Jeremia 42
42
Ny nangatahan’ny Jiosy an’i Jeremia haka hevitra amin’i Jehovah, ary ny anatra nataon’i Jeremia tamin’ny Jiosy kosa noho ny tsy nanekeny ny saina avy tamin’i Jehovah.
1ARY ny mpifehy ny miaramila rehetra sy Johanana, zanak’i Karea, sy Jazania, zanak’i Hosaia, mbamin’ny vahoaka rehetra, na kely na lehibe, dia nanatona 2ka niteny tamin’i Jeremia mpaminany hoe: Masìna hianao, aoka hoborahina#42.2 Heb. hiankohoka. eto anatrehanao ny fifonanay, ary mba ivavaho amin’i Jehovah Andriamanitrao re izahay, dia ireto sisa rehetra ireto (fa vitsy izahay no sisa, na dia maro aza fahiny, dia araka izao hitan’ny masonao izao), 3mba hambaran’i Jehovah Andriamanitrao anay izay làlana mety halehanay sy izay zavatra tokony hataonay.
4Dia hoy Jeremia mpaminany taminy: Efa reko izany; koa, indro, hivavaka amin’i Jehovah Andriamanitrareo ary aho araka ny teninareo; ary ny teny rehetra izay havalin’i Jehovah anareo dia hambarako anareo, fa tsy hisy hafeniko.
5Dia hoy izy tamin’i Jeremia: Jehovah no aoka ho vavolombelona marina sy mahatoky amintsika, raha tsy manao araka ny teny rehetra izay anirahan’i Jehovah Andriamanitrao anao aminay izahay. 6Na ho soa, na ho ratsy, dia hohenoinay ny feon’i Jehovah Andriamanitray, izay nanirahanay anao, mba hahasoa anay, raha mihaino ny feon’i Jehovah Andriamanitray izahay.
7Ary nony afaka hafoloana, dia tonga tamin’i Jeremia ny tenin’i Jehovah. 8Ary izy niantso an’i Johanana, zanak’i Karea, sy ny mpifehy ny miaramila rehetra izay teo aminy mbamin’ny olona rehetra, na kely na lehibe, 9ka nanao taminy hoe: Izao no lazain’i Jehovah, Andriamanitry ny Isiraely, Izay efa nanirahanareo ahy mba hoborahiko#42.9 Heb. hampiankohoka. eo anatrehany ny fifonanareo:
10Raha mbola honina amin’ity tany ity ihany hianareo, dia haoriko hianareo, fa tsy horavako, ary hamboleko hianareo, fa tsy hongotako; fa manenina Aho ny amin’ny loza namelezako anareo. 11Aza matahotra ny mpanjakan’i Babylona izay atahoranareo; eny, aza matahotra azy, hoy Jehovah, fa momba anareo Aho hamonjy sy hanafaka anareo amin’ny tànany. 12Ary hataoko mahita famindrampo hianareo, dia hamindra fo aminareo izy ka hampody anareo ho any amin’ny taninareo.
13Fa raha hoy kosa hianareo: Tsy honina amin’ity tany ity izahay, ka tsy hihaino ny feon’i Jehovah Andriamanitrareo hianareo, 14fa manao hoe: Tsia; fa hankany amin’ny tany Egypta izahay, fa any no tsy hahitanay ady, na handrenesanay ny feon’ny anjomara na hahitanay mosary, ka dia any no honenanay, 15dia mihainoa ny tenin’i Jehovah ankehitriny hianareo izay sisa amin’ny Joda: Izao no lazain’i Jehovah, Tompon’ny maro, Andriamanitry ny Isiraely: Raha dia mikiry hankany Egypta ihany hianareo ka mandeha hivahiny any, 16dia hahatratra anareo any amin’ny tany Egypta ny sabatra izay atahoranareo, ary ny mosary izay ahinareo no hanjohy anareo any amin’ny tany Egypta, ary any no hahafaty anareo. 17Ary ny olona rehetra izay mikiry hankany Egypta hivahiny any dia ho fatin’ny sabatra sy ny mosary ary ny areti-mandringana any; ary tsy hisy sisa ho afa-mandositra ny loza izay hataoko mihatra aminy. 18Fa izao no lazain’i Jehovah, Tompon’ny maro, Andriamanitry ny Isiraely: Toy ny nanidinana ny fahatezerako sy ny fahavinirako tamin’ny mponina any Jerosalema, dia toy izany no hanidinana ny fahatezerako aminareo, raha mankany Egypta hianareo; ary ho fianianana sy ho figagana sy ho fanozonana ary ho fandatsa hianareo, sady tsy hahita ity tany ity intsony.
19Jehovah efa nilaza ny aminareo, ry sisa amin’ny Joda, hoe: Aza mankany Egypta hianareo; aoka ho fantatrareo tokoa fa efa nanariko androany hianareo. 20Kanjo efa nivily hianareo ka nahavoa ny ainareo tamin’ny nanirahanareo ahy ho amin’i Jehovah Andriamanitrareo hanao hoe: Mba ivavaho amin’i Jehovah Andriamanitsika re izahay, ary izay rehetra holazain’i Jehovah Andriamanitsika dia ambarao aminay, fa hataonay. 21Ary efa nambarako taminareo andro-any; nefa tsy nihaino ny feon’i Jehovah Andriamanitrareo hianareo ny amin’izay zavatra nanirahany ahy ho aminareo. 22Koa aoka ho fantatrareo marimarina fa ho fatin-tsabatra sy mosary ary areti-mandringana hianareo any amin’ny tany izay tianareo hivahiniana.
Voafantina amin'izao fotoana izao:
Jeremia 42: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.