The Chosen - Voafidy ho tonga FahagaganaSantionany

Andro faha-24_Nitahy anao Aho!

Nahavariana tokoa ireo trangan-javatra rehetra izay niainako teo anilan'i Jesosy hatramin'izay nanarahako Azy izay. Nahita Azy nanasitrana marary aho, nanafaka olona tamin'ny herin'ny haizina, nanao fahagagana sns. Fa ny tena nikasika ahy tamin'i Jesosy dia ny fomba firesany sy ny fampitany ny Fitiavany amin'ny hafa.

Ny fahamoram-panahiny sy ny fahaizany mifandray amin'ny olona tsirairay sy ny vondron'olona dia tena mahavariana tokoa, toa izany ihany koa ny fahefana izay ananany rehefa mampianatra. Noho izany indrindra dia tena nahatsiaro ho voatahy manokana mihitsy aho tamin'izaho nantsoiny sy nizarany ny fanomanana ny toriteniny. Afaka nanoratra ampahany tamin'ny toriteniny aho ary afaka nizara taminy ny fiantraikan'izany tamiko.

Raha ny mahazatra dia voatokana ho an'ireo olona ambony, mpanjaka sy manam-pahefana ny fahasambarana satria izy ireo no heverina fa mendrika izany. Jesosy kosa anefa dia nihevitra sokajin'olona hafa mihitsy: Maneho ny fahasambarana ho an'ireo izay mahatsapa fa malahelo am-panahy Andriamanitra, ho an'ireo ory, ho an'ireo noana sy mangetaheta ny fahamarinana, ho an'reo mpampihavana, ho an'ireo izay madio am-po sy ho an'ireo izay mandeha amin'ny làlan'ny fahamarinana (Matio 5:1-12)

Eny tokoa, ny fanjakany dia tsy avy amin'izao tontolo izao ary mandrava ny sary sy ny fisainana tia tena rehetra Izy. Izay no mahatonga Azy tonga tety an-tany tamin'ny fanetren-tena lehibe na dia Mpanjaka sy Mesia aza Izy. Manova ny fiainan'ireo izay misafidy ny hanary ny avonavom-po ka hanatona Azy rehefa avy natsoiny Izy.

Izany indrindra no nahazo ahy sy ireo maro toa ahy. Nifidy ahy Izy, tsy noho izaho mendrika, fa noho ny Fitiavany ahy. Izy irery ihany no mahita ireo harena miafina ao anatiko izay notakoman'ny heloko sy ny tsy fahatanterahako. Tsy haiko ny tsy hisaotra Azy ny amin'izany rehetra izany.

Ho ahy manokana dia natolotro Azy ny fiainako. Nanapa-kevitra ny hanara-dia an'i Kristy ilay Mesia aho ary tsy afaka ny hiverin-dalana intsony.

Matio no anarako ary izaho dia voafidy sy notahian'i Jesosy.

PS: Ry namako, Jesosy dia nifidy anao hanaraka Azy, ary maniry ny hanana fifandraisana manokana aminao Izy izay hitondra fitahiana ho anao amin'ny lafim-piainanao rehetra. Omeo Azy ny voninahitra anio noho ireo soa rehetra izay nataony anao sy noho ny fahatongavany tety an-tany satria Tia zao tontolo izao fatratra Izy. Jesosy tokoa no ivon'izao rehetra izao.

Voafidy ho tonga Fahagagana ianao!

Christian Misch