LUKE 5
5
Łóó' t'óó ahayóí haadlo'
(Mt. 4:18-22; Mk. 1:16-20)
1Ákódahoodzaago Genésaret be'ek'id bąąhgóó dzizį́įgo, diné yíl'áhígíí Diyin God bizaad deididoots'į́į́ł biniyé hach'į' ałk'i naakai. 2Nít'éé' be'ek'id bąąhgi tsinaa'eeł naaki sinilgo jiiłtsą́, nidi łóó' hadayiileehí tsinaa'eeł yiyi'dę́ę́' haakaigo biłóó' bee hadahaltsósí dayiigis lá. 3Áko Sáíman bitsinaa'eeł biih jííyáago, Tábąąhdóó t'áá áháníjį' ni'níł'eeł, bizhdííniid. Áko tsinaa'eeł biyi'dóó dasneezdáago diné áłah silį́'ígíí nazneeztą́ą́'.#Mt. 13:1,2; Mk. 3:9,10; 4:1. 4Áádóó ałtso niyázhníłti'go Sáíman ábizhdííniid, Tó ditą́ąjį' ni'níł'eeł, áádóó nihiłóó' bee hadahaltsósí bee hadadi'yoołtsos biniyé taah daałtsóós. 5Áko Sáíman áháłní, Na'nitiní, tł'éé' bíighah dayíníilníísh, ákondi t'áadoo ła' shódeisiilt'e' da!#Jn. 21:3. Nidi nizaad k'ehgo k'ad łóó' bee hahaltsósí taah deestsos. 6Ákódadziidzaago, łóó' t'óó ahayóí biyada'dziiłtsooz,#Jn. 21:6. áádóó hałóó' bee hahaltsósí hats'ą́ą́' dahadlaadgo, 7náánáła' tsinaa'eeł biyi'di diné bił ałch'odajó'nínígíí háká adoojah biniyé ách'į' bídazh'deezhgish. Áádę́ę́' haa da'as'éelgo tsinaa'eeł t'áá áłah łóó' bii' hadazhdééłbįįdgo bąą tsinaa'eeł hats'ą́ą́' táłtł'ááh nidééh. 8Sáíman Peter éí yiyiiłtsą́ągo Jesus yiyaajį' nitsidinígo'go kójíní, Bóhólníihii nílíinii, shits'ánínááh, háálá bąąhági ááníiłii nishłį́. 9Háálá łóó' t'óó ahayóí hadadzistsoozígíí bąą hoł naakaígíí bił t'óó hoł adahayóí; 10James índa John éí Zébedii biye'ké nilį́įgo, Sáíman yił ałch'odaa'níhígíí ałdó' ákódaadzaa. Áádóó Jesus éí Sáíman áyidííniid, T'áadoo bik'ee nił yé'í; kodóó náásgóó diné niłnée doo. 11Áko bitsinaa'eeł tábąąhjį' ninádeis'éelgo, t'áá ałtsoní t'áá ákǫ́ǫgo Jesus bikéé' dashdiikai.
Jesus éí diné ła' łóód ats'íís yiyáanii naałdzidii bee bąąh dah haz'ą́ągo néidiisá
(Mt. 8:1-4; Mk. 1:40-45)
12Ákódahoodzaago kin haal'áá léi'gi nijigháá nít'éé', łóód ats'íís yiyáanii biiłhéé léi' hadááh níyá; éí Jesus yiyiiłtsą́ągo yiyaajį' nitsidinígo'go náyookąąhgo ání, Bóhólníihii, íinínízin ládą́ą́' nááshididííłááł. 13Áko Jesus k'ídeesníi'go hodeelchidgo áháłní, Íinisin lą́ą; łóód nąąh óodįįh. T'áá áko łóód ats'íís yiyáanii naałdzidii hąąh ásdįįd. 14Áko áhodííniid, T'ááká diné ła'da bił hóólne' lágo, nidi nílááh dah diináahgo náá'iiłniihii bíni'dii átsé niníł'į́, áádóó nááni'diilzáhígíí bąą nááhániihii Mózes yee nihoní'áanii bik'ehgo náá'ayíłniih,#Lev. 14:1-32. áko éí bee nilóód náádzíi'ii diné bił béédahózin doo. 15Nidi t'óó yówehda bee haa hane'ígíí adahideezdláád, áko t'óó ahayóí deididoots'į́į́ł biniyé áádóó bąąh dah nidahaz'ánígíí náádabidi'doodlááł biniyé haa áłah silį́į́'. 16Nidi bits'ą́ą́' honoojíígóó dashdiiyáago áadi sozdoolzin.
