JOHN 20
20
Jesus daaztsą́ą́dę́ę́' náádiidzá
(Mt. 28:1-8; Mk. 16:1-8; Lk. 24:1-12)
1Áádóó Damį́įgo abínígo t'ah chahałheełgo, Mary Mágdaliin tséní'ootséelgi jiníyáá nít'éé' tsé dáádeelmááz nít'é'ígíí nahjį' eelmáazgo jiiłtsą́. 2Áko dashdiilwodgo, Sáíman Peter áádóó ła' íhooł'aahii, Jesus ayóó'ábó'nínígíí, baa jílwodgo ábizhdííniid, Tséní'ootsééldóó Bóhólníihii nihits'ą́ą́' yóó'adeistį́į́ lá, áko nideistį́įdi doo nihił béédahózin da. 3T'áá áko Peter áádóó ła' íhooł'aahígíí kintahdę́ę́' bił ch'í'ahizhneelchą́ą'go, tséní'ootséélgóó bił dah ahizhdíníilchą́ą́'. 4T'áá ájíłah ákǫ́ǫ́ ahizhneelchą́ą́', nidi ła' íhooł'aahígíí Peter yaa diilwodgo tséní'ootséeldi áłtsé yílwod, 5áko yaa ádzaago ákóne'é déez'į́į́', nít'éé' na'at'ą́hí łigaii dits'idígíí t'éí ákóne'é sinilgo yiyiiłtsą́, nidi t'áadoo yah ííyáa da. 6Áádóó Sáíman Peter akéédę́ę́' yílwodgo, tséní'ootséél góne' yah ííyá, áádóó ákwii na'at'ą́hí łigaii dits'idígíí t'éiyá sinilgo yiyiiłtsą́, 7índa bee ádít'oodí, hatsiits'iin bik'ídeesdiz nít'é'ígíí, éí doo na'at'ą́hí łigaii dits'idígíí sinilígíí bił sinil da, nidi t'áá sahdii yisdisgo siłtsooz. 8Áádóó ła' íhooł'aahii átsé tséní'ootséeldi yílwodígíí ałdó' ákóne' yah ííyá, áko yiyiiłtsą́ągo oosdląąd, 9háálá dadziztsą́ą́dę́ę́' náázhdidoodáałgo Diyin God bizaad bee ak'e'ashchį́įgo yaa halne'ígíí t'ah doo yik'ida'diitįįh da. 10Áádóó íhooł'aahii bighangóó anáát'áázh.
Jesus éí Mary Mágdaliin yich'į' yit'íní í'diilyaa
(Mt. 28:9,10; Mk. 16:9-11)
11Nidi tséní'ootséél bich'éédą́ą'gi Mary jichago dzizį́, t'áá jichago yaa ádziidzaago tséní'ootséél góne' jidéé'į́į́', 12áko diyingo naal'a'í naaki łigaigo hadít'éé léi', Jesus bits'íís sitį́į́ nít'é'ígi sikéego jiiłtsą́, ła' dzinées'ą́ą́ nít'é'ígi sidá, ła' dzidées'eez nít'é'ígi. 13Áko éí áhodííniid, Asdzání, ha'át'íishą' baa nicha? Nít'éé' ábizhdííniid, Jó, shiBóhólníihii shits'ą́ą́' yóó'adeistį́į́ lá, áko nideistį́įdi doo shił bééhózin da. 14Kót'éego hadzoodzíi'go t'ą́ą'jį' níjiiyá, nít'éé' Jesus sizį́įgo jiiłtsą́, nidi Jesus át'į́įgo t'áadoo bééhodzoosįįd da. 15Jesus áhodííniid, Asdzání, ha'át'íishą' baa nicha? Háishą' hanítá? Mary jinoot'áa'go ákwe'é haz'ánígíí yaa áhályáanii át'į́ jinízingo ábizhdííniid, Kwá'ásiní, yóó'ahwííníłtį́į́ ládą́ą́' nihwííníłtį́įdi bee shił hólne', áko t'áá shí dahodideeshtééł. 16Nít'éé' Jesus áhodííniid, Mary. Áko níjiiyáago Hííbrew k'ehjígo ábizhdííniid, Rabónai! Éí Na'nitiní jiníigo óolyé. 17Jesus áhodííniid, T'áadoo shíínítą'í, háálá t'ah doo shiTaa' bich'į' nídíshdáah da, nidi nílááh, shik'isóó bich'į' dínáahgo, ShiTaa', t'áá éí nihí ałdó' nihiTaa' bich'į' nihéénísdzá, shiDiyin, t'áá éí nihí ałdó' nihiDiyin bich'į' nihéénísdzá, shá bididííniił. 18Áádóó Mary Mágdaliin éí ídahooł'aahii bich'į' jílwodgo ábizhdííniid, Bóhólníihii néiłtsą́. Áádóó yee hach'į' hahaasdzí'ígíí baa hojoolne'.
