MARK 4
4
K'éé'dídléehii binahjį' hane' bee ak'idi'dootį́įłii
(Mt. 13:1-9; Lk. 8:4-8)
1Be'ek'id bąąhgi Jesus nínáázhdí'níitą́ą́'. Áko diné t'óó ahayóí haa áłah silį́į́', éí bąą tsinaa'eeł biih jííyáago bii'dóó dah dzineezdá,#Lk. 5:1-3. áko diné áłah silį́'ígíí t'áá át'é tábąąhgóó yíl'á. 2Nít'éé' hane' bee ak'idi'dootį́įłii lą'ígóó bee naz'neeztą́ą́', áko nazh'nitingo ábijiní, 3Da'íísółts'ą́ą́'! K'éé'dídléehii léi' álástsii' k'iididoolééłgóó ch'íníyá. 4Áko álástsii' ła' nihiyiiłkaad, nít'éé' ła' atiinjį' ahineezdee'. Atiinjį' ahineezdee'ígíí tsídii nidahaast'a'go ałtso yaa nahodeeskai. 5Náánáła' tsétahjį' ahineezdee', ákwe'é łeezh doo hózhǫ́ hólǫ́ǫ da, áko łeezh doo ditánígíí biniinaa t'áadoo hodíína'í hadaneesą́, 6áko doozhǫǫgo dah adii'ą́ągo, hadaneesánígíí yideez, índa bihétł'óól ádingo biniinaa daniiłna'. 7Náánáła' ch'il dadeeníinii bitahgóó ahineezdee', áko ch'il dadeeníinii bilááh daneesą́ągo ałtso bííghą́ą́', áko t'áadoo bineest'ą' dahazlį́į' da. 8Índa náánáła' łeezh yá'át'éehjį' ahineezdee'go dadínéesą́ą́dóó nidahineesą́ągo bineest'ą' dahazlį́į́', ła' tádiindi, ła' hastą́diindi, ła' neeznádiindi bilááh nídaasdlį́į́'. 9Áko ázhdííniid, T'áá hajaa' hólǫ́ǫgo azdiits'a'ígíí háni' ajíists'ą́ą́'.
Hane' bee ak'idi'dootį́įłii biniyé át'éii
(Mt. 13:10-17; Lk. 8:9,10)
10Áádóó t'áá sáhí dzizlį́į'go, t'áá ákǫ́ǫ́ hanaagóó naakits'áadahígíí áádóó yił naháaztánígíí hane' bee ak'idi'dootį́įłii yíndahódééłkid. 11Áko ábizhdííniid, Diyin God bee bóhólníihgo bił haz'áanii bee na'nitinii doo bééhózin daígíí nihich'į' ííshją́ą́ ádaalyaa, nidi doo nihich'ijí danilíinii bich'į'go t'éiyá t'áá ałtso hane' bee ak'idi'dootį́įłii át'éego bee bił dahane',
12áko dazhníł'į́į nidi doo deizdoołtséeł da,
dazdiits'a' nidi doo bik'idazhdi'dootį́įł da;
doodaii' bąąhági ádadziidzaaígíí bits'ą́ąjį' ninázhdookah, áádóó há yóó'anídahididoot'ááł.#Is. 6:9,10.
K'éé'dídléehii binahjį' hane' bee ak'idi'dootį́įłii ááhyiłníinii
(Mt. 13:18-23; Lk. 8:11-15)
13Áko Jesus áhodííniid, Da' díí hane' bee ak'idi'dootį́įłiísh t'áadoo bik'ida'dootą́ą da? Ákoshą' haa yit'éego hane' bee ak'idi'dootį́įłii t'áá ałtso bik'idadi'doohtį́į́ł? 14K'éé'dídléehii éí Diyin God bizaad k'iidilé. 15Áko díí saad k'idoolyáhígi ła' atiinjį' ahineezdee'ígíí ádaat'é; éí saad t'áá deidiits'į́į́hgóó, t'áá áko Séítan yigháahgo dabijéí biyi'di k'idoolyáhígíí hááyii'nííł. 16Áádóó t'áá ákónáánát'éego tsétahgóó ahineezdee'ígíí éí saad t'áá dazdiits'į́į́hgóó, t'áá áko baa hoł dahózhǫ́ǫgo nídazhdiiléhígíí ádaat'é, 17áko dahayi'di ahétł'óól ádaadin, nidi t'óó kónígháníjį' hwee dahodina', áko nít'éé' saadígíí biniinaa hach'į' nidahwii'náago, doodaii' atídaho'dil'į́įgo haa ní'diildahgo t'áá áko bits'áníjiijeeh. 18Áádóó ła' ch'il dadeeníinii bitahgóó ahineezdee'ígíí éí saad deidiits'į́į́h, 19nidi nahasdzáán bikáa'gi bee da'iináanii baa nitsáhákees, áádóó at'į́ hodíní'ah, índa t'áá ałtso bidáhoneení ghadahodiit'aahgo éí saad yę́ę deighą́, áko doo bineest'ą' dahaleeh da. 20Nidi łeezh yá'át'éehii biih hineezdee'ígíí éí saad deidiits'į́įhgo nídeidiyiilééh, áádóó bineest'ą' dahaleehgo ła' tádiindi, ła' hastą́diindi, ła' neeznádiindi bilááh ninádahadleeh.