Jesus éí diné doo bitah nahwii'náanii néidiisá
(Mt. 9:1-8; Mk. 2:1-12)
17Ákódahoodzaago łah jį́įgo nináázh'nítingo, ákwii Férisii danilíinii índa bee haz'áanii yínda'niłtinii, éí Gáliliidi índa Judíya kéyahdi kin hadaas'áhídę́ę́' t'áá ałtso índa Jerúsalemdę́ę́' neheeskaigo naháaztą́ą́ lá, áádóó Bóhólníihii bibee adziilii bee náázhdi'doołááł biniyé hoł hólǫ́. 18Nít'éé' diné léi' bitah doo nahwii'náágóó bik'i antéhí yee hach'į' dayíłtsóós, áko éí yahadooltéełgo hayaajį' nidooltééł danízin, 19nít'éé' t'óó ahayóí áłah ílį́įgo biniinaa yah adahozhdoołtééł góne' ch'ééh hadazneeztą́ą'go, kin bighą́ą'jį' hadahodzistį́, áádóó kin bighą́ą́'dę́ę́' ąą dazdeeznilgo haníi'jį' Jesus bidáahjį' bik'i antéhí bee hadah adahodzizlo'. 20Áko bida'oodlą' yee aa dadzólíii jiiłtsą́ągo ájíní, Kwá'ásiní, ádił ni'iyínílzí'ígíí ná yóó'adoot'ą́. 21Áko bee haz'áanii yínda'niłtinii índa Férisii danilíinii nida'ídí'níiłkidgo ádaaní, Díí Diyin God í'diilyaago hahadziihígíishą' háí át'į́? Háishą' ádił ni'iidzííh á yóó'iidii'aah? Diyin God t'éiyá ni. 22Nidi baa nitsídadzikeesígíí Jesus bił bééhoozingo áhodííniid, Ha'át'íishą' biniyé danihijéí bii' t'óó nihił daahaadago nitsídaahkees? 23Háidíígíishą' doo nantł'agóó bee ha'doodzih? Ádił ni'iyínílzí'ígíí ná yóó'adoot'ą́, ha'nííjí daats'í, éí doodago, Nídii'néehgo dah diinááh, ha'nííjí daats'í? 24Nidi nahasdzáán bikáa'gi Diné Silį́į'ii ádił ni'iidzííh á yóó'iidii'aah yee bóhólníihgo nihił béédahózin doo, jidííniidgo bitah doo nahwii'nánígíí ábizhdííniid, Nídiidááh, nidishní, áádóó bik'i nítéhí nídiiníiłgo nighangóó nídídááh. 25T'áá áko hanááł nídii'na'go yik'i sitį́į́ nít'éé' yę́ę néidiinil, áádóó Diyin God yaa haniihgo bighangóó dah nídiidzá. 26Áko t'áá ałtso t'óó bił adahayóigo Diyin God yaa dahaznih áádóó t'áá bił daayée'go ádaaní, Díí jį́ doo nihił béédahózin da yę́ę daníil'į́į́'.
Jesus éí Líívai, Shikéé' yínááł, yidííniid
(Mt. 9:9-13; Mk. 2:13-17)
27Éí ákódahoodzaadóó bik'ijį' ch'ízhníyá, nít'éé' tax nahalyéhígíí yiniyé sidáii Líívai yolyéego, tax nahalyéhígi sidáago jiiłtsą́, áko, Shikéé' yínááł, bizhdííniid. 28Áádóó nízhdii'na'go t'áá ałtsoní t'áá ákǫ́ǫgo bikéé' dashdiiyá.
29Nít'éé' Líívai t'áá bí bighangi ayóó át'éego Jesus yá áda'íísįįd, áádóó ákwii tax nahalyéhígíí yiniyé naazdáii índa binaadę́ę́' danilíinii t'óó ahayóí yił da'ayą́ągo nidaháaztą́. 30Áko Férisii danilíinii índa bee haz'áanii yínda'niłtinii yił łá'í danilíinii éí hódahooł'aahii yaa nídaast'įįdgo ádaaní, Ha'át'éegoshą' tax nahalyéhígíí yiniyé naazdáii índa bąąhági ádaaníiłii bił da'ohsą́?#Lk. 15:1,2. 31Áádóó Jesus hach'į' haadzíi'go áhodííniid, Diné doo bąąh dah nidahaz'ánígíí éí azee' ííł'íní doo yich'į' dadikáah da, nidi bąąh nidahaz'ánígíí t'éiyá; 32ts'ídá t'áá ákogi ádaat'éii doo bíká ádideeshniił biniyé níyáa da, nidi bąąhági ádaaníiłii, Łahgo át'éego Diyin God bich'į' tsíńdadohkeesgo nihibąąhági át'éii bits'áhóhkááh, bidideeshniił biniyé níyá.
Hodílzingo doo adánígíí bína'ídíkid
(Mt. 9:14-17; Mk. 2:18-22)
33Áádóó ádahodííniid, John bídahooł'aahii t'áá ahą́ą́h hodílzingo doo adą́ yee ádá nídahool'aah áádóó sonídadilzįįh, Férisii danilíinii bídahooł'aahii ałdó' t'áá ákódaat'į́, nidi ni nídahooł'aahii éí doodį́įłii áádóó doodlį́įłii deiyą́. 34Áko Jesus áhodííniid, Iiyehii t'ah yił naakaigo iigehgi neheeskaígíísh dahodísingo doo da'ayą́ą́góó ádadoohłííł? Dooda lą́ą! 35Nidi iiyehii hats'ą́ą́' nídidooltéłígíí beidoołkááł, áko éí bijį́įdi índa dahozdísingo doo da'jiyą́ą da doo. 36Áádóó hane' bee ak'idi'dootį́įłii ła' yee hoł nááhoolne': Diné ła'da éé' ániidíígíí yiididoozǫ́ǫsgo éé' haastihii doo yineididoo'áał da; ákódziidzaago, éé' ániidíígíí azdoozǫ́ǫ́s, áádóó ániidíígíí bidoodǫ́ǫzii haastihígíí doo bił aheełt'ée da dooleeł. 37Áádóó diné ła'da wáin ániidíígíí tó abid hadaastihii doo yiih yikaah da; ákódziidzaago, wáin ániidíígíí tó abid deidoołdohgo t'áá ádzaaí dooleeł, áádóó tó abid ałdó' t'áá ádzaaí dadooleeł. 38Nidi wáin ániidíígíí tó abid ádaaniidíígíí biih yikááh [áko t'áá áłah nízaadgóó choo'į́]. 39Áádóó diné éí wáin ałk'idą́ą́' ádaalyaaígíí yidlą́ągo, ániidíígíí doo yidínóozįįł da, háálá ání, Wáin ałk'idą́ą́' ádaalyaaíjígo yá'át'ééh.
Селектирано:
LUKE 5: NVJOB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).