JOHN 6
6
Diné ashdladi mííl yilt'éego ba'íltsood
(Mt. 14:13-21; Mk. 6:30-44; Lk. 9:10-17)
1Kódaadzaadóó bik'ijį' Gálilii be'ek'id tsé'naagóó Jesus bił dah nídii'éél, t'áá éí Taibííriyas be'ek'id wolyé. 2Áko diné t'óó ahayóí hakéé' yíkai, háálá bąąh nidahałniihígíí habee adziilii bee béédahózinii bá ájiilaaígíí dayiiłtsą́. 3Áko Jesus dah daask'id ła' bąąh híjiiyáago ákwii hódahooł'aahii bił nidzíiztą́ą́ nít'éé'. 4Jew dine'é hodílzingo áłah ná'ádleehígíí, t'áá éí atis'adeesdzá bee bééhániihii, k'adę́ę baa hoolzhíísh. 5Jesus jidéé'į́į́', nít'éé' diné t'óó ahayóí hach'į' dayíkáahgo jiiłtsą́, áko Philip ábizhdííniid, Háádę́ę́' lá bááh nidahidiilnihgo díí diné da'dooyį́į́ł lá? 6Éí t'áá daats'í íiyisí shijoodlą́ nízingo áháłní, háálá ádoonílígíí t'áá bí bił bééhózin. 7Áko Philip áhodííniid, Bááh éí denériyas#6:7 Ła'a jį́ na'anishgo denériyas t'ááłá'í nídahábįįh nít'éé'. naakidi neeznádiin bíighahgo nahaaznii' nidi t'áadoo bidínóołnah da, azhą́ t'ááłá'í nítínígo áłch'į́į́dígo bada'iistsood nidi doo bidínóołnah da. 8Nít'éé' hódahooł'aahii ła' Andrew, Sáíman Peter yił háá'ázhígíí, áhodííniid, 9Kǫ́ǫ́ ashkii léi' tł'oh naadą́ą́' bidee'í łees'áán ashdla'go áádóó łóó' áłts'íísígíí naakigo neijaah, nidi éísh ákózhnéelą́ą'go hodínóołnah? 10Áko Jesus ádííniid, Diné t'áá ałtso dadinohbįįh bidiní. Éí haz'ánígi tł'oh yíl'áago ákwii diné ashdladi míilgo daats'í dineezbin. 11Áko Jesus éí łees'áán néidiinilgo, Diyin God yich'į' yaa ahééh niizį́į'go, [bídahooł'aahii yitaiznii', áádóó bídahooł'aahii éí] dadineezbinígíí yitaa deiznii'; łóó' ałdó' t'áá bee hwiih ódle' bíighahgo yitaiznii'. 12Hwiih daazlį́į'go hódahooł'aahii ábizhdííniid, Bi'oh nida'iisdą́'ígíí áłah áńdaahdlééh, áko doo t'áá ádzaaí dooleeł da. 13Áko tł'oh naadą́ą́' bidee'í łees'áán ashdla' neheesti'go dajííyą́ą'ii, éí bi'oh da'jííyą́'ígíí ts'iizis naakits'áadah bii' hadazhdééłbįįd. 14Áko Jesus habee adziilii bee bééhózinii baa nijiyáhígíí dayiiłtsą́ągo ádadííniid, Díí t'áá aaníí Diyin God yá halne'ii nahasdzáán bikáa'gi doogááł hodoo'niidii át'į́į́ lá.
15Áko Jesus aláahgo naat'áanii jidooleełjį' ahó'di'doodził biniyé k'adę́ę aadę́ę́' hach'į' dah adiildéehgo baa ákodziniizį́į'go dziłgóó t'áá sáhí dah náázdiidzá.