Adiníłdíinii bił yaa az'ą́
(Lk. 8:16-18)
21Áádóó Jesus ánáádí'ní, Diné doo bee hool'iní yidiiłtłi'go tsits'aa' yił yaa nií'aah da, doo nidi tsásk'eh yiyaa ii'aah da, da' bá ya'ii'áhígíísh doo yikáa'gi dah yidoo'áał da?#Mt. 5:15; Lk. 11:33. 22Háálá baa hasti'go dah nool'į́įłii nidi bééhodoozįįłgo át'é, áko t'áá ha'át'íhída bik'é'ésti'ígíí hahgoda báádi'dooltsos.#Mt. 10:26; Lk. 12:2. 23Diné ła'da hajaa' hólǫ́ǫgo azdiits'a'ígíí éí háni' ajíists'ą́ą́'. 24Áádóó Jesus ánáádoo'niid, Dadoohts'a'ígíí hazhó'ó dayísółts'ą́ą́', háálá t'áá ła' bá ída'nóoł'ąądígi ánéelt'e'go nihá índa'dí'nóol'ąął,#Mt. 7:2; Lk. 6:38. áádóó da'doohts'a'ígíí t'áá biláahgo nidi nihaa náádidoot'ááł. 25Háálá t'áá háiida ha'át'íhída hwee hólónígíí biláahgo ła' haa náádoolyééł, áádóó ha'át'íhída hwee ádinígíí, éí t'áá hwee hólónígíi nidi haghadoolyééł.#Mt. 13:12; 25:29; Lk. 19:26.
K'eelyéí nanise'gi binahjį' hane' bee ak'idi'dootį́įłii
26Jesus ánáádoo'niid, Diyin God bee bóhólníihgo bił haz'áanii éí kót'é: diné léi' álástsii' nihi'jiiłkaadgo k'izh'díílá. 27Áko tł'ée'go ní'jiilwosh áádóó jį́įgo náázhdii'nah, áádóó álástsii' hadaneesą́ áádóó dadínéesą́, áko hada'neesánígíí índa dadí'néesánígíí t'áadoo hoł bééhoozin da. 28Háálá ni' t'áá bí aneest'ą' yidínísééh, áłtsé yiitsoh áádóó bit'ąą' haleeh, náá'ákóne' bineest'ą' nááhádleeh, áádóó áadi índa ałtso nit'į́į́h. 29Áádóó ant'į́įhgo iigéeshjį' ahalzhishgo, t'áá áko bee iigéshí bee aneest'ánígíí jiigéeshgo baa nízhdiidááh.#Joel 3:13.
Mástad bílástsii' binahjį' hane' bee ak'idi'dootį́įłii
(Mt. 13:31,32,34; Lk. 13:18,19)
30Áádóó Jesus ánáádoo'niid, Diyin God bee bóhólníihgo bił haz'áaniishą' ha'át'íí bił ahąąh nidadii'nił, áádóó hane' bee ak'idi'dootį́įłiishą' ha'át'íí bee baa dahodiilnih? 31Jó, éí ch'il mástad wolyéhígíí bílástsii' nahalin, háálá éí k'eelyéí dahólónígíí t'áá ałtso bi'oh áníshéhígo k'idilyééh, 32áko k'idilyéehgo hanisééh, áko dówózhiigi áníłtsogo dahólónígíí t'áá ałtso yilááh áníłtso yileeh, áko bits'áoz'a' dantsxaaz daaleehgo bichaha'ohgóó tsídii nidahat'ahígíí bit'oh ádayiił'įįh.
Jesus hane' bee ak'idi'dootį́įłii yinahjį' na'nitin
(Mt. 13:34,35)
33T'áá yik'ida'dootą́'ígi át'éego hane' bee ak'idi'dootį́įłii lą'í bee diné nazneeztą́ą́'; 34hane' bee ak'idi'dootį́įłii t'áágéedgo diné doo nazhnitin da nít'éé', nidi hódahooł'aahii bił t'áá sáhí jileehgo, hane' bee ak'idi'dootį́įłii ááhyiłníinii hazhó'ó yaa halne'.
Jesus tó náádadiidáahii índa níyol hasht'eidííłt'e'
(Mt. 8:23-27; Lk. 8:22-25)
35T'áá éí bijį́ i'íí'ą́ągo áhodííniid, Tį', be'ek'id wónaanígóó nihił adoo'oł. 36Áko hódahooł'aahii diné áłah silį́'ígíí yits'ą́ąjį' dah diikaigo, tsinaa'eeł yázhí bii' dzizdáhígíí yiih yikaigo tsinaa'eeł ła' hanaagóó naaznilígíí bił wónaanígóó dah dazh'diił'éél. 37Nít'éé' ayóó át'éego deeyol, áádóó tó náádadiidáhígíí tsinaa'eeł biih yilk'oołgo tsinaa'eeł k'adę́ę tó bii' hadibin. 38Jesus t'éí akéédę́ę́' tsii'ááł bikáa'gi ajiłhosh, áádóó hódahooł'aahii ch'éédahasidgo ádahodííniid, Na'nitiní, da' tó nihidooghą́łígíísh doo ni'diił'áa da? 39Áko ch'éédzídzidgo níyol dzideeztehgo tó ábijiní, K'adí! Hasht'edít'eeh! Áko ííyol, índa t'áá íiyisí hodiiyeel. 40Áko Jesus áhodííniid, Ha'át'íishą' biniyé nídaałdzid? Da' t'ahdii nidiísh doo da'iinohdlą́ą da? 41Áko hódahooł'aahii t'áá íiyisí nídaaldzidgo áda'ahidoo'niid, Ákoshą' díí lá háí át'į́įgo, níyol áádóó tó nidi bik'eh dahół'į́?
Селектирано:
MARK 4: NVJOB
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).