
Aiza ny mpanisa ny tilikambo?
19Ny firenena misetaseta dia tsy ho hitanao intsony,
Dia ilay olona miboediboedi-piteny ka tsy fantatra,
Na ny lela mikodedidedy ka tsy azo.
20Tsinjovy Ziona, dia ilay tanàna fihaonantsika tamin’ny fotoam-pivavahana;
Ny masonao hahita an’i Jerosalema ho fonenana mandry fahizay,
Dia lay izay tsy hafindra,
Ny tsimatra aminy tsy hongotana mandrakizay,
Ary tsy hisy hotapahina ny kofehiny.
21Fa Jehovah dia mahery ho antsika any,
Tany be ony sy lahin-drano lehibe any,
Nefa tsy halehan’ny sambo voizina,
Na hovakin’ny sambo lehibe.
22Fa Jehovah no Mpitsara antsika;
Jehovah no Mpanome lalàna antsika;
Jehovah no Mpanjakantsika;
Izy no hamonjy antsika.
23Mivaha ny mahazakan-tsambonao;
Tsy mahahazona mafy ny fiorenan’andry izy,
Na mahavelatra ny lay;
Fa amin’izay kosa dia hozaraina ny zavatra be voababo;
Na dia ny mandringa aza dia mba hahazo babo ihany.
24Tsy hisy amin’ny mponina ao hilaza hoe: Marary aho;
Ny olona izay mitoetra ao dia voavela heloka.
Voafantina amin'izao fotoana izao:
Isaia 33: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.