Jesus táłkáá' yigááł
(Mt. 14:22,23; Mk. 6:45-52)
16I'íí'ą́ągo be'ek'id góyaa hódahooł'aahii hadanáákaigo, 17tsinaa'eeł yiih náákai, áádóó Kapérniyamgóó tsé'naa bił dah adii'éél. Áko hiłiijį́į'go Jesus t'ah doo haa nádáah da. 18Nít'éé' ayóó át'éego deeyolgo biniinaa tó náádadiidááh. 19Áko táá' daats'í, dį́į́' daats'í tsin sitą́ ánízahgóó da'jíł'eełgo Jesus táłkáá'góó tsinaa'eeł yich'į' yigáałgo dajiiłtsą́. Áko bik'ee hoł yéé' dahazlį́į́', 20nidi áhodííniid, Shíyee' ásht'į́; t'áadoo nídaałdzidí. 21Áko haa bił dahóózhǫǫdgo tsinaa'eeł yiih dahast'e'go, t'áá áko kéyah bich'į' da'jíł'eełígíí baa da'dzis'éél.
Diné éí Jesus hadeintá
22T'áá ákǫ́ǫ́ dabiiskánígíí náwónaaníjí tsinaa'eeł doo ła' si'ą́ą́góó dayiiłtsą́, tsinaa'eeł Jesus bídahooł'aahii yiih yikai yę́ę t'éiyá. Hódahooł'aahii tsinaa'eeł doo bił biih jookai da ni', nidi hódahooł'aahii t'éiyá t'áá sáhí bił dah adii'éelgo bił béédahózin. 23Ákondi Bóhólníihii łees'áán yik'i sodoolzingo ahééh niizį́į́'dóó bik'ijį' da'jííyą́ą́' yę́ędóó t'áá áyídígi tsinaa'eeł ła' Taibííriyasdę́ę́' nidahaaz'éél lá. 24Áko diné éí Jesus áádóó bídahooł'aahii doo kwe'é nidaakaigóó bił béédahoozingo, bí ałdó' Jesus yíkadantáago tsinaa'eeł yiih yikaigo Kapérniyamgóó bił dah nááda'dii'éél.
Jesus éí bááh bee iináanii nilį́
25Be'ek'id wónaanídi hak'ídaaskaigo ádahodííniid, Na'nitiní, hádą́ą'shą' kwe'é yíníyá? 26Jesus áhodííniid, T'áá aaníí, t'áá aaníígóó ánihidishní, Nihinááł shibee adziilii bee béédahózinii baa niséyáhígíí doo biniyé shíkadanohtáa da, nidi łees'áán daoyą́ą'go bee hwiih dasoolį́'ígíí éí t'éiyá biniyé shíkadanohtá. 27Ch'iyáán áádįįłii t'éiyá t'áadoo bíká nidaahkaí, nidi iiná doo ninít'i'ii bá ch'iyáán doo ádįįhii hádaaht'į́, éí Diné Silį́į'ii nihaididoo'ááł, háálá Diyin God aTaa' nilíinii hwee lą́ asłį́'ígíí bee hwéého'dílzingo áhoolaa. 28Áko ádahodííniid, Haashą' deiit'į́įgo t'éí Diyin God naanish yaa bił hózhóonii baa neiikai doo? 29Jesus ánááhodoo'niid, Diyin God yiníł'a'ii deinohdlą́ągo baa dadzíínóhłíigo éí naanish Diyin God bił hóshǫ́. 30Áko ánáádahodoo'niid, Ha'át'íishą' nibee adziilii bee bééhózinii ádíílíiłgo, dadíníil'įįłgo daniidiidląął? Ha'át'íísh ádíílííł? 31Danihizhé'é yę́ę honoojíigi mána dayííyą́ą́';#Ex. 16:4,15. t'áá bee ak'e'ashchínígi át'éego, Yá'ąąshdę́ę́' bááh baz'níłtsood.#Ps. 78:24. 32Áko Jesus ánááhodoo'niid, T'áá aaníí, t'áá aaníígóó ánihidishní, Yá'ąąshdę́ę́' bááh éí doo Mózes niha'níłtsood da, nidi shiTaa' éí yá'ąąshdę́ę́' bááh t'áá aaníinii niha'iiłtsóód. 33Háálá bááh Diyin God bíhígíí éí yá'ąąshdę́ę́' hadahóóle'go nihokáá' dine'é iiná yeidii'aah. 34Áko ánáádahodi'ní, Bóhólníihii, t'áá áłahjį' díí bááh nihaná'íltso' doo.