Jesus bídahooł'aahii yich'į' yit'íní í'diilyaa
(Mt. 28:16-20; Mk. 16:14-18; Lk. 24:36-49)
19T'áá éí bijį́ i'íí'ą́ągo, Damį́įgo, ídahooł'aahii éí Jew dine'é yéédaaldzidgo biniinaa naháaztání góne' ádá da'deeskaal, nít'éé' Jesus baa honíle'go biníi'gi yiizį'go ábidííniid, Nihił dahózhǫ́ǫ le'. 20Kózhdííniidgo, hála' índa hooshk'iizh há deinééł'į́į́'. Áko ídahooł'aahii Bóhólníihii dayiiłtsą́ągo bił dahóózhǫǫd. 21Nít'éé' Jesus ánááhodoo'niid, Nihił dahózhǫ́ǫ le'. T'áá shiTaa' shiníł'a'ígi át'éego, shí ałdó' danihideesh'aał. 22Áko díí yee haadzíi'go hayołgo áhodííniid, Níłch'i Diyinii nihee dahóle'. 23T'áá háiida bibąąhági át'éii bá yóó'anídahidoh'aahígíí, éí bá yóó'anídahideest'ą́, índa t'áá háiida bibąąhági át'éii doo bá yóó'anídahidoh'aahígíí, éí doo bá yóó'anídahideest'ą́ą da.#Mt. 16:19; 18:18.
Jesus áádóó Thomas
24Nidi Thomas, naakits'áadahígíí ła', Naakií hodi'nínígíí, Jesus níyáago doo ajítah da. 25Áko ła' ídahooł'aahígíí ádahodííniid, Nihí Bóhólníihii daníil'į́į́'. Nidi ájíní, Hálátł'ááh góne' bił o'oolkaal nít'é'ígíí doo nééł'į́į́'góó, áádóó hoł o'oolkaal nít'é'í góne' shíla' doo íítsigóó índa hooshk'iizh góne' doo adeeshnii'góó, shí doo iideeshdląął da.
26Áádóó tseebííską́ągo hódahooł'aahii kin góne' ninááháaztą́, áko Thomas ałdó' ákwe'é ajítah. T'áá ákót'éego ádá nááda'deeskaal, nidi Jesus haa honíle'go haníi'gi yiizį'go áhodííniid, Nihił dahózhǫ́ǫ le'. 27Thomas áyidííniid, Kwe'é shíla' bidinílchíidgo níníł'į́, áádóó k'ídílchíidgo shooshk'iizh góne' adílnííh, áko t'áadoo doo iinídlání, nidi iinídlą́. 28Thomas éí Jesus áyidííniid, ShiBóhólníihii áádóó shiDiyin God! 29Nít'éé' Jesus ánáábidoo'niid, Thomas, shiiniłtsánígíí bąą shiisínídląąd. Doo dashiiłtséeh da nidi dashoodlą́ągo shaa dadzólíii éí bik'idahojidlí.
Díidí biniyé naaltsoos bee ak'e'ashchį́
30Áádóó náánáła' Diyin God bibee adziilii bee béédahózinii t'óó ahayóí Jesus hódahooł'aahii binááł t'áá aaníí baa nijiyáhígíí éí díí naaltsoos doo bik'inídaháasdzo da, 31nidi Jesus éí Christ, Diyin God biYe' nilį́įgo deidoohdląąłígíí biniyé díidíígíí bik'inídaháasdzo, áko éí deinohdlą́ągo baa dadzíínóhłíigo bízhi' biniit'aa iiná nihee dahólǫ́ǫ dooleeł.
Селектирано:
JOHN 20: NVJOB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).