35Jesus ánááhodoo'niid, Shí bááh bee iináanii nishłį́; shaazhníyáhígíí éí doo dichin náázhdoodleeł da, áádóó shijoodlą́ągo sheidzólíii éí doo dibáá' náázhdoodleeł da. 36Nidi ánihidííniid, Dashoołtsą́ą nidi t'ah doo da'oohdląąh da. 37ATaa' sheidii'aahígíí t'áá ałtso éí shaa hidookah; shaazhníyáhígíí éí t'áá íiyisí doo nówehjį' hodideeshniił da. 38Háálá doo t'áá shí íinisinígi át'éego ádeeshnííł biniyé yá'ąąshdę́ę́' hadááyáa da, nidi shiníł'a'ii íinízinígíí éí ádeeshnííł biniyé níyá; 39díí éí [aTaa'] shiníł'a'ii yee íinízinii át'é, éí t'áá ałtso shaazhnínilígíí doo ła' yóó'adeesht'eeł da, nidi niiníłką́ądi éí t'áá ałtso daneeznáádę́ę́' náádabidideeshjah. 40Háálá shiTaa' díí yee íinízinii át'é, éí t'áá aYe' jiiłtsánígíí áádóó joodlą́ągo beijólíhígíí, iiná doo ninít'i'ii hwee hólǫ́ǫ dooleeł, áko niiníłką́ądi dadziztsą́ą́dę́ę́' nááhodideeshłááł.
41Shí éí bááh yá'ąąshdę́ę́' hadahóóle'ígíí nishłį́, jinínígíí biniinaa Jew dine'é saad dahasłį́į́'. 42Áko ádadííniid, Da' díísh doo Jesus, Jóseph biye' át'į́į da? Bizhé'é áádóó bimá béédahoniilzin. Ha'át'éegoshą' áko k'ad, Shí yá'ąąshdę́ę́' hadááyá, jiní? 43Áko Jesus ánááhodoo'niid, T'áadoo shiniinaa ałch'į' nihiyi' nidahodi'ni'í. 44Diné doo ła' shaa doogáał da, aTaa' shiníł'a'ígíí shaa honílóozgo t'éiyá, áko niiníłką́ądi dadziztsą́ą́dę́ę́' nááhodideeshłááł. 45Diyin God yá dahalne'ii binaaltsoos yii' kódaaníigo yee ak'eda'ashchį́, Áko t'áá ádzíłtso Diyin God nidahodínóotįįł.#Is. 54:13. T'ááłá'í nítínígo aTaa' deidiizts'ą́ą'go ídahooł'ą́'ígíí éí shaa hakááh. 46Ákondi éí diné ła' aTaa' nilíinii yiyiiłtsą́, doo dishníigo ádíshníi da, t'áá hazhó'ó Diyin God bits'ą́ą́dę́ę́' hojílónígíí t'éiyá, éí aTaa' jiiłtsą́. 47T'áá aaníí, t'áá aaníígóó ánihidishní, Shoodlą́ągo shaa dzólíhígíí éí iiná doo ninít'i'ii bee hólǫ́. 48Shí éí bááh bee iináanii nishłį́. 49Danihizhé'é yę́ę honoojíigi mána dayííyą́ą́', ákondi éí daneezná. 50Díí t'éiyá yá'ąąshdę́ę́' bááh hadahóóle'ígíí át'é, áko t'áá háiida éí yiyííyą́'ígíí doo dadootsaał da. 51Shí éí bááh hináanii yá'ąąshdę́ę́' hadahóóle'ii nishłį́; t'áá háiida díí bááh jiyánígíí hool'áágóó jiináa dooleeł, áko nihokáá' dine'é bááh yee hináa dooleełgo baa deesh'áłígíí éí shitsį'.
52Ákohgo Jew dine'é ałghada'dit'áahgo áda'ahidoo'niid, Hait'éegoshą' díí diné t'áá bí bitsį' niha'doołtsołgo dadiidį́į́ł? 53Áko Jesus áhodííniid, T'áá aaníí, t'áá aaníígóó ánihidishní, Diné Silį́į'ii bitsį' doo daoyą́ą́'góó áádóó bidił doo daohdlą́ą́'góogo, iiná doo nihee dahólǫ́ǫ da doo; 54t'áá háiida shitsį' jiyánígíí áádóó shidił jidlánígíí éí iiná doo ninít'i'ii hwee hólǫ́, áko niiníłką́ądi dadziztsą́ą́dę́ę́' nááhodideeshłááł. 55Háálá shitsį' éí t'áá aaníí yidą́ át'é, índa shidił t'áá aaníí yidlą́ át'é. 56T'áá háiida shitsį' jiyánígíí áádóó shidił jidlánígíí éí shiyi' hojílǫ́, áádóó bidiníná hayi' honishłǫ́. 57T'áá aTaa' hináanii shiníł'a'go aTaa' bee hinishnánígi át'éego, t'áá háiida shijííyą́'ígíí shee jiináa dooleeł. 58Díí yá'ąąshdę́ę́' bááh hadahóóle'ígíí át'é. Azhą́ danihizhé'é yę́ę mána dayííyą́ą' nidi daneezná. T'áá háiida díí bááh jííyą́'ígíí éí hool'áágóó jiináa dooleeł. 59Kapérniyamgi kin bii' áłah ná'ádleeh góne' nazh'nitingo díí bee hadziisdzíí'.
Saad binahjį' iiná doo ninít'i'ii ee hodooleełii
60Áko hódahooł'aahii éí deidiizts'ą́ą'go lą'í ádadííniid, Díí áhá'nínígíí t'áá íiyisí nantł'a; háísh ałdó' yiyíists'ą́ą' doo? 61Nidi Jesus éí hódahooł'aahii doo bił ákódaat'éégóó yaa nídaat'ínígíí doo jidiizts'ą́ą' da nidi hoł bééhoozingo ábizhdííniid, Díí saadísh bik'ee nidaałtal? 62Ákoshą' Diné Silį́į'ii áłtséédą́ą́' hólǫ́ǫ́ nít'é'í góde náádáałgo daołtsą́ągo haa yit'éego baa nitsídaahkees doo? 63Níłch'i Diyinii éí iiná eidii'aah, nidi ats'íís éí t'áadoo nídoodleełí da; saad bee nihich'į' hahásdzí'ígíí éí Níłch'i Diyinii bits'ą́ą́dóó bee iináanii át'é. 64Nidi nihí ła' doo da'iinohdlą́ą da. Háálá Jesus t'óó ha'níítą́ą́' yę́ędą́ą́' doo da'oodláanii bił bééhózin, índa diné nináhodidoo'áłígíí ałdó' bił bééhózin. 65Áko ázhdííniid, Díí biniinaa ánihidííniid, Diné doo ła' shaa doogáał da, shiTaa' hadi'ní'ą́ągo t'éiyá.
66Kódaadzaadóó bik'ijį' hódahooł'aahii lą'í hats'ánáhaazhjée'go t'áadoo hakéé' tánáádookai da. 67Áko Jesus éí naakits'áadahígíí bich'į' hadzoodzíi'go ábizhdííniid, Da' nihíísh ałdó' shits'ádoohjah? 68Sáíman Peter áhodííniid, Bóhólníihii, háísh ałdó' bich'į' dah náádidiikah? Ni t'éí saad binahjį' iiná doo ninít'i'ii hodooleełii nee hólǫ́, 69áko ni éí t'áá aaníí Diyin God hináanii biYe' Diyinii Christ nílį́įgo deisiidląąd.#Mt. 16:16; Mk. 8:29; Lk. 9:20. 70Jesus ánááhodoo'niid, Da' shíísh doo naakits'áadah nołt'éego nánihidiinil da, nidi ła' níłch'i bi'iiníziinii nohłį́? 71Éí Sáíman, Iskáriyat biye' nilíinii, Júdas ábijiní, háálá t'áá éí nináhodidoo'ááł, éí naakits'áadahígíí ła' atah nilį́.
Селектирано:
JOHN 6: NVJOB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).